İyunun 12-də “İBİS” otelində 15 İyun - Milli Qurtuluş Gününə həsr olunmuş “Hüquq Liqası 2026” şahmat turniri baş tutub. Vəkillər Kollegiyasının təşkilatçılığı ilə ilk dəfə keçirilən yarışın məqsədi hüquqşünaslar arasında intellektual rəqabəti və dostluq əlaqələrini gücləndirməkdir.
Turnirdə Vəkillər Kollegiyası, Baş Prokurorluq, Ədliyyə Nazirliyi və Hakimlər İttifaqının komandaları mübarizə aparıb. Hər qurum yarışda 7 nəfərlə təmsil olunub.
Açılışda çıxış edən Vəkillər Kollegiyasının sədri Anar Bağırov iştirakçıları salamlayıb və Milli Qurtuluş Günü münasibətilə təbrik edib. Sədr Ümummilli Lider Heydər Əliyevin hakimiyyətə qayıdışının dövlətçilik tariximizdəki həlledici rolundan danışıb. O, dahi liderin siyasəti nəticəsində ölkədə hüquqi dövlət quruculuğu və vəkillik institutunun inkişafı üçün güclü zəmin yarandığını vurğulayıb. Anar Bağırov həmçinin rəhbərlik etdiyi qurumda idmanın təşviqinə xüsusi önəm verildiyini, 2019-cu ildən bəri şahmat üzrə 5-dən çox turnir təşkil edildiyini diqqətə çatdırıb. Sədr layihəyə dəstək olan tərəfdaşlara təşəkkürünü bildirib.
Tədbirdə çıxış edən Azərbaycan Hakimlər İttifaqının sədr müavini Ələddin Cəfərov turnirin əhəmiyyətini yüksək qiymətləndirib. O bildirib ki, bu cür yarışlar hüquq sahəsində fəaliyyət göstərən qurumlar arasında dostluq münasibətlərinin və peşəkar əməkdaşlığın möhkəmlənməsinə mühüm töhfə verir.
Daha sonra Vəkillər Kollegiyasının sədr müavini, “İdmançı Vəkillər” Fondunun İdarə Heyətinin sədri Pərviz Ələkbərov çıxış edib. O, belə turnirlərin hüquq ictimaiyyəti arasında həmrəyliyin möhkəmləndirilməsi, sağlam rəqabətin təşviqi və idmana marağın artırılması baxımından önəmindən danışıb.
Sədr müavini təşkil olunan turnirin gələcəkdə də davam etdiriləcəyinə və gözəl bir ənənəyə çevriləcəyinə əminliyini ifadə edib.
"BOA Agency” ASC-nin direktoru Samir Mustafayev çıxışında turnir iştirakçılarına uğurlar diləyib, intellektual və idman yönümlü layihələrin dəstəklənməsinin cəmiyyət üçün faydalı olduğunu deyib. O, gələcəkdə də bu kimi yarışların və sosial əhəmiyyətli təşəbbüslərin həyata keçirilməsinə dəstək göstərməyə hazır olduqlarını vurğulayıb.
FİDE arbitri Cavanşir Bağırov oyun qaydaları barədə məlumat verərək yarışın dairəvi sistem üzrə 2 dövrədən ibarət olduğunu bildirib.
Arbitr qeyd edib ki , bu format komandaların öz güclərini daha obyektiv şəkildə nümayiş etdirməsinə və yarışın yüksək rəqabət şəraitində keçməsinə imkan yaradır.
Sonra Anar Bağırov ilk gedişi edərək turniri açıq elan edib.
Gərgin və maraqlı keçən mübarizənin yekununda ədliyyə orqanlarının əməkdaşları I yerə layiq görülüblər. Vəkillər komandası II, hakimlər isə III yeri tutublar.
Qaliblərə kubok, diplomlar və “Baku Book Center” mağazasından hədiyyə kartları təqdim edilib.
Turnirə təşkilati dəstək Azərbaycan Şahmat Federasiyası tərəfindən göstərilib.
