Azərbaycanın Qoşulmama Hərəkatına dördillik uğurlu sədrliyi təşkilatın fəaliyyətində keyfiyyətcə yeni mərhələnin başlanğıcı kimi qiymətləndirilir. Sədrlik dövründə təşkilat formal platformadan çıxaraq qlobal problemlərin müzakirə edildiyi və konkret təşəbbüslərin irəli sürüldüyü mühüm beynəlxalq əməkdaşlıq mexanizminə çevrilib.
Bu sözləri AZƏRTAC-a açıqlamasında Milli Məclisin deputatı Azər Allahverənov deyib.
O qeyd edib ki, Azərbaycanın sədrliyi dövründə təşkilat BMT-dən sonra ən geniş təmsilçiliyə malik beynəlxalq platformalardan biri kimi daha fəal rol oynamağa başlayıb. Bu dövrün mühüm istiqamətlərindən biri COVID-19 pandemiyası zamanı vaksinlərin ədalətli bölüşdürülməsi məsələsinin beynəlxalq gündəliyə çıxarılması olub. Azərbaycan pandemiya dövründə vaksinlərin qeyri-bərabər paylanması problemini ardıcıl şəkildə qaldıraraq, inkişaf etməkdə olan ölkələrin maraqlarını müdafiə edib. Məhz Azərbaycanın təşəbbüsü ilə BMT Baş Assambleyasının COVID-19-la bağlı xüsusi sessiyası keçirilib və burada vaksin ayrı-seçkiliyinin aradan qaldırılması istiqamətində mühüm qərarlar qəbul olunub. Bu təşəbbüs xüsusilə Qlobal Cənub ölkələri tərəfindən geniş dəstək qazanıb.
“Azərbaycanın sədrliyi dövründə Qoşulmama Hərəkatının institusional inkişafı da diqqət çəkən istiqamətlərdən biridir. Bu çərçivədə Qoşulmama Hərəkatının Gənclər Təşkilatı və Qadınlar Platforması yaradılıb. Yeni platformalar gənclərin və qadınların beynəlxalq əməkdaşlıq proseslərində iştirak imkanlarını genişləndirib, həmçinin bu istiqamətlər üzrə çoxsaylı beynəlxalq tədbirlər təşkil edilib. Bu gün də həmin təsisatların fəaliyyəti davam etdirilir və təşkilatın işinə əlavə dinamizm qazandırır. Həmçinin Azərbaycan bu müddətdə Qlobal Cənub ölkələrinin səsinin beynəlxalq səviyyədə daha aydın eşidilməsinə imkan yaradaraq, təşkilatı həmin ölkələrin maraqlarını ifadə edən əsas platformalardan birinə çevirə bilib. Bu çərçivədə ətraf mühitin mühafizəsi, iqlim dəyişiklikləri, miqrasiya, yoxsulluq, dayanıqlı inkişaf və digər qlobal problemlər Qoşulmama Hərəkatının gündəliyində mühüm yer tutub. Azərbaycanın təşəbbüsləri nəticəsində bu məsələlər beynəlxalq ictimaiyyətin diqqətinə çatdırılıb və onların həlli istiqamətində çoxtərəfli əməkdaşlıq təşviq edilib.
Azərbaycanın təşəbbüsü ilə yaradılan Qlobal Cənub QHT Platforması da bu istiqamətdə mühüm addımlardan biri hesab olunur. Ötən ilin aprelində təsis olunan platforma 100-dən çox ölkənin qeyri-hökumət təşkilatlarını bir araya gətirərək qlobal problemlərin müzakirəsi üçün yeni əməkdaşlıq mühiti formalaşdırıb. Platforma ətraf mühit, insan hüquqları, sosial bərabərlik, inklüziv inkişaf, yoxsulluğun azaldılması və müasir dövrdə yeni təzahürləri ilə müşahidə olunan müstəmləkəçilik meyillərinə qarşı mübarizə kimi mövzular üzrə fəaliyyət göstərir”, - deyə deputat bildirib.
Azər Allahverənov Qoşulmama Hərəkatı və Qlobal Cənub QHT Platformasının Qlobal Şimalla Qlobal Cənub arasında dialoqun inkişafına xidmət edən mühüm körpü rolunu oynadığına diqqət çəkib: “Bu platformalar vasitəsilə yalnız dövlətlər deyil, vətəndaş cəmiyyəti institutları da beynəlxalq qərarların formalaşmasına töhfə vermək imkanı əldə edirlər. Ümumilikdə, Azərbaycanın Qoşulmama Hərəkatına sədrliyi ölkənin beynəlxalq münasibətlər sistemində rolunun daha da güclənməsinə, etibarlı tərəfdaş imicinin möhkəmlənməsinə və yeni əməkdaşlıq modelinin formalaşdırılmasına mühüm töhfə verib. Bu model siyasi, iqtisadi, humanitar, ekoloji və sosial məsələlərin vahid platformada müzakirəsinə, beynəlxalq hüququn prinsiplərinə əsaslanan çoxtərəfli əməkdaşlığın inkişafına xidmət edir. Nəticə etibarilə Azərbaycan həm Qlobal Şimal, həm də Qlobal Cənub arasında dialoqu təşviq edən və ümumbəşəri problemlərin həllinə töhfə verən aparıcı aktorlardan biri kimi mövqeyini daha da möhkəmləndirib”.
jpg_1787008215.jpg)
