Deyirlər ki, torpaqda həmişə çörək var
Payız yaxınlaşsa da, havalar isti keçir. Buna baxmayaraq, kənd adamları yetişdirdikləri məhsulu vaxtında və itkisiz toplamaq üçün gün çıxandan qaş qaralanacan sahələrdədirlər. Belə bir dövrdə tovuzlular da əlləri çatan bütün imkanlardan istifadə edirlər ki, zəhmətləri hədər getməsin.
Qeyd edək ki, Tovuz rayonunda da kənd təsərrüfatının bütün sahələrinin inkişafı istiqamətində uğurlu addımlar atılır. Fermer və sahibkarlar güzəştli şərtlərlə kredit, toxum, gübrə və texnika almaqla dövlətin bütün imtiyazlarından maksimum istifadə edir, verilən subsidiyalardan yararlanırlar.
Tovuz ölkəmizin iri kənd təsərrüfatı rayonlarındandır. Rayon üzrə 131 min 211 hektar əkinəyararlı torpaq sahəsi var. Əkinçilər bu torpaqlarda hər il bol kənd təsərrüfatı məhsulları yetişdirirlər. Ən çox diqqət isə taxılçılığa yönəldilmişdir. Əvvəlki illərdə olduğu kimi, cari il də rayon üzrə 12075 hektarda taxıl əkilmişdir. Ümumi taxıl sahələrindən 38 min 553,4 ton buğda, 7 min 500 ton arpa yığılmışdır.
Rayonda taxılçılıqda zəngin təcrübəsi olan çoxlu sayda fermer var. Onlardan biri də Ədalət Məhərrəmovdur. O, istifadəsində olan 100 hektarda hər il bol taxıl yetişdirir. "Tovuz Aqrokompleks", "Tovuz Aqro" və "Aqro Dairy" MMC-lər də hər il taxıl istehsalında fərqlənirlər.
Rayonun aqrar sektorunda kartofçuluq da mühüm yer tutur. Keçən il 5496 hektarda kartof əkən fermerlər hər hektardan 298,6 sentner məhsul götürməklə əvvəlki ildəki göstəricini üstələmişlər. Cari mövsüm isə fermerlər daha çox kartof əkmişlər. Hazırda onlar yığımla məşğuldurlar.
Tovuzda heyvandarlığın inkişafı da diqqətdən kənarda qalmır. Cari ilin əvvəlinə olan məlumata görə, rayonda 164 min baş qoyun və keçi, 41 min baş qaramal var. Qaramalın 42,6 faizi ana inəklərdir. Heyvandarlıq məhsulları istehsalında da ayrı-ayrı təsərrüfatlar fərqlənirlər. Məsələn, Qovlar şəhər sakinləri Şahin Ələsgərov, Tofiq Bayramov, Cəlal Ələsgərov və bir çoxları kimi.
İstehsal olunan südün emalında Bozalqanlı kəndindəki süd emalı müəssisəsinin rolu böyükdür. Müəssisə sutka ərzində 300 litrə qədər süd qəbul etmək gücündədir. Burada 20-yədək işçi çalışır və gün ərzində qatıq və yağ istehsal olunur. Müəssisədə istehsal edilən hazır məhsullar demək olar ki, anbarda qalmır, müəssisənin mağazasında qısa vaxtda satılır.
Rayonda iqtisadi cəhətdən gəlirli olan üzümçülüyün zəngin ənənəsi var. Məlum olduğu kimi, sovetlər birliyi dağıldıqdan sonra digər sahələrlə birlikdə üzümçülük də məhv edilmişdi. Uzun illər bu sahədən yüksək qazanc əldə edən təsərrüfatlar sıradan çıxmış, peşəkar üzümçülər məcburən başqa sahələrə üz tutmuşlar. Həmin illər Tovuz rayonunda 10 min hektara yaxın üzüm plantasiyaları mövcud idi. İllik istehsal 120 min tona çatmışdı. Tovuzda o illər 12 şərab emalı müəssisəsi fəaliyyət göstərirdi. Bu gəlirli sahə bir də 2015-ci ildə Prezident İlham Əliyevin sərəncamı ilə dövlət proqramı təsdiq edildikdən sonra dirçəlməyə başladı. Hazırda Tovuzda 1150 hektar üzüm bağı var. Bu bağların 1070 hektarı bar verir. Keçən il hər hektardan 284 sentner olmaqla 7250 ton üzüm yığılmışdır. Bu il də məhsul boldur. Nəticə hazırda davam edən yığımdan sonra məlum olacaq.
Sabir ƏLİYEV,
"Azərbaycan"
