Prezident İlham Əliyevin buna yönələn siyasəti ölkəmizi dünya arenasında önə çıxarır
Bu gün dünya geosiyasi qarşıdurmalarla dərindən silkələnir. Regional və qlobal miqyasda artan silahlı münaqişələr, qanlı müharibələr, siyasi böhranlar və təhlükəsizlik riskləri beynəlxalq münasibətlər sistemini demək olar ki, iflic vəziyyətinə salıb. Dünyanın bir çox bölgəsi "qaynar qazan"ı xatırladır. Bu mürəkkəb və təhlükəli proseslərin fonunda isə Azərbaycan sabitlik, inkişaf və sülh məkanı kimi ön plana çıxır. Hətta Azərbaycanın bilavasitə sərhədində, bir addımlığında yerləşən ölkələrin müharibə və xaos içərisində olduğunu nəzərə alsaq, respublikamızda hökm sürən sabitliyin və təhlükəsizliyin real dəyəri daha aydın görünür. Azərbaycan artıq təkcə öz vətəndaşları üçün deyil, region üçün də təhlükəsizlik adasına çevrilib ki, bu da məqsədyönlü və uzaqgörən dövlət siyasətinin məntiqi nəticəsidir.
" ...Reallıq budur ki, bu gün bizim ölkəmiz sabitlik, inkişaf, tərəqqi məkanı kimi dünya miqyasında tanınır və bu adı biz öz əməyimizlə, zəhmətimizlə, düşünülmüş siyasətlə qazanmışıq", - deyə ötən ilin 24 iyununda Mingəçevirdə ölkəmizin enerji potensialını böyük dərəcədə gücləndirəcək
"8 Noyabr" Elektrik Stansiyasının açılış mərasimində, Prezident İlham Əliyev ölkəmizin sabitlik məkanı kimi dünya miqyasında tanınmasının, əldə olunmuş uğurların formulunu açıqlamışdı.
Sülh və əməkdaşlıq
Müstəqilliyini bərpa etdikdən sonra ağır sınaqlardan keçən Azərbaycan dövləti zamanla güclü siyasi iradə, milli birlik və strateji baxış ortaya qoyması sayəsində inkişaf yoluna qədəm qoydu. Bu yolun zirvə nöqtəsi isə 2020-ci ildə Qarabağda qazanılan tarixi Zəfər oldu. Uzun illər davam edən işğala hərb meydanında son qoyan ölkəmiz ərazi bütövlüyümüzü, dövlət suverenliyimizi tam təmin etdi. Qarabağ Zəfəri Azərbaycanı tarixinin ən qüdrətli mərhələsinə çatdırdı. Bu gün ölkəmiz siyasi, iqtisadi və hərbi baxımdan bölgənin aparıcı gücünə çevrilib. Ordu quruculuğunda əldə olunan nailiyyətlər, iqtisadi dayanıqlılıq, sosial rifahın yüksəlməsi və beynəlxalq nüfuzun artması Azərbaycanın güclü dövlət olduğunu açıq şəkildə göstərir.
Xüsusi vurğulanmalı məqamlardan biri də Azərbaycanın geostrateji mövqeyindən səmərəli istifadə etməsidir. Enerji və nəqliyyat layihələri ölkəmizi Şərqlə Qərbi, Şimalla Cənubu birləşdirən mühüm qovşağa çevirib. Bakı-Tbilisi-Ceyhan, "Cənub qaz dəhlizi", Bakı-Tbilisi-Qars dəmir yolu və Orta dəhliz kimi layihələr Azərbaycanın qlobal iqtisadi və siyasi əhəmiyyətini daha da artırıb. Təsadüfi deyil ki, dünyanın aparıcı dövlətləri, o cümlədən ABŞ, Çin kimi nəhəng siyasi-iqtisadi güclər Azərbaycanla əməkdaşlığa xüsusi maraq göstərirlər.
Qarabağ münaqişəsinin birdəfəlik həlli ilə Azərbaycan həm öz təhlükəsizliyini möhkəmləndirdi, həm də regionda dayanıqlı sülhün əsas təminatçısına çevrildi. Azərbaycan sülh istiqamətində atdığı real addımlarla Cənubi Qafqazda qarşıdurma yox, əməkdaşlıq, düşmənçilik yox, qarşılıqlı etimad mühitinin formalaşmasında maraqlı olduğunu ortaya qoydu.
Prezident İlham Əliyevin prinsipial mövqeyi, milli maraqlara əsaslanan qərarları və çevik diplomatik fəaliyyəti nəticəsində Azərbaycan regionun lider dövlətinə çevrilib. Dünyanın müxtəlif bölgələrində gərginliklərin artdığı bir vaxtda Cənubi Qafqazda sülh və əməkdaşlıq üçün yaranan real tarixi şərait məhz Azərbaycan liderinin düşünülmüş siyasətinin nəticəsidir.
Etibarlı vasitəçilik missiyası
Bu gün Azərbaycan münaqişə edən tərəflər arasında vasitəçilik missiyasını üzərinə götürməyə hazır olan etibarlı tərəfdaş kimi tanınır. Ölkəmiz sülh təşəbbüslərini dəstəkləyir, qonşularla münasibətlərdə qarşılıqlı hörmət və etimad prinsipinə sadiq qalır. Eyni zamanda ərazisindən üçüncü qüvvələrin istifadə edərək regionda yeni gərginlik ocaqları yaratmasına qətiyyətlə imkan vermir. Beynəlxal KİV-də ABŞ-nin qonşu İrana qarşı hərbi əməliyyatlara başlayacağına dair informasiyalar geniş yer alıb. Təbii ki, bu, İranın yaxın qonşusu olaraq Azərbaycanı da narahat edir, çünki hərbi toqquşmalar regiona yaxşı heç nə vəd etmir.
İranla mehriban qonşuluq əlaqələrinə malik Azərbaycan eyni zamanda ABŞ ilə səmimi dostluğa dayanan strateji tərəfdaşlıq qurub. Bu mənada adıçəkilən ölkələr arasında hərbi qarşıdurmanın olması arzuolunan deyil və tərəflərin ortaq məxrəcə gələrək aralarındakı problemləri dialoq yolu ilə həll etməsi məqsədəuyğundur. Bu prosesdə Azərbaycan uğurlu vasitəçi ola bilər. Bakının buna qədər də aralarında gərginlik olan müxtəlif ölkələr arasında barışdırıcılıq missiyası həyata keçirməsini göz önünə gətirdikdə, Azərbaycanın strateji rolu və etibarlı vasitəçiliyi bir daha ön plana çıxır.
Yanvarın 31-də Prezident İlham Əliyev İran Prezidenti Məsud Pezeşkiana zəng edən zaman dövlətimizin başçısı bölgədə yaranmış vəziyyətin narahatlıq doğurduğunu ifadə edərək, Azərbaycanın gərginliyin aradan qaldırılmasına töhfə verməyə hazır olduğunu bildirib və ölkəmizin bu kimi məsələlərin danışıqlar və qarşılıqlı anlaşma yolu ilə həllinin tərəfdarı olduğunu vurğulayıb.
Azərbaycanın xarici işlər naziri Ceyhun Bayramov ilə İranın xarici işlər naziri Seyid Abbas Əraqçi arasında yanvarın 29-da telefon danışığı zamanı İran ətrafında yaranmış vəziyyət müzakirə olunub.
Nazir Ceyhun Bayramov bölgədə son gərginliyin narahatlıq doğurduğunu, bütün tərəflərin İranda və onun ətrafında qeyri-sabitliyə səbəb ola biləcək addımlardan və ritorikadan çəkinmələrinin zəruriliyinin ölkəmiz tərəfindən hər zaman vurğulandığını bildirib. Mövcud problemləri yalnız beynəlxalq hüququn norma və prinsiplərinə uyğun olaraq, dialoq və diplomatik yollarla həll etməyin vacib olduğu qeyd edilib.
Azərbaycanın hava məkanının və ya ərazisinin hər hansı dövlət tərəfindən qonşu İrana və ya hər hansı digər ölkəyə qarşı hərbi əməliyyatların aparılması üçün istifadə edilməsinə heç vaxt imkan verilməyəcəyi xüsusi vurğulanıb.
Göründüyü kimi, bölgədə sabitliyin və təhlükəsziliyin təmin olunmasında maraqlı olan ölkəmiz daim sülhü təşviq edir, qarşılıqlı faydalı əməkdaşlığı əsas meyar kimi təqdim edir.
Bu gün dünya qeyri-müəyyənlik, münaqişə və təhlükəsizlik böhranları içərisində çabaladığı bir vaxtda Azərbaycan sabitliyin, təhlükəsizliyin və inkişafın real modeli kimi çıxış edir. Güclü siyasi iradə, milli maraqlara əsaslanan prinsipial mövqe və uzaqgörən dövlət siyasəti ölkəmizi regionda sülhün və etibarlı əməkdaşlığın əsas dayağına çevirib. Məhz bu amillər Azərbaycanın bu gün və gələcəkdə də təhlükəsizlik adası, sabitlik ünvanı və regionun aparıcı gücü olaraq qalacağını əminliklə deməyə əsas verir.
Yasəmən MUSAYEVA,
"Azərbaycan"
jpg_1770045900.jpg)
