Bişkekdə keçirilən Şanxay Əməkdaşlıq Təşkilatının (ŞƏT) sammiti Türk dünyasının nüfuzunu nümayiş etdirmək, Azərbaycan ilə Türkiyə arasındakı qardaşlıq və dostluğun sarsılmazlığını göstərmək üçün növbəti “fürsət pəncərəsi” olub.
Bu fikirləri Türkiyənin Kayseri Universitetinin rektoru, professor Kurtuluş Karamustafa AZƏRTAC-a müsahibəsində deyib.
O, ŞƏT-i gələcək dünya nizamının formalaşdırılması üçün mühüm dialoq platforması adlandırıb. “Pekindən Moskva, Yeni Dehli və İslamabada qədər uzanan ŞƏT məkanında dünya əhalisinin 40 faizədək hissəsi yaşayır və dünya iqtisadiyyatının mühüm bir hissəsi burada cəmləşib. Bu platforma sadəcə əməkdaşlıq formatı deyil, həm də qlobal proseslərin mərkəzidir”, – deyə rektor qeyd edib.
Onun sözlərinə görə, Prezident Rəcəb Tayyib Ərdoğanın rəhbərliyi ilə Türkiyə geosiyasi şahmat taxtasında üzərinə düşən tarixi məsuliyyəti dərk edir. Prezident Ərdoğanın uzaqgörən və qətiyyətli rəhbərliyi sayəsində Ankara təkcə öz regionunda deyil, qlobal miqyasda da oyunun qaydalarını dəyişmək iqtidarında olan və qəbul edilən güc mərkəzlərindən biri hesab olunur.
K.Karamustafa Ankaranın dost ölkələr üçün güclü tərəfdaş, rəqibləri üçün isə “çəkindirmə amili” olduğunu vurğulayıb.
“Türkiyənin Türk dünyası ilə yaxınlaşma siyasətində ən mühüm halqa dost Azərbaycandır. Prezident İlham Əliyevin qətiyyətli iradəsi və uzaqgörən rəhbərliyi sayəsində Azərbaycan bu gün təkcə Cənubi Qafqazın deyil, həm də Avrasiyanın taleyini müəyyən edən aktordur. 44 günlük müharibədə Qələbədən sonra regionda yaranmış yeni geosiyasi reallıq təkcə tarixi ədalətin bərqərar olmasının göstəricisinə deyil, həm də məzlum xalqlar üçün ümidə çevrilib”, – deyə o qeyd edib.
Rektor ŞƏT ölkələrini Avropa və Aralıq dənizi regionu ilə birləşdirən Orta Dəhlizin təməl daşının Azərbaycan olduğunu bildirib və Zəngəzur dəhlizinin strateji əhəmiyyətini vurğulayıb.
Universitetin rektoru qeyd edib ki, Ankara və Bakı arasındakı “Bir millət, iki dövlət” kəlamına əsaslanan qarşılıqlı fəaliyyət, o cümlədən nəqliyyat və enerji layihələri vasitəsilə Türk dünyasının konsolidasiyasına töhfə vermək üçün böyük potensiala malikdir.
“Şübhəsiz ki, Bişkekdə keçirilən ŞƏT sammiti regional təhlükəsizliyi gücləndirəcək, Avrasiyanın layiq olduğu daha ədalətli dünyanın qurulmasına stimul verəcək. Türkiyə və Azərbaycanın sarsılmaz həmrəyliyi isə bu məqsədə nail olunmasına töhfə olaraq qalır”, – deyə K.Karamustafa fikirlərini yekunlaşdırıb.
