"Siyasətimizin mərkəzində Azərbaycan vətəndaşı dayanır"
Yola saldığımız 2025-ci ildə dövlətimizin sosial siyasətinin nəticələri necə olub. Bu il əhalinin sosial rifah halının daha da yaxşılaşdırılması üçün hansı layihələr həyata keçiriləcək. Prezident İlham Əliyev yerli televiziya kanallarına müsahibəsində bu məsələdən də bəhs edib.
Dövlətimizin başçısı sosial məsələnin həmişə siyasətimizin ana xəttini müəyyən edən istiqamət olduğunu bir daha vurğulayıb: "Mən uzun illərdir deyirəm və bunu əməli işlərdə də biz görürük ki, siyasətimizin mərkəzində Azərbaycan vətəndaşı dayanır. Bu, sadəcə olaraq, şüar deyil. Bizim bütün siyasətimiz həm sosialyönümlüdür, həm də ki, investisiyayönümlüdür. Hər ikisi arasında çox həssas balans, tarazlıq olmalıdır. Əgər olmasa, onda heç bir ölkə uğur qazana bilməz, bu birincisi. İkincisi, həmişə çalışmışam və bu gün də çalışıram populizmdən uzaq olum və mümkün olmayan vədləri verməyim. Mümkün olan inkişafla bağlı Azərbaycan ictimaiyyətini müntəzəm olaraq məlumatlandırıram. Əgər son 20 ilin statistikasına baxsaq, təkcə onu demək kifayətdir ki, minimum əməkhaqqı Azərbaycanda 40 dəfədən çox artıb. Düzdür, ilkin baza çox aşağı idi, amma bu artım da əldə edilmiş vəsait hesabına mümkün olmuşdur".
Bu istiqamətdə qazanılan nailiyyətlər aparılan iqtisadi islahatların, həyata keçirilən neft-qaz layihələrinin, bir sözlə, iqtisadi gücün artması, maddi imkanların çoxalması nəticəsində mümkün olub. Dövlət əldə edilən gəlirləri, ilk növbədə, sosial sahəyə yönəldir. Torpaqlarımız işğal altında olarkən 300 mindən çox köçkün yeni evlərlə, mənzillərlə təmin edildi, 100-dən çox şəhərcik salındı.
Təkcə bir faktı xatırlatmaq kifayətdir ki, son 7 il ərzində 5 sosial islahat paketi icra olunub. Bu islahatlar 4 milyon insanı əhatə edib və təqribən 8 milyard manata yaxın olan vəsait təşkil edib. Təkcə keçən il bu məqsədlər üçün 1,4 milyard büdcə vəsaiti xərclənib. Başqa sözlə, maaşlar, pensiyalar, müavinətlər müntəzəm olaraq artırılır, pensiyalar indeksləşdirilir.
Prezident gələcəkdə sosial sahəyə daha çox vəsait ayrılacağını da bildirib: "Əlbəttə, istərdik ki, daha da çox olsun. Amma bir atalar sözü var: "Gərək ayağını yorğanına görə uzadasan". Yenə də deyirəm, biz heç vaxt populizmlə məşğul olmamışıq, heç vaxt həlli mümkün olmayan vədlər verməmişik, heç vaxt gələcək nəsilləri borca salmaq üçün haradansa böyük məbləğdə pul alıb onu paylamamışıq. Biz strateji inkişafla bağlı tam, necə deyərlər, aydın mənzərəyə sahibik. Ona görə ölkə iqtisadiyyatı inkişaf etdikcə, ölkənin valyuta ehtiyatları artdıqca, əlbəttə ki, sosial sahəyə daha da böyük vəsait ayrılacaq".
Ölkəmizdə yeni iş yerlərinin yaradılması daimi bir prosesdir. Yeri gəlmişkən, Dövlət Statistika Komitəsinin təqdim etdiyi bir neçə rəqəmi misal gətirək. Təkcə keçən ilin 9 ayı ərzində Azərbaycanda 77,7 min yeni iş yeri yaradılıb. Bunlarin 91,4 faizi qeyri-dövlət sektorunda açılıb. Yeni iş yerləri iqtisadi rayonların hamısında, həm yeni, həm də mövcud müəssisə və təşkilatlarda yaradılıb.
Əhalinin işlə təmin olunması sahəsində özünüməşğulluq da özünə geniş yer alır. Özünüməşğulluq vətəndaşlar üçün əlverişli qazanc formasıdır. Belə ki, hər ailənin öz büdcəsi olur, bunun sayəsində də insanlar müəyyən iş qura bilirlər. Əlbəttə, dövlətin köməyi ilə. Bu proqram insanların dolanışığını yaxşılaşdırmaqla yanaşı, iqtisadi inkişafa təkan verir. Əhalinin məşğulluğunun təmin olunması istiqamətində atılan uğurlu addımlardan biri də ictimai iş yerlərinin yaradılmasıdır.
Dövlətimizin başçısı sözügedən müsahibədə də bu mövzudan bəhs edib: "Biz bir neçə ildir ki, özünüməşğulluq proqramı ilə məşğuluq, əgər belə demək mümkündürsə və 100 mindən çox insan bu proqramla əhatə olunub. Yəni cəmiyyətdə ələbaxımlılıq olmamalıdır. Bunu tam aradan qaldırmışıq? Yox, yenə də var. İş yerləri yaradılır, o cümlədən Qarabağ və Şərqi Zəngəzur da böyük tikinti meydançasıdır. Yəni işləmək istəyən Azərbaycanda özü üçün iş tapa bilər, ya inşaatda, ya kənd təsərrüfatında, ya başqa sahələrdə. İşsizlik aşağı səviyyədədir, ancaq işsizlər var və bu, hər bir ölkədə var. İnkişaf etmiş ölkələrdə bizdən də böyük faizlə ölçülən işsizlik var. Amma mənim sözüm odur ki, bu gün Azərbaycan kimi ölkədə, geniş imkanları olan ölkədə iş tapmaq o qədər də çətin məsələ deyil. Sadəcə olaraq, bəziləri bəlkə də onlara təklif olunan işlərlə razı deyillər, ona görə iş axtarmağa davam edirlər. Özünüməşğulluq proqramı işsizliyin böyük hissəsini faktiki olaraq aradan qaldırır və bu insanlara verilən vasitələrlə onlar öz ailə büdcələrini təmin edə bilərlər".
Onu da qeyd edək ki, Prezident İlham Əliyevin tapşırığı ilə özünüməşğulluq proqramlarının icrası zamanı şəhid ailələrinə və qazilərə üstünlük verilir. Yeri gəlmişkən, son illərdə 16 min şəhid ailəsi və müharibə əlili, onların ailələri dövlət tərəfindən mənzillə təmin olunub.
"Burada da Azərbaycan qədər bu sahəyə diqqət yetirən ikinci ölkə yoxdur. Müharibələr olub, İkinci Dünya müharibəsi, ondan sonrakı müharibələr. Mən bilmirəm hansı ölkədə şəhid olanlara dövlət tərəfindən mənzillər verilir, bəlkə verilir, amma mən bilmirəm, eşitməmişəm. Minik avtomobilləri verilir. Biz müharibə zamanı əlil olmuş hərbçiləri dövlət tərəfindən ən müasir protezlərlə təmin etmişik. Beş yüzdən çox insan protezlərlə təmin edilib və normal həyata qayıdıblar. Bu, ən son model protezlərdir. Müntəzəm olaraq onlara xidmət göstərilməlidir, dəyişdirilməlidir. Çünki bunu fizioloji nöqteyi-nəzərdən dəyişməyə ehtiyac var. Əlbəttə, biz bunu edirik, o insanlar qarşısında bizim vətəndaşlıq borcumuzdur", - deyə dövlətimizin başçısı bəyan edib.
Çoxsaylı sosial infrastruktur layihələrinin həyata keçirilməsi də dövlətimizin sosial-iqtisadi siyasətinin mühüm və ayrılmaz bir hissəsidir. Son 20 il ərzində Azərbaycanda 3 min 600 məktəbin, yüzlərlə xəstəxananın tikildiyini və əsaslı təmir edildiyini xatırlatmaq kifayətdir.
Prezidentimiz bu dəfə də deyib ki, iqtisadiyyatımız nə qədər artsa, ilk növbədə, o qədər də sosial məsələlərə diqqət yetiriləcək və maliyyə ayrılacaq. Deməli, dövlətimizin siyasətinin mərkəzində həmişə olduğu kimi, yenə də Azərbaycan vətəndaşı dayanır.
Flora SADIQLI,
"Azərbaycan"
jpg_1767867655.jpg)
jpg_1767211798.jpg)
