Məsələ prezidentlər səviyyəsində müzakirə olunub
Paraqvaylı senator Selesta Amarilya Fransa millisinin hücumçusu Kilian Mbappe ilə münaqişəsi barədə yenidən danışıb.
"Oxuya bilirsə, məktubumu oxumasını və paraqvaylılarla ehtiyatlı olmasını məsləhət görərdim. Ronaldinyo artıq burada həbsdə olub və Mbappe mənim kim olduğumu bilməlidir. Mən onu genderəsaslı və siyasi zorakılığa görə məhkəməyə verə bilərəm. O, məndən üzr istəməlidir", - deyə Amarilya ABC Cardinal radiostansiyasının verilişində bildirib.
Xatırladaq ki, matç zamanı mübahisə baş verib, lakin oyunçuları tez ayırıblar. Ancaq oyundan sonra paraqvaylı senator Selesta Amarilya vəziyyətə reaksiya verib. Paraqvaylı bir rəsmi sosial mediada paylaşdığı mesajda Mbappeni varlanan və fransız kimi görünmək istəyən təkəbbürlü, müstəmləkə edilmiş kamerunlu adlandırıb. O, həmçinin əlavə edib ki, fransızlar təsadüfən qalib gəliblər.
Amarilya özünün X kanalında yazıb: "Komandamızın ittiham edilə biləcəyi yeganə şey, final fitindən sonra heç kimin ona sillə vurmamasıdır".
Mbappe də cavab olaraq Selesta Amarilyanı nifrətə layiq qadın adlandırıb: "Sizin ağılsızlığınız və açıq-aşkar irqçiliyiniz üzündən dünya artıq oyunçularınızın bu Dünya Kubokunda göstərdiyi yolu və tarixi səyləri unudub və onların yerinə ölkəsinin ən pis imicini yaradan səriştəsiz bir qadın gəlib. Mən heç vaxt belə insanların nifrət və irqçiliyini bütün dünyada yaymasına icazə verməyəcəyəm".
Bu arada, Fransa Futbol Federasiyası senatorun şərhlərindən sonra prokurorluğa şikayət ərizəsi verib və Paraqvay Prezidenti Santyaqo Penya Palasios Selesta Amarilyanın dediklərinə görə üzr istəmək üçün Fransa Prezidenti Emmanuel Makronla əlaqə saxlayıb.
Rizvan CƏFƏROV,
"Azərbaycan"
