Azərbaycan və Türkiyə arasında təhsil və texnologiya sahəsində əməkdaşlığın mühüm istiqamətlərindən biri gənclərin müasir texnologiyalara yiyələnməsi və innovativ layihələrə cəlb olunmasıdır.
AZƏRTAC xəbər verir ki, bunu Bakı Türk Anadolu Liseyinin direktoru Abdullah Yılmaz Robotik kodlaşdırma laboratoriyasının açılış mərasimində çıxışı zamanı deyib. O bildirib ki, 2021-ci ildə Bakı Türk Anadolu Liseyinə gəldiyi zaman məktəbdə TİKA-nın dəstəyi ilə yaradılmış texnologiya laboratoriyaları ilə tanış olub və bu təşəbbüsdən məmnunluq duyub.
Abdullah Yılmaz qeyd edib ki, ötən il Azərbaycanda keçirilən 6 robotik yarışmada məktəbin şagirdləri 5 birincilik və 1 ikincilik əldə edərək Azərbaycanı Panama, ABŞ və beynəlxalq yarışlarda təmsil etmək hüququ qazanıblar. Şagirdlər hər il müxtəlif robotik yarışlarda uğurla iştirak edirlər.
Direktor texnologiya laboratoriyalarının yaradılmasında əməyi olan şəxslərə, TİKA-ya və Türkiyənin Azərbaycandakı səfirliyinə təşəkkürünü bildirib. O diqqətə çatdırıb ki, yeni açılan Əhmədli kampusunda da müasir tələblərə uyğun Robotik kodlaşdırma laboratoriyası yaradılıb. Laboratoriyada fəaliyyət göstərəcək proqram təminatı üzrə mütəxəssis məktəbin kollektivinə cəlb olunub.
Abdullah Yılmaz bildirib ki, yeni laboratoriyanın Azərbaycan və Türkiyə gənclərinin texnologiya, mühəndislik və proqramlaşdırma sahəsində inkişafına, gələcəyin mütəxəssislərinin hazırlanmasına töhfə verməsi nəzərdə tutulur.
Direktor laboratoriyanın yaradılmasında əməyi olan bütün qurumlara təşəkkürünü ifadə edib.
