Dağların qoynunda yerləşən Xocalı rayonunun Seyidbəyli kəndində həyat yenidən öz axarına qayıdır. AZƏRTAC xəbər verir ki, "Böyük qayıdış" proqramı çərçivəsində doğma yurdlarına dönən sakinlər illərlə həsrətini çəkdikləri torpaqlarda təsərrüfat qurur, ata-baba ənənələrini yaşadırlar.
Ələkbərovlar ailəsi də Böyük qayıdışın sevincini yaşayan, kənddə öz təsərrüfatını quran ilk sakinlərdəndir.
Ötən ilin sentyabrında doğma kəndinə qayıdan ailəyə Dövlət Məşğulluq Agentliyi tərəfindən 21 baş qoyun təqdim edilib. Bu dəstək ailənin heyvandarlıq fəaliyyətini yenidən bərpa etməsinə imkan yaradıb.
Ələkbərovlarla kəndin otlaq sahəsində, heyvanları otararkən həmsöhbət olduq. Əvvəllər də heyvandarlıqla məşğul olduqlarını bildirən Tahirə xanım 30 illik həsrətin bitməsindən böyük qürurla danışır: "Köçkünlük illərində Şəki və Bərdə rayonlarında məskunlaşmışdıq, həmişə qoyun saxlayırdıq. Seyidbəyli kəndinə köçdükdən sonra dövlətimiz tərəfindən bizə 21 baş qoyun verildi. İndi qoyunları kəndin otlaqlarında otarırıq. Neçə il bu torpaqların həsrətində olmuşuq. Bura gələndən sonra rahat nəfəs alırıq, buz kimi bulaqlardan su içirik. Kəklikotu, gülxətmi, dazıotu, qırxbuğum kimi çiçəkləri yığırıq. 30 il bu dağ çiçəklərini yığmağın, qoxlamağın, dəmləməyin həsrətini çəkmişdik. Şükür ki, indi qovuşmuşuq".
Axşamüstü otlaqdan kəndə qayıdan heyvanlar arxaca salınır. Təsərrüfat sahibi qeyd edir ki, kəndə gələndən sonra qoyunlardan 4-ü doğub, üstəlik, əlavə 5 baş keçi də alaraq təsərrüfatı böyüdüblər. Məqsəd heyvandarlığı daha da inkişaf etdirməkdir.
Evdə çay süfrəsi arxasında davam edən söhbət zamanı ailə illərin həsrətindən sonra doğma yurda qayıdışın yaratdığı sevinc və qürur hissini bölüşür. Ailə başçısı Rasim Ələkbərov 1992-ci ildən başlayan çətin köçkünlük illərini, çadır şəhərciklərində çəkilən əziyyətləri xatırlayır. Deyir ki, Seyidbəyliyə qayıdan ilk sakinlərdən biridir: "Şükür bu günümüzə ki, bu torpaqlarda ailəmizlə birlikdə yaşayırıq. Allah şəhidlərimizə rəhmət eləsin, qazilərə cansağlığı versin. Müzəffər Ali Baş Komandanımıza, dövlətimizə minnətdarıq. 30 il çox çətinliklər çəkmişik. İnşallah, bu gündən sonra xoş günlər yaşayacağıq. Qarabağımızda rahat nəfəs alırıq. Həsrətini çəkdiyimiz torpaqlarımızda yaşayırıq. Dövlətimizin başçısı evimizin açarlarını bizə şəxsən təqdim edib, qonağımız olub. Bu, bizim üçün unudulmaz bir qürurdur".
Ələkbərovlar ailəsinin ən böyük sevinci isə Seyidbəylidə dünyaya gələn ilk körpənin elə bu ocaqda doğulmasıdır. Masa arxasında oturan 3 nəvəsindən ən balacasını göstərən Rasim kişi böyük ümidlə əlavə edir: "Kəndə qayıtdıqdan sonra ilk dünyaya gələn uşaq mənim nəvəm oldu. İnşallah, kəndimiz daha da böyüyər, əhalimiz çoxalar, bu torpaqlarda uşaq səsləri heç vaxt əskik olmaz".
