Azərbaycan ədəbiyyatının görkəmli nümayəndəsi, Xalq yazıçısı, tanınmış ictimai xadim Yusif Səmədoğlunun 90 illik yubileyi ölkənin hər yerində olduğu kimi, ata yurdu Qazaxda da silsilə tədbirlərlə qeyd olunur.
Bu günlər rayon icra hakimiyyətinin, Azərbaycan Yazıçılar Birliyi Qazax Bölməsinin və Bakı Dövlət Universiteti Qazax filialının birgə təşkilatçılığı ilə Xalq yazıçısının anadan olmasının 90 illik yubileyinə həsr olunmuş "Yusif Səmədoğlunun ədəbi irsi: ənənə və müasirlik kontekstində" mövzusunda növbəti tədbir - elmi-praktik konfrans keçirilmişdir.
Konfrans iştirakçıları əvvəlcə şəhərin mərkəzində yerləşən "Fəxri qazaxlılar" parkında Xalq yazıçısının büstü önünə gül dəstələri düzərək xatirəsini ehtiramla yad etmiş, sonra Ədəbiyyat Muzeyində şairin həyat və yaradıcılığını əks etdirən kitab və fotosərgi ilə tanış olmuşlar. Muzeyin böyük zalında davam edən tədbirdə yazıçının həyat və yaradıcılığına həsr edilmiş video-çarxın nümayişindən sonra rayon icra hakimiyyətinin başçısı Rəcəb Babaşov çıxış edərək bildirmişdir ki, Yusif Səmədoğlu XX əsr Azərbaycan ədəbiyyatının görkəmli nümayəndələrindən olmuşdur: "O, həyatı boyu həm ədəbi, həm də ictimai-siyasi fəaliyyətində azərbaycançılıq mövqeyində durmuş, azadlıq, demokratiya, müstəqillik duyğusu ilə yaşamışdır. Millilik, milli-mənəvi dəyərlərimizin qorunub saxlanılması, milli mədəniyyətin, milli əxlaqın gənc nəslə çatdırılması baxımından onun əsərləri dəyərli və güclüdür. Yazıçı azad, müstəqil və mədəni həyat yolu keçmişdir. Y.Səmədoğlunda Vətən sevgisi güclü idi. O, əsərlərində zamanın nəbzini tutaraq günün mühüm məsələlərinə toxunmuş, mənəvi-ictimai problemləri ön plana çəkmiş, dövrün, yaşadığı mühitin eybəcərliklərini ifşa və tənqid hədəfinə çevirmişdir".
Azərbaycan Yazıçılar Birliyi Qazax Bölməsinin sədri, Əməkdar incəsənət xadimi, şair Barat Vüsal çıxış edərək Yusif Səmədoğlu ilə bağlı xatirələrini bölüşmüş, onun yaradıcılığının bugünkü gənc yazarlara örnək olduğunu qeyd etmişdir.
Sonra BDU-nun Qazax filialının kafedra müdiri, filologiya üzrə fəlsəfə doktoru İradə Arıxova, Gəncə Dövlət Universitetinin kafedra müdiri, filologiya üzrə fəlsəfə doktoru, dosent Səba Namazova məruzələrlə çıxış etmişlər.
Konfransın sonunda Yusif Səmədoğlunun 90 illik yubileyi ilə əlaqədar tələbələr arasında keçirilən esse müsabiqəsinin qaliblərinə təşəkkürnamələr təqdim olunmuşdur.
Sabir ƏLİYEV,
"Azərbaycan"
jpg_1792788431.jpg)
