Möhkəm milli-ideoloji təməl üzərində qurulan müstəqil Azərbaycan dövləti bu gün tarixinin ən qüdrətli və şanlı mərhələsini yaşayır. Müasir dövlətimizin qazandığı bütün uğurlar, o cümlədən ərazi bütövlüyümüzün və suverenliyimizin tam təmin olunması Ümummilli Lider Heydər Əliyev dühasının uzaqgörənliklə formalaşdırdığı ideoloji xəttin Prezident İlham Əliyev tərəfindən qətiyyətlə və ardıcıllıqla davam etdirilməsinin parlaq nəticəsidir. Azərbaycançılıq ideologiyası bu gün milli məntiqinə uyğun olaraq real tarixi nəticələr doğurub. Vətənimiz bütövləşib və xalqımız əbədi qürur zirvəsinə ucalıb.
Zəngin tarixi və elmi-fəlsəfi təməl
Azərbaycançılıq təsadüfi yaranmış bir məfkurə deyil. Bu ideologiya xalqımızın əsrlər boyu formalaşmış zəngin tarixi, elmi-fəlsəfi düşüncəsi və dövlətçilik ənənələri üzərində bərqərar olub. Azərbaycançılıq ideologiyasının mahiyyəti milli kimliyimizi, ana dilimizi, mədəniyyətimizi, adət-ənənələrimizi qorumaqla yanaşı, dövlət müstəqilliyini hər şeydən üstün tutmaqdan ibarətdir. Ən əsası o, birləşdirici, qurucu və gələcəyə hədəflənmiş ideoloji sistemdir.
Ulu Öndər Heydər Əliyevin ölkəmizə rəhbərliyi dövründə bu ideologiya dövlət səviyyəsində sistemləşdirildi. Bu vacib addım da göstərdi ki, müstəqil Azərbaycanın yaşaması və möhkəmlənməsi üçün vahid, hamını öz ətrafında birləşdirən ideoloji dayaq mütləqdir. Ulu Öndər uzaqgörənliklə sübut etdi ki, milli həmrəylik yalnız çağırışlarla deyil, elmi və siyasi konsepsiya ilə təmin olunmalıdır. Dahi şəxsiyyət azərbaycançılığı sadəcə bir nəzəriyyə kimi deyil, müstəqil dövlətçiliyimizin ana xətti kimi tətbiq etdi.
Azərbaycançılıq ideologiyasının ən böyük gücü onun fərqliliyə hörmət və bərabərliyi özündə ehtiva etməsindədir. Məhz bu yanaşmaya görə bu ideologiya ölkəmizdə əsrlər boyu yan-yana, bir ailə kimi yaşayan bütün azsaylı xalqları, etnik və dini azlıqları vahid çətir altında birləşdirib.
Oktyabrın 27-də Bakıda “Ortaq gələcək naminə dialoq” mövzusunda VII Ümumdünya Mədəniyyətlərarası Dialoq Forumunun açılış mərasimində Prezident İlham Əliyev çıxışında bu vacib məqama belə vurğu edib: “Əsrlər boyu Azərbaycan Asiya ilə Avropa arasında mədəniyyət körpüsü olub. Multikulturalizm ənənələri, dini və etnik dözümlülük xalqımızın əsrlər boyu yaşatdığı meyarlar olub və biz onları yüksək dəyərləndiririk. Azərbaycanın uğurlu və sabit inkişafının təməlində dayanan əsas səbəblərdən biri isə cəmiyyətimizdəki ahəngdarlıqdır. Bütün etnik qrupların, dinlərin nümayəndələrinin Konstitusiyamıza uyğun olaraq, nəinki bərabər hüquqları var, onlar, həmçinin bir ailə kimi yaşayırlar”.
Ölkəmizin rəhbəri əlavə edib ki, hamımız milli ideyalar ətrafında birləşirik: “Onlardan biri azərbaycançılıqdır. O, Azərbaycandakı bütün xalqları bir araya gətirir. Bu birlik müstəqillik tariximizin ən ağır vaxtlarında özünü göstərib. Ermənistanın hərbi təcavüzü və işğalı, həmçinin İkinci Qarabağ müharibəsi zamanı bütün etnik və dini qrupların nümayəndələri özünəməxsusluğumuzu qorumaq, ədaləti müdafiə etmək və ərazi bütövlüyümüzü bərpa etmək üçün Qələbəmizin rəmzi olan “Dəmir yumruq” kimi vuruşdular”.
“...Hamımız birlikdə azərbaycançılığı yaşadacağıq, daimi edəcəyik, əbədi edəcəyik”
Ümummilli Lider Heydər Əliyev dünya azərbaycanlılarının harada yaşamasından asılı olmayaraq milli mənafelərə xidmət etməli olduqlarını dəqiq müəyyənləşdirərək diaspor quruculuğunu dövlət siyasətinin mühüm istiqamətinə çevirdi. Xarici ölkələrə səfərləri zamanı soydaşlarımızla görüşən dahi lider onları təşkilatlanmağa çağırırdı. Harada doğulmasından asılı olmayaraq hər bir soydaşımızın azərbaycanlı kimliyini, ana dilini yaşatmasının vacibliyini vurğulayırdı.
2001-ci il noyabrın 9-da Bakıda keçirilən Dünya Azərbaycanlılarının I Qurultayı bu prosesin tarixi kulminasiya və dönüş nöqtəsi oldu. Ulu Öndər tarixi qurultayda üzünü həmvətənlərimizə tutub deyirdi ki, müstəqil Azərbaycan dövləti gənc olduğu kimi, Azərbaycanın həmrəyliyi də, dünya azərbaycanlılarının birliyi də, müxtəlif ölkələrdəki Azərbaycan icmaları da gəncdirlər: “Ancaq indi biz yeni bir mərhələyə keçmişik. Biz formalaşırıq, müstəqilliyimiz möhkəmlənir, xarici ölkələrdə yaşayan azərbaycanlılar daha sürətlə təşkilatlanır və bizim hamımız birlikdə azərbaycançılığı yaşadacağıq, daimi edəcəyik, əbədi edəcəyik”.
Ümummilli Lider xalqımızın, dövlətimizin parlaq zəfərlərlə bol xoş gələcəyinin həmrəyliyimiz, azərbaycançılıq ideyası ətrafında birləşməyimiz sayəsində mümkün olacağına qəti şəkildə əmin idi.
Əsasını Ulu Öndərin qoyduğu bu siyasi və ideoloji xətt Prezident İlham Əliyev tərəfindən yeni tarixi şəraitdə daha da zənginləşdirildi. Milli birliyimizin gücü 2020-ci ildə 44 günlük Vətən müharibəsində və 2023-cü ildə lokal xarakterli antiterror tədbirlərində özünün ən yüksək zirvəsinə çatdı.
Vətən müharibəsi zamanı ölkəmizdə yaşayan bütün etnik və dini qrupların nümayəndələri, eləcə də xaricdəki soydaşlarımız vahid amal uğrunda bir araya gəldilər.
Vətən müharibəsi dövründə diaspor təşkilatlarımızın dünyanın 30-dan çox ölkəsində keçirdikləri 200-dək aksiyada 25 mindən çox soydaşımız və dost xalqların nümayəndələri iştirak etdilər. Eyni zamanda müharibə günlərində 300-ə yaxın diaspor təşkilatı müxtəlif ölkələrin dövlət və hökumət rəhbərlərinə, parlament üzvlərinə, beynəlxalq təşkilatlara bəyanatlar, müraciətlər göndərdilər.
Ölkə daxilində isə xalqımız Müzəffər Ali Baş Komandanın ətrafında “dəmir yumruq” kimi birləşdi. Bu möhtəşəm birliyin nəticəsində 2020-ci ildə cəmi 44 günə şanlı Şuşa Zəfəri qazanıldı, 2023-cü ildə cəmi 23 saatlıq antiterror tədbirləri ilə Xankəndidə bayrağımız əbədi dalğalandırıldı və suverenliyimiz tam təmin olundu.
2023-cü il dekabrın 21-də keçirilən tarixi Qarabağ və MOİK oyunundan əvvəl Xankəndi stadionunda çıxış edən Qalib Lider İlham Əliyev Azərbaycanın qalibiyyət formulunu bu cür açıqladı: “Qarabağ-Ordu-Xalq birliyi bizim Zəfərimizin əsas mənbəyidir”.
Bəli, Azərbaycançılıq ideologiyası real tarixi nəticələr doğuran, torpaqlarımızı bütövləşdirən və xalqımızı qalib millətə çevirən qüdrətli güc mənbəyidir. Bu sarsılmaz birlik və ideoloji təməl var olduqca, müstəqil Azərbaycan dövləti daha da güclənəcək və gələcəyə doğru inamla addımlayacaq.
Yasəmən MUSAYEVA,
“Azərbaycan”
jpg_1793707743.jpg)
