Musiqi mədəniyyətimizin inkişafında və zənginləşməsində böyük xidmətlər göstərmiş görkəmli bəstəkar Eldar Rüstəmov xalqımızın yaddaşında dərin iz qoymuşdur. Onun bəstələdiyi simfonik əsərlər bu gün də dinləyicilərin, tamaşaçıların zövqünü oxşayır. Tamaşaçılar sözünü ona görə qeyd edirik ki, Eldar Rüstəmov həm də bir çox film üçün musiqilər bəstələmişdir. Bənzərsiz əsərləri ilə filmlərimizə tamaşaçı marağını və sevgisini daha da artırmışdır.
Tanınmış bəstəkar Eldar Səid oğlu Rüstəmov 13 iyul 1946-cı ildə Bakıda anadan olub, musiqiçi ailəsində böyüyüb. Dinlədiyi musiqilər özü də hiss etmədən zərrə-zərrə onun ürəyinə, qəlbinə süzülüb. Elə buna görə də kiçik yaşlarından musiqinin sehrinə düşüb, bu sahəyə böyük maraq göstərib. Çox keçməyib ki, bu maraq onun gələcək həyat yolunu, taleyini müəyyənləşdirib.
Eldar Rüstəmov əvvəl Bakı Musiqi Akademiyasında musiqinin sirlərinə dərindən yiyələnib, sonra elmi işlərini uğurla müdafiə edərək professor adı alıb. Elə professor kimi də bir zamanlar təhsil aldığı musiqi ocağında işləməyə başlayıb. Vaxtilə kitablardan oxuduqlarını, müəllimlərindən mənimsədiklərini böyük həvəs və sevgi ilə gələcəyin musiqiçilərinə tədris edib. Elmi, biliyi, nümunəvi davranışı və xeyirxahlığı ilə tələbələrinin sevgisini qazanıb. Onlarca gənc musuqiçiyə bilik verib, yol göstərib. Onların bacarıqlı musiqiçi kimi formalaşmasına çalışıb. Eldar Rüstəmov ömrünün sonuna qədər bu təhsil ocağında müəllim işləyib.
Bakı Musiqi Akademiyasının professoru Eldar Rüstəmov bəstəkarlıqla yanaşı, həm də dirijor kimi fəaliyyət göstərib. Çox məharətlə skripka ifa edən bəstəkar bir-birindən dəyərli əsərləri ilə könülləri oxşayıb. O, 64 illik ömründə böyük sənətkarlıqla simfonik və kamera musiqisi janrlarında, həmçinin xor əsərləri və filmlərimizə yazdığı bənzərsiz bəstələri ilə musiqi tariximizə mühüm töhfələr verib. Ömrünün müxtəlif illərində yaratdığı əsərlərlə, bəstələdiyi musiqilərlə tanış olduqca Eldar Rüstəmovun necə böyük bir sənətkar olduğu aydın şəkildə gözlərimiz qarşısında canlanır. Görkəmli bəstəkarın skripka və piano üçün bəstələdiyi sonata, "Sən gedəndən" romansı, solist, xor və simfonik orkestr üçün "Heyranam, Vətən" odası, Solo skripka üçün Sonata, 2 akapella xoru - "Səadət nəğməsi", "Bahar", "Düşdü yada" romansı, kiçiktərkibli simfonik orkestr üçün "Meşə nağılı" süitası, "Bir də baxsan mənə" akapella xoru, xor və simfonik orkestr üçün işləmələri və başqa əsərləri bu gün də dinlənilir.
"Yeraltı əhvalat", "Mən Xəzəri görürəm", "Özünü onun yerinə qoy", "Yay gününün xəzan yarpaqları", "Qoca palıdın nağılı", "Təqib" və başqa filmlər üçün yazdığı musiqilər isə orjinallığı ilə seçilir.
Atalar yaxşı deyib: "Ot kökü üstə bitər". Yaradıcılığı haqqında qısaca söhbət açdığımız Eldar Rüstəmov görkəmli bəstəkar, Xalq artisti Səid Rüstəmovun ailəsində dünyaya göz açıb. Təəssüf ki, bəstəkar az yaşayıb. Musiqi mədəniyyətimizdə həmişə yeri görünən görkəmli bəstəkar ilıq bir yaz günündə 23 aprel 2010-cu ildə dünyasını dəyişib. Amma yaradıcılığı ilə Azərbaycan musiqi mədəniyyətinə və kino sənətinə dəyərli töhfələr vermiş unudulmaz sənətkar həmişə bəstələdiyi əsərlərində yaşayır və böyük ehtiramla yad edilir.
Vahid MƏHƏRRƏMOV,
"Azərbaycan"
