“Space Solar” şirkəti “CASSIOPeiA” adlı Günəş elektrostansiyası vasitəsilə 2030-cu ilə qədər milyonlarla evi elektrik enerjisi ilə təmin etməyi hədəfləyib. Elektrostansiyanın kosmosda yerləşdirilməsi planlaşdırılır. Bunun üçün şirkət mühəndisləri Günəş elektrostansiyasının kiçik ölçülü prototipini hazırlayıblar.

 Məlumata əsasən, elektrostansiya özündə 1600 metrlik enə sahib Günəş panelləri ilə güzgüləri birləşdirəcək. Onun Yerin səthindən 30 min km yüksəklikdə quraşdırılması planlaşdırılır. Mütəxəssislərin hesablamalarına əsasən, sözügedən kosmik Günəş elektrostansiyasının inşası üçün çoxlu sayda raket uçuş missiyası və inşa prosesində iştirak edəcək robotlar lazım olacaq.

Elektrik enerjisinin daimi şəkildə təmin olunması üçün elektrostansiya mütəmadi olaraq Günəşə tərəf istiqamətlənməlidir. Günəş panelləri Yer səthindən fərqli olaraq kosmosda 13 dəfə daha çox Günəş enerjisi qəbul edə bilirlər. Belə ki, Günəş işığı kosmosda daimidir və onun intensivliyi daha yüksəkdir.

Elektrostansiya Günəş enerjisini yığaraq onu Yer səthindəki konkret qəbulediciyə göndərəcək. “CASSIOPeiA”nın kiçik ölçülü prototipinin laboratoriya şəraitində testi çərçivəsində mütəxəssislər laboratoriyadan ötürülmüş naqilsiz şüa vasitəsilə işığı yandıra biliblər.

Hazırda elektrostansiya hissələrinin kosmosa çatdırılması mövzusunda “SpaceX” şirkəti ilə danışıqlar aparılır. Elektrostansiyanın bütün hissələrinin kosmosa çatdırılması üçün 68 uçuş missiyası reallaşdırmaq lazım gələcək.

Ülkər XASPOLADOVA,

“Azərbaycan”