Çin 4 qlobal təşəbbüsün həyata keçirilməsində Azərbaycanla birgə fəaliyyət göstərərək hərtərəfli strateji tərəfdaşlığı daha da dərinləşdirməyə, dünya miqyasında sülhün, inkişafın və rifahın təmin olunmasına daha böyük töhfə verməyə hazırdır.
AZƏRTAC xəbər verir ki, bunu Çinin Azərbaycandakı səfiri Lu Mey noyabrın 6-da Bakıda keçirilən brifinqdə deyib.
Onun sözlərinə görə, Azərbaycan Çinin hərtərəfli strateji tərəfdaşı, eləcə də Çin Xalq Respublikasının Sədri Si Cinpinin irəli sürdüyü dörd qlobal təşəbbüsün praktiki həyata keçirilməsinin fəal tərəfdarı və iştirakçısıdır.
Diplomat xatırladıb ki, Azərbaycan Prezidenti İlham Əliyev Çin Xalq Respublikasının xarici işlər naziri Van İ ilə bu yaxınlarda keçirilən görüşdə Çin tərəfinin bir sıra qlobal təşəbbüslərinə hərtərəfli dəstəyini bir daha təsdiqləyib.
Lu Mey qeyd edib ki, son illər Çin və Azərbaycan bu təşəbbüslərin praktiki həyata keçirilməsi üzrə vəzifələri rəhbər tutaraq müxtəlif istiqamətlərdə əməkdaşlıq sahəsində yeni nəticələr əldə ediblər: “Xüsusilə, Qlobal İnkişaf Təşəbbüsü çərçivəsində iki ölkənin “Bir kəmər, bir yol” layihəsinin birgə qurulması istiqamətində qarşılıqlı fəaliyyəti davamlı olaraq dərinləşir, yaşıl enerji, rəqəmsal iqtisadiyyat, nəqliyyat və kommunikasiya əlaqələrinin qarşılıqlı bağlılığı sahələrində əməkdaşlıq genişlənir”.
Onun sözlərinə görə, bu, regionun dayanıqlı inkişafına yeni təkan verir.
Qlobal Təhlükəsizlik Təşəbbüsünə toxunan səfir vurğulayıb ki, tərəflər dövlət suverenliyinin, təhlükəsizliyin və ərazi bütövlüyünün qorunması istiqamətində bir-birinin səylərini qətiyyətlə dəstəkləyir, beynəlxalq və regional məsələlər üzrə fəaliyyətlərini əlaqələndirməyi gücləndirir, regionda sülhün və sabitliyin qorunmasına birgə töhfə verirlər.
Qlobal Sivilizasiya Təşəbbüsündən danışan Lu Mey iki ölkənin Böyük İpək Yolu dövrünə gedib çıxan tarixi və mədəni əlaqələrini qeyd edib.
Səfir, həmçinin Qlobal İdarəetmə Təşəbbüsü çərçivəsində Çin və Azərbaycanın BMT, Şanxay Əməkdaşlıq Təşkilatı, Asiyada Qarşılıqlı Fəaliyyət və Etimad Tədbirləri üzrə Müşavirə və digər çoxtərəfli mexanizmlər çərçivəsində sıx qarşılıqlı fəaliyyət göstərdiyini vurğulayıb.
“Tərəflər birtərəfli addımlara, proteksionizmə və güc siyasətinə qarşı birgə çıxış edir, həmçinin inkişaf etməkdə olan ölkələrin beynəlxalq məsələlərdə təmsilçiliyinin artırılmasını və sözünün daha güclü eşidilməsini dəstəkləyirlər”, – deyə Lu Mey qeyd edib.
314444444 - Copyjpg_1793831795.jpg)
