Azərbaycan-Qırğızıstan münasibətləri tarixən qarşılıqlı hörmət, dostluq və qardaşlıq prinsipləri əsasında inkişaf edib. İki xalqı birləşdirən mənəvi və mədəni dəyərlər ölkələr arasındakı əlaqələrin möhkəmlənməsində mühüm rol oynayıb.
Bu fikirləri AZƏRTAC-a açıqlamasında Azərbaycan Rəssamlıq Akademiyasının rektoru, Xalq rəssamı, professor Natiq Əliyev söyləyib. O bildirib ki, görkəmli qırğız yazıçısı Çingiz Aytmatovun Bakıda ucaldılan abidəsi də Azərbaycan-Qırğızıstan dostluğunun və qardaşlığının ifadəsi kimi diqqət çəkir.
Müsahibimiz xatırladıb ki, Çingiz Aytmatovun xatirəsinin əbədiləşdirilməsi məqsədilə Bakıda ucaldılacaq abidənin eskiz layihəsinin hazırlanması üçün Mədəniyyət Nazirliyi tərəfindən 2023-cü il iyunun 15-dən iyulun 31-dək heykəltaraşlar arasında açıq müsabiqə keçirilib: Müsabiqəyə 21 layihə təqdim olunmuşdu. Mədəniyyət Nazirliyinin nəzdində fəaliyyət göstərən Ekspert Komissiyasının qərarı ilə müsabiqədə birinci yerə mənim hazırladığım eskiz layihəsi layiq görülüb. Həmin layihə əsasında hazırlanan bürünc heykəlinin hündürlüyü 3 metrə yaxın, çəkisi isə təqribən 6 ton olub. Abidənin açılışı 2024-cü il aprelin 24-də Bakıda keçirilib. Açılış mərasimində Azərbaycan Respublikasının Prezidenti İlham Əliyev və Qırğız Respublikasının Prezidenti Sadır Japarov iştirak ediblər.
Çingiz Aytmatovun Bakıda abidəsinin ucaldılması iki ölkə arasında yalnız siyasi və iqtisadi deyil, eyni zamanda, humanitar və mədəni əlaqələrin də yüksək səviyyədə inkişaf etdiyini nümayiş etdirən mühüm hadisələrdən biri kimi qiymətləndirilib”.
Professor Natiq Əliyev bildirib ki, Azərbaycan və qırğız xalqlarının ortaq tarixi, milli-mənəvi dəyərləri və ədəbiyyata olan böyük sevgisi bu əlaqələrin daha da möhkəmlənməsinə zəmin yaradıb. Çingiz Aytmatovun yaradıcılığı isə bu mənəvi bağların ən parlaq nümunələrindən biri olub. Bakıda ucaldılan abidə də yazıçının yaradıcılıq irsinə ehtiramla yanaşı, Azərbaycan ilə Qırğızıstan arasında dostluq və qardaşlıq münasibətlərinin möhkəmliyini əks etdirən mühüm sənət nümunəsi kimi yadda qalıb.
