Dekabrın 10-da Mədəniyyət Nazirliyinin təşkilatçılığı ilə Heydər Əliyev Mərkəzində "Mədəniyyət və Hüquq: Müasir çağırışlar" adlı elmi-praktik forum panel sessiyalarla davam edib.
AZƏRTAC xəbər verir ki, "Azərbaycan Respublikasının Konstitusiyası və mədəni dəyərlərimiz" mövzusunda keçirilən paneldə moderator ADA Universitetinin Hüquq fakültəsinin dekanı Rəşad İbadov olub.
Paneldə Azərbaycan Respublikası ədliyyə nazirinin müavini Toğrul Hüseynov, Azərbaycan Respublikası Dövlət Təhlükəsizliyi Xidmətinin Heydər Əliyev adına Akademiyasının rəisi Elşad Nəsirov, Bakı Dövlət Universitetinin Hüquq fakültəsinin İnsan hüquqları və informasiya hüququ üzrə UNESCO kafedrasının müdiri, Vəkillər Kollegiyası üzvü Turqay Hüseynov, Bakı Dövlət Universitetinin Hüquq fakültəsinin dekanı, dosent Zaur Əliyev, Hüquqi Ekspertiza və Qanunvericilik Təşəbbüsləri Mərkəzinin icraçı direktoru Samir Mahmudov, Azərbaycan Respublikası Mədəniyyət Nazirliyinin Hüquq şöbəsinin müdiri Gülər Mikayılova çıxış ediblər.
Panel çərçivəsində müasir çağırışların hüquqi aspektləri, milli irsin qorunması və mədəniyyətin dövlət siyasətində rolu ətrafında geniş və çoxşaxəli müzakirələr aparılıb.
Natiqlər qeyd ediblər ki, Azərbaycanın Konstitusiyasına əsaslanan hüquqi norma və prinsiplər ölkəmizin mədəni dəyərlərinin qorunması, inkişafı və gələcək nəsillərə ötürülməsi üçün möhkəm zəmin yaradır. Bu baxımdan, mədəniyyət sahəsində dövlət siyasətinin daha çevik, daha funksional və qlobal tendensiyalara uyğun şəkildə qurulmasının vacibliyi vurğulanıb.
Müzakirələr zamanı xüsusilə mədəni irsin qorunması istiqamətində qəbul edilən qanunvericilik aktlarının icrası, bu sahədə idarəetmə mexanizmlərinin təkmilləşdirilməsi və beynəlxalq təcrübənin tətbiqi məsələləri diqqət mərkəzində olub.
Eyni zamanda çıxış edənlər mədəniyyətin müasir çağırışları ilə bağlı məsələlərə də toxunublar. Qloballaşma, rəqəmsallaşma və informasiya axınlarının sürətlənməsi fonunda mədəni irsin qorunmasının yeni hüquqi yanaşmalar tələb etdiyi bildirilib. Bu kontekstdə həm dövlət qurumlarının, həm də müstəqil ekspertlərin birgə fəaliyyətinin vacibliyi önə çəkilib.
jpg_1769169916.jpg)
