Azərbaycan xalqının XX əsrdə yetirdiyi ən böyük dövlət xadimlərindən biri, müasir, müstəqil Azərbaycan dövlətinin qurucusu və memarı, Ulu Öndər Heydər Əliyevin Anım Günü xalqımız üçün dərin ehtiram və sonsuz minnətdarlıq hissi ilə qeyd olunur. Onun zəngin siyasi irsi, uzaqgörən dövlətçilik fəlsəfəsi və misilsiz xidmətləri Azərbaycan tarixində silinməz iz qoymuş, milli istiqlal ideyasının əbədiyyətə qovuşmasına zəmin yaratmışdır.
Heydər Əliyev şəxsiyyəti yalnız bir siyasi lider obrazı deyil, bütövlükdə bir xalqın taleyinə istiqamət verən, tarixin axarını dəyişən fenomen kimi qiymətləndirilir. O, XX əsrin mürəkkəb və ziddiyyətli geosiyasi prosesləri fonunda Azərbaycanı qorumağı, möhkəmləndirməyi və dünyaya tanıtmağı bacaran nadir şəxsiyyətlərdən biri olmuşdur.
Ulu Öndər Heydər Əliyev 10 may 1923-cü ildə Naxçıvan şəhərində dünyaya göz açmışdır. Onun dövlət idarəçiliyinə yüksəlişi asan olmamış, gərgin zəhmət, prinsipiallıq və böyük iradə sayəsində gerçəkləşmişdi. O, təhlükəsizlik orqanlarında başladığı fəaliyyət yolunu respublika rəhbərliyinə, daha sonra isə SSRİ rəhbərliyinin ən yüksək pillələrinə qədər davam etdirmişdir.
1969-cu ildə Azərbaycan SSR-in rəhbəri seçilən Ulu Öndər Heydər Əliyev respublikanın sosial-iqtisadi, elmi və mədəni həyatında əsaslı dönüş yaratmışdı. Məhz onun uzaqgörən siyasəti nəticəsində Azərbaycan qısa müddətdə sənaye, kənd təsərrüfatı, təhsil, mədəniyyət və elmi sahələrdə sürətli inkişaf mərhələsinə qədəm qoymuşdu. Milli kadrların formalaşdırılması, Azərbaycan dilinin, milli-mənəvi dəyərlərin qorunması istiqamətində atılmış addımlar gələcək müstəqillik yolunun əsasını təşkil etmişdi.
1990-cı illərin əvvəllərində Azərbaycan müstəqilliyini bərpa etsə də, ölkə anarxiya, siyasi böhran, iqtisadi tənəzzül və vətəndaş qarşıdurması təhlükəsi ilə üz-üzə qalmışdı. Ermənistanın Azərbaycana qarşı apardığı işğalçı siyasət nəticəsində torpaqlarımızın bir hissəsi zəbt edilmiş, bir milyondan artıq insan qaçqın və məcburi köçkün vəziyyətinə düşmüşdü.
Belə bir ağır vaxtda xalq çıxış yolunu Ulu Öndər Heydər Əliyevin simasında gördü. 1993-cü ildə xalqın təkidli tələbi ilə yenidən hakimiyyətə qayıdan Ulu Öndər ölkəni dağılmaqdan xilas etdi, tez bir zamanda sabitliyi və ictimai asayişi təmin etdi, nizami ordu quruculuğuna başladı və dövlətçilik institutları yaratdı.
1994-cü ildə "Əsrin müqaviləsi"nin imzalanması ilə Azərbaycan dünya enerji bazarına çıxış əldə etdi, ölkəyə milyardlarla dollar sərmayə cəlb olundu. Bu həm iqtisadi dirçəlişin, həm də siyasi müstəqilliyin möhkəmlənməsində mühüm rol oynadı. Ulu Öndərin əsas məqsədi Azərbaycanın uzunmüddətli müstəqilliyini təmin edən güclü, dayanıqlı dövlət qurmaq idi.
Ulu Öndər Heydər Əliyevin əsas xidmətlərindən biri də azərbaycançılıq ideologiyasının sistemli şəkildə formalaşdırılmasıdır. O, azərbaycanlı kimliyini milli birliyə çevirməyi bacardı. Onun üçün dövlətin ali dəyəri insan, xalq və onun gələcəyi idi. Gənclərin vətənpərvərlik ruhunda tərbiyəsi, milli irsin qorunması, dil və mədəniyyətin inkişafı onun siyasi kursunun əsas dayaqlarından birinə çevrildi.
Bu gün Azərbaycanın müstəqil siyasət yürütməsi, beynəlxalq arenada nüfuz qazanması, öz sözünü qətiyyətlə deməsi, regional güc mərkəzinə çevrilməsi Ulu Öndər tərəfindən müəyyən edilən strateji yol xəritəsinin nəticəsidir.
Ulu Öndərin siyasi kursu bu gün Azərbaycan Respublikasının Prezidenti cənab İlham Əliyev tərəfindən uğurla davam etdirilir. Onun rəhbərliyi ilə Azərbaycan iqtisadi, siyasi və hərbi baxımdan daha da güclənmişdir. Buna görədir ki, ölkəmiz 2020-ci ildə 44 günlük Vətən müharibəsində tarixi Qələbə qazanaraq ərazi bütövlüyünü və suverenliyini tam bərpa etmişdir. Bu zəfər, əslində, Ulu Öndər Heydər Əliyevin illər öncə qoyduğu güclü dövlətçilik təməlinin, güclü ordu və milli ruh strategiyasının məntiqi nəticəsi oldu.
Ulu Öndər Heydər Əliyev 12 dekabr 2003-cü ildə dünyasını dəyişsə də, onun ideyaları, əməlləri və qurduğu dövlətçilik fəlsəfəsi bu gün yaşayır və gələcək nəsillərə ötürülür. Ümummilli Liderin adı Azərbaycan tarixinin ən parlaq səhifəsinə həkk olunub.
Ulu Öndər Heydər Əliyev əbədiyaşar lider, müasir Azərbaycanın memarıdır. Azərbaycan xalqı üçün Ulu Öndər yalnız bir dövlət başçısı deyil, bir xilaskar, bələdçi, ümid simvolu olub. Onun xatirəsi daim ehtiramla anılır, yolu və ideyaları gələcək nəsillər üçün örnək olaraq qalır.
Nicat İSMAYILOV
