Sotheby's hərrac evi argentinalı kolleksiyaçı Nelli Arrieta de Blaquierin şəxsi kolleksiyasından impressionist və modernist rəssamların 12 rəsmini hərraca çıxarıb. Bu barədə "The Guardian" qəzeti məlumat verib.
Uzun illər ictimaiyyət üçün əlçatmaz olan və demək olar ki, mifoloji kimi tanınan kolleksiyaya Vinsent van Qoq, Pol Sezann, Klod Mone, Pol Qogen, Kamil Pissarro, Edqar Deqas, Pyer-Ogüst Renuar, Alfred Sisley, Andre Deren, Anri de Tuluz-Lotrek və Moris de Vlaminkin əsərləri daxildir. Sotheby's əsərlərin ümumi dəyərini 450 milyon dollardan çox qiymətləndirir.
Ən bahalı lotlar arasında Vinsent van Qoqun 180 milyon dollar dəyərində olan "Çiçəklənən şabalıd ağacları" (1890) və Sezannın "Arlekin" (150 milyon dollar) əsərləri var. "Çiçəklənən şabalıd ağacları" əsəri Van Qoqun Sen-Remi klinikasından çıxdıqdan sonra Over-sür-Uazda işlədiyi son dövrlərə gedib çıxır. Əsər əvvəllər rəssamın qardaşı Teoya, daha sonra isə amerikalı prodüser Corc Qard "Baddi" DeSilvaya məxsus idi. Bu, Overdə yaradılan və şəxsi əllərdə qalan səkkiz rəsm əsərindən biridir.
Sotheby's İmpressionist və Müasir İncəsənət Departamentinin keçmiş direktoru Filip Hukun sözlərinə görə, kolleksiyanın bazara açılması tarixi andır: əsərlərin əhəmiyyətli bir hissəsi uzun müddət şəxsi əllərdə olub və sərgilənməyib. Hərrac evinin baş incəsənət məsləhətçisi Saymon Şou kolleksiyanı "qapılarını ilk dəfə ictimaiyyətə açan miniatür Orsey Muzeyi" kimi təsvir edib.
Rəsm əsərləri iki gün Londonda sərgilənəcək, daha sonra Taybey, Honkonq və Parisə göndəriləcək. Hərracın noyabrın 18-də Nyu Yorkda keçirilməsi planlaşdırılır.
Rizvan CƏFƏROV,
"Azərbaycan"
jpg_1790976482.jpg)
