Azərbaycan tolerantlıq prinsiplərinə sadiq, multikultural mühitin formalaşdığı bir məkandır. Ölkəmizdə tolerantlıq, birgəyaşayış və qarşılıqlı hörmət dəyərləri ənənəyə çevrilib. Yüz illər öncə olduğu kimi, bu gün də respublikamızda mövcud olan müxtəlif mədəniyyətlər, fərqli inanc sahibləri mehriban ailə kimi yaşayırlar. Azərbaycan tolerantlıq və multikulturalizm dəyərlərini uca tutması ilə dünyaya nümunədir.
Prezident İlham Əliyevin bildirdiyi kimi: "İctimai-siyasi quruluşdan asılı olmayaraq, Azərbaycan bütün dövrlərdə sülh, əməkdaşlıq, qarşılıqlı anlaşma məkanı olmuşdur və biz bu ənənələri yaşadırıq". Azərbaycanda bütün xalqların, dinlərin nümayəndələrinin bir ailə kimi sülh, mehribanlıq şəraitində yaşadığını, heç vaxt ölkəmizdə dini-milli zəmində qarşıdurma, yaxud da anlaşılmazlıq olmadığını diqqətə çatdıran dövlət başçısı qeyd edib ki bu, bizim böyük sərvətimizdir: "Bütün dinlərin tarixi abidələri dövlət tərəfindən qorunur, eyni zamanda dövlət öz vəsaiti hesabına bu abidələrin bərpasını təmin edir. Azərbaycanda məscidlər, kilsələr, sinaqoqlar tikilir, təmir edilir. Biz bütün dini bayramlarımızı birlikdə qeyd edirik. Bütün dini icmalar bunu birlikdə qeyd edir. Biz tariximizlə, mədəniyyətimizlə fəxr edirik. Bu gün dünyanın ən qədim məscidlərindən biri Azərbaycanda, Şamaxı şəhərində yerləşir. Şamaxı məscidi 743-cü ildə tikilmişdir və bərpa edilərək bu gün fəaliyyət göstərir. Eyni zamanda Şəki şəhərinin yaxınlığında Qafqazın ən qədim kilsələrindən biri - Qafqaz Albaniyası kilsəsi bir tarixi abidə kimi yaşayır. O tarixi abidə də bərpa edilərək bu gün xidmət göstərir və çoxlu turistləri cəlb edir. Bakının yaxınlığında qədim zərdüştlük, atəşpərəstlik məbədi bu gün qorunub saxlanılır".
Ölkəmizdə yaşayan bütün xalqların və etnik qrupların nümayəndələrinin hər zaman sevinci də, dərdi, kədəri də bir olub. Bu birliyi 2020-ci il sentyabrın 27-də Ermənistan silahlı qüvvələrinin növbəti təxribatı, irimiqyaslı hücumu səbəbilə başlayan və 44 gün davam edən Vətən müharibəsində də bütün dünya bir daha gördü.
2020-ci il noyabrın 8-də Vətən müharibəsini böyük Zəfəri ilə başa vuraraq, Qarabağda, Şərqi Zəngəzurda Ermənistanın 30 ilə yaxın davam etdirdiyi işğala son qoyan Müzəffər Azərbaycan Ordusu 2023-cü il sentyabrın 19-20-də həyata keçirdiyi uğurlu antiterror tədbirləri nəticəsində də dövlət suverenliyimizi tam bərpa etdi.
Bu il - Azərbaycan Respublikası Prezidenti tərəfindən elan edilmiş "Konstitusiya və Suverenlik İli"ndə ölkəmizdə böyük qürur və sevinclə Konstitusiyanın qəbul edilməsinin 30 illiyi və şanlı Zəfərimizin 5 illiyi təntənəli tədbirlərlə qeyd olunur.
Ölkəmizin Qarabağ və Şərqi Zəngəzur torpaqları Ermənistanın işğal altında qaldığı müddətdə erməni vandalları həmin ərazilərdə azərbaycanlıların bütün tikililərini - yaşayış və inzibati binalarını, tarixi-mədəni, dini abidələrini uçurub dağıtdılar, məscidlərimizi tövlələrə, qəbiristanlıqlarımızı otlaqlara çevirməkdən çəkinmədilər. Dövlət başçısı İlham Əliyevin vurğuladığı kimi: "İşğal edilmiş torpaqlarda bizim tarixi, dini abidələrimiz ermənilər tərəfindən dağıdılıb. Bu barədə də faktlar var. ATƏT işğal edilmiş torpaqlara iki dəfə faktaraşdırıcı missiya göndərib və onların məruzələrində bu, açıq şəkildə göstərilir. Bütün şəhərlər yerlə yeksan edilib, infrastruktur, qəbirlər dağıdılıb. Onlar qəbirlərimizin üstünə buldozer salmışlar, dağıtmışlar. Məscidlərimiz dağıdılıb. Bakının mərkəzində erməni kilsəsi var. Biz o kilsəni bərpa etmişik. İndi o kilsədə erməni dilində 5 mindən çox kitab saxlanılır. Onlar isə bizim məscidlərimizi yerlə yeksan ediblər".
Vətən müharibəsindən qısa müddət sonra işğaldan azad olunmuş ərazilərimizdə həyata keçirilən "Böyük qayıdış" proqramı çərçivəsində dağıdılmış dini abidələrimiz, ibadətgahlarımız bərpa edilir, yenidən tikilir. Qeyd edək ki, tarixi-dini abidələrimizin bərpasına başlanılması və uğurla davam etdirilməsi Prezident İlham Əliyevin diqqəti və nəzarəti, Heydər Əliyev Fondunun təşəbbüsü və dəstəyi ilə reallaşdırılır.
Dövlət başçısının qeyd etdiyi kimi, cəmiyyətimizdə yüz illər boyu təşəkkül tapmış mədəni müxtəlifliyin, yüksək humanizm prinsiplərinin, zəngin tolerantlıq ənənələrinin qorunub saxlanılması və təşviqi Azərbaycanda həyata keçirilən dövlət siyasətinin prioritet istiqamətlərindəndir. Və bu istiqamətdə məqsədyönlü işlər uğurla davam etdirilir.
Prezident İlham Əliyev noyabrın 13-də ABŞ-nin İsa Məsihin Sonuncu Gün Müqəddəsləri Kilsəsinin nümayəndə heyətini qəbul edib. Söhbət zamanı dövlət başçısı İlham Əliyevlə ABŞ-nin İsa Məsihin Sonuncu Gün Müqəddəsləri Kilsəsinin nümayəndə heyətinin əvvəlki görüşləri məmnunluqla xatırlanıb.
Qonaqlar ABŞ Prezidenti Donald Trampın şahidliyi ilə Azərbaycanla Ermənistan arasında sülh gündəliyinin irəli aparılması istiqamətində Vaşinqtonda əldə edilmiş nailiyyətlər münasibətilə təbriklərini çatdırıblar. Dövlətimizin başçısı İlham Əliyev təbriklərə görə təşəkkürünü bildirib, Vaşinqtonda Azərbaycan və Ermənistan arasında əldə olunmuş razılaşmaların tarixi əhəmiyyət daşıdığını vurğulayaraq, onların regionun inkişafı üçün mühüm rol oynadığını qeyd edib.
İsa Məsihin Sonuncu Gün Müqəddəsləri Kilsəsinin nümayəndə heyəti dövlətimizin başçısına Azərbaycan hökumətinin Amerika Birləşmiş Ştatlarının İsa Məsihin Sonuncu Gün Müqəddəsləri Kilsəsini rəsmi qeydiyyata almasına görə minnətdarlığını bildirib. Qonaqlar bunu ölkəmizdə bütün dinlərin nümayəndələrinə göstərilən qayğının təcəssümü kimi dəyərləndiriblər.
Görüşdə Azərbaycanda mədəniyyətlərarası və dinlərarası dialoqun təşviqi ilə bağlı dövlət səviyyəsində həyata keçirilən işlərdən söhbət açılıb, bu istiqamətdə ölkəmizdə mühüm beynəlxalq tədbirlərin təşkil edildiyi qeyd olunub. Tolerantlığın xalqımızın həyat tərzi olduğu deyilib, tarixən ölkəmizdə müxtəlif dinlərin və xalqların nümayəndələrinin bir ailə kimi dinc və sülh şəraitində yaşadığı vurğulanıb.
Həmin gün - noyabrın 13-də ABŞ-nin İsa Məsihin Sonuncu Gün Müqəddəsləri Kilsəsinin Bakı ofisinin açılış mərasimi keçirilib.
Xatırladaq ki, İsa Məsihin Sonuncu Gün Müqəddəsləri Kilsəsi ötən il iyulun 10-da Dini Qurumlarla İş üzrə Dövlət Komitəsi tərəfindən Azərbaycanda rəsmi dövlət qeydiyyatına alınıb.
Onu da qeyd edək ki, İsa Məsihin Sonuncu Gün Müqəddəsləri Kilsəsi (Mormon kilsəsi) xristian köklərinə əsaslanan, lakin bəzi doktrinal xüsusiyyətlərinə görə ənənəvi xristian məzhəblərindən fərqlənən dini mərkəzdir.
Zöhrə FƏRƏCOVA,
"Azərbaycan"
jpg_1790976482.jpg)
