Dekabrın 6-da Milli Məclisin Regional məsələlər komitəsinin iclası keçirildi. Komitənin sədri Arif Rəhimzadə iclasın gündəliyində duran məsələlər barədə məlumat verdikdən sonra "Azərbaycan Respublikasının İsmayıllı rayonunun inzibati ərazi bölgüsündə qismən dəyişikliklər edilməsi haqqında" qanun layihəsinə baxılmışdır. Bildirilmişdir ki, layihədə İsmayıllı rayonunun Mican kənd inzibati ərazi dairəsi və onun tərkibindəki Mican, Qəzli və İsmayıllı kəndləri ləğv edilərək İsmayıllı şəhərinin inzibati ərazisinə birləşdirilsin.
İclasda parlamentin komitə sədri A.Rəhimzadə "Gəncə şəhərinin Kəpəz rayonunun inzibati ərazi bölgüsündə qismən dəyişikliklər edilməsi haqqında" qanun layihəsi barədə də məlumat vermişdir. Bu layihədə rayonun inzibati ərazisində yeni salınmış yaşayış məntəqələri müvafiq olaraq Cavadxan, Məhsəti, Natəvan, Sadıllı, Şıxzamanlı adlandırılır. Yaşayış məntəqələrinə qəsəbə statusu verilir və həmin qəsəbələr dövlət reyestrinə daxil edilir.
Daha sonra "Xaçmaz rayonunun inzibati ərazi bölgüsündə qismən dəyişikliklər edilməsi haqqında" qanun layihəsi müzakirə olunmuşdur. Məlumat verilmişdir ki, Xaçmaz rayonunun Niyazoba və İlxıçı Həsən Əfəndi bələdiyyələrinin tərkibində dəyişiklik edilmişdir. İlxıçı kəndi Niyazoba bələdiyyəsinin tərkibindən çıxarılaraq İlxıçı Həsən Əfəndi bələdiyyəsinin tərkibinə daxil edilmişdir.
İclasda "Bələdiyyələrin əraziləri və torpaqları haqqında" Azərbaycan Respublikasının Qanununa əlavə edilmiş "Azərbaycan Respublikasında bələdiyyələrin siyahısı"nda dəyişikliklər edilməsi barədə" qanun layihəsinə də baxıldı.
Deputatlardan Fəttah Heydərov, Tahir Rzayev, Qalib Salahzadə və başqaları qanun layihələri ilə bağlı çıxış etdilər, rəy və təkliflərini bildirdilər.
Müzakirə olunan qanun layihələri Milli Məclisin plenar iclasına tövsiyə olundu.
"Azərbaycan"
