Hakimiyyətin isə etirazçıların qarşısını almaq üçün xüsusi planı var

Son günlərdə Hayastanda narazılıq və qarşıdurma həddinin daha da yüksəlməsi, müxalifətlə hakimiyyət arasında ziddiyyətlərin bir qədər də kəskinləşməsi müşahidə olunur. 
Müxalifət qarşıdakı günlərdə planlaşdırdığı aksiyalarla baş nazir Nikol Paşinyanı hakimiyyətdən uzaqlaşdırmağı hədəfləyir. Müxalifətçilər etirazlarına əsas kimi hakimiyyətin yürütdüyü uğursuz siyasəti göstərirlər. Onlar baş nazirin xarici siyasətinin ölkəni uçuruma sürüklədiyini, xalqı dövlətçiliyin itirilməsi ilə üz-üzə qoyduğunu iddia edirlər. 
"Demokratiya, qanun və nizam-intizam" partiyasının təsisçisi Vardan Qukasyan deyib ki, müxalifət aprelin 18-dən etibarən küçə aksiyalarına başlayacaq. Lakin budəfəki aksiyanı digərlərindən fərqləndirən pullu olmasıdır. Qukasyan gənclərə çağırış edib ki, onlar aksiyaya qoşulacaqları təqdirdə pulu özü ödəyəcək: "Mənə maksimum 50 min dram cərimə nəzərdə tutulan aksiyalarda iştirak edəcək 100 gənc lazımdır. Bu pulu ödəyəcəm, mənim sənə fiziki ehtiyacım var".
Sosial şəbəkələrdə paylaşımlara görə, müxalifət düşərgəsində həbslərin aparılması planlaşdırılır və qeyd olunur ki, kütləvi etiraz aksiyalarının qarşısını almaq üçün hakimiyyət indidən xüsusi plan hazırlayıb. Buraya müxalifət fəallarına qarşı güc tətbiq edilməsindən tutmuş, onların mitinq keçiriləcək ünvana daxil olmazdan əvvəl müvəqqəti həbsinə kimi müxtəlif planlar daxildir. O da vurğulanır ki, bu işdə təkcə polis yox, digər güc strukturlarının və hakimiyyətin nəzarətində olan xüsusi cəza dəstələrinin nümayəndələri də iştirak edəcəklər. Müxalifət isə hakimiyyət tərəfindən yaradılacaq bütün maneələrə rəğmən etiraz mitinqlərini keçirəcəklərini bildirib. 
Hayastanın "Respublikaçılar" Partiyasının üzvü Eduard Şarmazanov isə deyib ki, nikolizmdən  daha pis bir şey varsa, o da hakimiyyətin ölkədə yaratdığı xaosdur. Görünən odur ki, nikolist rejimin legitimliyi yoxdur. Millətçilər, liberallar, müstəqillər, din xadimləri, rusiyapərəstlər, qərbpərəstlər və hətta sorosçuların bir hissəsi onu ittiham edirlər. Artıq ölkəmizdə nikolizmin rədd edilməsi ilə bağlı konsensus var. 
Müxalifətçinin sözlərinə görə, hakim "Vətəndaş müqaviləsi" fraksiyasından, yüksək vəzifəli məmurlardan və bəzi oliqarxlardan başqa, erməni ictimaiyyətinin qalan hissəsi anlayır ki, nikolizm Ermənistanı məhv edir: "Nikolizmin süqutu ilə bərabər xaos ehtimalı da artır. Xaosun qarşısını almaq üçün milli-dövlət qüvvələrini və strukturlarını birləşdirmək lazımdır ki, Hayastan populist-avanturist anti-dövlətçi ünsürlərin hədəfinə çevrilməsin və onlar Ermənistanın başına yeni problem gətirməsinlər. "Nikol gedə bilər, kim istəyir gəlsin" təhlükəli və dövlət əleyhinə olan bir tezisdir. Nikol getməlidir, ona görə ki, səsinin tembri bezdiricidir, hərəkətləri sistemsizdir, antimilli fəaliyyətlər həyata keçirir. O, kilsəyə, istiqlal bəyannaməsinə qarşı çıxdı, ermənilərə müharibə elan etdi. Nikolizmin aradan qaldırılması o halda faydalı ola bilər ki, real milli-dövlət gündəmini daşıyan aktorlar hökumət qarşısında məsuliyyəti öz üzərinə götürsünlər". 
Beləliklə, müxalifət İrəvanda etirazlara başlayacağını bəyan etməklə bu yoldan dönməyəcəklərini bildirir.  Paşinyan isə ona qarşı yönəlmiş təhdidləri güc yolu ilə aradan qaldırmağı düşünür. Bu isə o deməkdir ki, Hayastanı qarşıdakı dövr ərzində qanlı günlər gözləyir.

Elçin CƏFƏROV,
"Azərbaycan"