Rayon təbiəti və abadlığı ilə də məşhurdur

Azərbaycanın ayrı-ayrı bölgələri, o cümlədən Astara rayonu da görülən tikinti-quruculuq işləri sayəsində simasını xeyli dəyişmiş, abad bir məkana çevrilmişdir. Rayon sakinləri Astaranın gələcəkdə daha da inkişaf edib ölkənin abad bölgələrindən birinə çevrilməsi üçün əllərindən gələni əsirgəmirlər. 
Prezident İlham Əliyev Astaraya dəfələrlə səfər etmişdir. Həmin səfərlər çərçivəsində rayonda xüsusi əhəmiyyətə malik onlarca sosial obyektin təməli qoyulmuş, açılışlar edilmiş, rayonun sosial-iqtisadi inkişafı ilə əlaqədar çoxsaylı sərəncamlar imzalanmışdır. Ayrılan vəsaitlər hesabına rayonun şəhər, qəsəbə və kəndlərində tikinti-quruculuq, abadlıq işləri görülmüş, yüzlərlə yeni iş yeri açılmışdır. 
Onlardan bir neçəsini sadalayaq. Bu illər ərzində Ərçivan kəndinə qəsəbə statusu verilmiş, orada Boks Mərkəzi inşa edilmişdir. Rayon mərkəzi xəstəxanası isə əsaslı təmir edilərək yeni inventar və avadanlıqlarla təchiz olunmuşdur. Bunlardan  savayı, şəhərdə ilk çoxmərtəbəli ictimai yaşayış binası, "Astaraçay" MMC-nin çay fabriki, onlarca məktəb binası, tibb müəssisəsi, inzibati binalar tikilmiş, çoxmənzilli ictimai yaşayış binaları əsaslı təmir olunmuş, Astara şəhərinin prospekt və küçələri yenidən qurularaq müasir işıqlandırma sistemi ilə təmin edilmiş, əhalinin sosial rifahının yaxşılaşdırılması istiqamətində çoxsaylı tədbirlər həyata keçirilmişdir. Həmin sırada Xəzər dənizi sahilində müasir dizaynda park-bulvar kompleksinin salınması və şəhərə içməli su xəttinin çəkilməsini xüsusi qeyd etmək lazımdır. Ərçivan-Şuvi-Alaşa-Qapıçıməhəllə, Artupa-Səncərədi-İstisu, Siyaku-Rinə, Deqadi-Pəlikəş, Taxtanakəran-Miki, Taxtanakəran-Toradi, Kijəbə-Qəcimardə, Kijəbə-Ojakəran, Kijəbə-Maşxan, Ojakəran-Tüləküvan-Təngərüd, ümumilikdə 150 km avtomobil yolunun asfaltlaşdırılması, bir neçə körpünün salınması da sıradan faktlar deyil. Mövcud olduğu dövrdə işığı və yolu olmayan Sekəşan, Dolu, Diqo, Şəvqo, Sibiyyət, Avyarud kəndlərinə avtomobil yolu və elektrik xəttinin çəkilməsi, 40-dan çox məktəb binasının tikilməsi və ya əsaslı təmir edilməsi, rayonun 52 yaşayış məntəqəsinin qazlaşdırılması, həmçinin elektrik təsərrüfatında təmir işlərinin aparılaraq əhaliyə fasiləsiz enerjinin verilməsinin təmin edilməsi də birbaşa dövlətin diqqət və qayğısının nəticəsidir.
Hazırda Prezidentin sərəncamları ilə ayrılan vəsait hesabına illərdir əhalini rahatsız edən 26 kilometrlik Çayoba-Astara magistral avtomobil yolu asfaltlaşdırılır. İndiyəcən yolu olmayan Dürriyə və Şümrüd kəndlərinə yeni avtomobil yolunun çəkilməsi isə başa çatmaq üzrədir. Dolu kəndindən Reqluba və Hamoşam kəndlərinə dairəvi yolun çəkilməsinin əhəmiyyəti nəzərə alınaraq hazırda burada da işlərə başlanmışdır. Paralel olaraq əhalinin məşğulluğunun təmin edilməsinə diqqət artırılmış, o cümlədən görülən tikinti-quruculuq işləri, aqrar sahənin inkişafı ilə əlaqədar rayonda yüzlərlə iş yeri açılmışdır.
Aqrar sahədən söz düşmüşkən. Prezidentin çayçılığın, çəltikçiliyin, sitrusçuluğun inkişafına dair imzaladığı sərəncamlardan sonra rayonda yeni innovativ üsullarla sitrus və subtropik meyvə bağlarının salınmasına maraq xeyli artmış, sitrus meyvə bağlarının sahəsi genişləndirilərək 4500 hektara çatdırılmışdır. Son illər kənd təsərrüfatının ən rentabelli sahələrindən biri olan çəltik əkini sahələri də aparılan maarifləndirmə işləri və verilən dəstək sayəsində 40 hektardan 240 hektaracan artmışdır. 
Dənizkənarı park-bulvarın salınması, gözəl və saf təbiətə malik dağ kəndlərinə asfalt yolların çəkilməsi ilə rayonda turizmin inkişafı üçün geniş imkanlar yaranmışdır. Nəticədə hər il Astaraya minlərlə turist səfər edir. Bu yerdə rayonda  keçirilən beynəlxalq tədbirləri də unutmaq olmaz. Məsələn, ötən ilin aprelində Astarada dünyanın bir neçə ölkəsindən, o cümlədən Almaniya, Türkiyə, Özbəkistan, Slovakiya, Bosniya-Hersoqovina, Filippin, Sinqapurdan və təbii ki, Azərbaycandan olan məşhur tibb alimləri və həkimlərin iştirakı ilə Beynəlxalq Azərbaycan-Alman-Türk Tibb Konqresi keçirilmişdir. Konqresdə 60-dan çox xarici məruzəçi, eyni zamanda Avropa və Asiya Endoskopik və Laparoskopik Cərrahlar cəmiyyətlərinin rəsmiləri, bölgələrdə fəaliyyət göstərən tibb müəssisələrində çalışan tibb heyəti və digər qonaqlar iştirak etmişlər. Bu tədbirdən bir ay sonra isə dünyada ilk dəfə təşkil olunan 3x3 Basketbol üzrə Dünya Qadın Seriyasının oyunlarının bir mərhələsi Astarada keçirilmişdir. Yarışda Almaniya, Çin, Polşa, Rumıniya, Macarıstan, Çexiya, Misir, Ukrayna, Avstriya və Azərbaycan 3x3 qadın yığma komandaları, ümumilikdə 10 ölkənin 12 komandası mübarizə aparmışdır. 

Seyran CAVADOV,
"Azərbaycan"