Aqrar Xidmətlər Agentliyinin sədri Sərdar Hacıyev Lənkəran Dövlət Universitetinə səfər edib. Səfər çərçivəsində universitet rəhbərliyi ilə keçirilən görüşdə aqrar təhsil, elmi tədqiqatlar, innovativ texnologiyaların tətbiqi və kənd təsərrüfatı sahəsi üçün yüksəkixtisaslı kadr hazırlığının inkişaf perspektivləri müzakirə olunub.
Səfərin əsas məqsədi universitetin aqrar istiqamətlər üzrə mövcud elmi-praktiki bazası ilə tanış olmaq, tədris prosesində istifadə olunan infrastrukturun imkanlarını qiymətləndirmək, eləcə də gələcək əməkdaşlıq perspektivlərini müzakirə etmək olub.
Proqram çərçivəsində agentliyin sədri universitetin Baytarlıq Klinikasında yaradılmış şəraitlə yaxından tanış olub. Klinikada fəaliyyət göstərən süni mayalanma, rentgen, cərrahiyyə, diaqnostika, müayinə və digər ixtisaslaşmış otaqlara baxış keçirilib, burada tətbiq olunan müasir avadanlıqlar və laboratoriya imkanları barədə ətraflı məlumat verilib. Bildirilib ki, klinika tələbələrin nəzəri biliklərinin praktik bacarıqlarla möhkəmləndirilməsinə, eyni zamanda regionda baytarlıq xidmətlərinin keyfiyyətinin artırılmasına mühüm töhfə verir.
Daha sonra Sərdar Hacıyev universitetin Aqronomluq ixtisası üzrə təhsil alan tələbələrinin praktiki hazırlıq keçdiyi təcrübə sahələrinə baş çəkib. Burada sitrus bağları, ting yetişdirilməsi sahələri və tələbələrin bitkiçilik istiqamətində əldə etdikləri praktik bilik və bacarıqlar nümayiş etdirilib. Qeyd olunub ki, bu cür təcrübə sahələri tələbələrin müasir aqrotexniki yanaşmaları yerində mənimsəməsinə, istehsalat prosesinə daha yaxından inteqrasiya olunmasına və gələcək peşə fəaliyyətinə hazırlığının gücləndirilməsinə xidmət edir.
Görüş zamanı kənd təsərrüfatı sahəsində ixtisaslı kadr hazırlığının daha da təkmilləşdirilməsi, tələbələrin praktik bilik və bacarıqlarının artırılması, elmi tədqiqatların istehsalatla əlaqələndirilməsi, təcrübə proqramlarının genişləndirilməsi və birgə layihələrin həyata keçirilməsi istiqamətində fikir mübadiləsi aparılıb.
Tərəflər Aqrar Xidmətlər Agentliyi ilə Lənkəran Dövlət Universiteti arasında gələcəkdə baytarlıq, aqronomluq və digər kənd təsərrüfatı istiqamətləri üzrə birgə təlimlərin, elmi-praktiki tədbirlərin, təcrübə proqramlarının və innovativ layihələrin həyata keçirilməsinin əhəmiyyətini vurğulayıblar. Bildirilib ki, belə əməkdaşlıqlar müasir bilik və texnologiyaların tətbiqinə, peşəkar mütəxəssis hazırlığının gücləndirilməsinə və ölkənin aqrar sektorunun davamlı inkişafına mühüm töhfə verəcək.
Seyran CAVADOV,
"Azərbaycan"
