Azərbaycan İdman Jurnalistləri Assosiasiyasının (AİJA) dəstəyi ilə həvəskarlar arasında təşkil olunan və Əsasnaməsi Azərbaycan Voleybol Federasiyası tərəfindən təsdiqlənən 4-cü ənənəvi Tüklə Voleybol Liqası uğurla başa çatdı.
Ümummilli Lider Heydər Əliyevin əziz xatirəsinə həsr olunmuş yarışın təntənəli bağlanış mərasimində Azərbaycan Respublikasının Dövlət Himni səsləndirildikdən sonra, Ulu Öndərin və şəhidlərimizin əziz xatirəsi bir dəqiqəlik sükutla yad edildi.
Turnirin final mərhələsinin açılış mərasimində təşkilatçılar və fəxri qonaqlar bu liqanın əsas məqsədinin həvəskar voleybolun inkişafına töhfə vermək, sağlam həyat tərzini təşviq etmək və voleybolsevərləri bir araya gətirmək olduğunu vurğuladılar. Bildirildi ki, bu ilin may ayından 9 komanda ilə start götürən 4-cü Tüklə Voleybol Liqası bu mövsüm də maraqlı və gərgin mübarizə ilə yadda qalacaq..
Final mərhələsinin nəticələrinə əsasən qaliblər müəyyənləşib:
• I yer – Kidol VK
• II yer – Qartal VK
• III yer – Zəfər VK
Biləcəridəki Murov Az Terminal İdman Kompleksində baş tytan bağlanış mərasimində qalib və mükafatçılar kubok, medal və diplomlarla təltif olunublar. Eyni zamanda liqanın uğurla təşkilində əməyi olan təşkilatçılara, hakimlərə, komandalara və yarış boyunca komandaları dəstəkləyən azarkeşlərə təşəkkürlər ifadə olundu.
AİJA prezidenti, əməkdar jurnalist Eldar İsmayılov:
– Azərbaycan İdman Jurnalistləri Assosiasıyasının patronajlığı ilə dördüncü mövsümünü uğurla başa vuran Tüklə Voleybol Liqası qısa müddətdə həvəskar voleybolun ənənəvi turnirlərindən birinə çevrilərək idmansevərlərin böyük marağını qazanıb. Voleybolun kütləviliyini artırmaq, yeni idmançıların üzə çıxarılmasına dəstək vermək və sağlam rəqabət mühitini təşviq etmək Tüklə Voleybol Liqasının prioritetidir.
Qeyd edək ki, Tüklə Masallı rayonununda adi bir kənddir və zəngin voleybol ənənəsi var. Bu gün artıq Tüklə Voleybol Liqası kənd səviyyəsindən pərvazlanaraq ölkə üzrə maraqlı Liqaya çevrilib.
