Nigeriyada sevginin dili dəyişir: bir vaxtlar gəlinə gül dəstəsi, yataq dəsti, məişət əşyaları hədiyyə edilirdisə, indi ailə həyatı quran cütlüklərə günəşdən gələn işıq bağışlanır. Bəli, səhv oxumadınız, günəş paneli artıq toy səbətinin ən arzuolunan hədiyyələrindən birinə çevrilir!
“Bloomberg”in məlumatına görə, yanacaq qiymətlərinin artması və Çindən gətirilən günəş enerjisi avadanlıqlarının ucuzlaşması Nigeriyada toy hədiyyələri ənənəsinə yeni nəfəs verib. Günəş panelləri, batareyalar və invertorlar yataq dəstləri, məişət texnikası ilə yanaşı, yeni evlənənlərin evinə yol tapır. Belə görünür ki, Nigeriyada gəlinin cehizinə indi bir az da günəş işığı əlavə olunur!
Bu qeyri-adi dəyişikliyin arxasında isə heç də romantik olmayan, kifayət qədər ciddi bir səbəb dayanır: enerji böhranı. Ölkənin elektrik şəbəkəsi əhalinin tələbatını tam ödəyə bilmədiyindən bir çox ailə öz elektrik enerjisini generatorlar vasitəsilə istehsal edir. Lakin yanacağın bahalaşması bu üsulu getdikcə daha baha başa gələn seçimə çevirir. Günəş isə nə benzin istəyir, nə də hər səhər qiymətini dəyişir!
ABŞ və İsrailin İrana qarşı müharibəsi fonunda yanacaq bazarında yaranan təzyiqlər də nigeriyalıları alternativ enerji mənbələrinə yönəldir. Bu şəraitdə Çin istehsalı olan ucuz günəş panelləri ailələr üçün daha əlçatan seçimə çevrilir. Çindəki artıq istehsal və rəqabətli qiymətlər isə günəş enerjisi avadanlıqlarının xarici bazarlara daha geniş çıxmasına imkan yaradır. Məlumata görə, 2025-ci ilin sonuna doğru Nigeriyada evlərdə quraşdırılan günəş panellərinin istehsal etdiyi elektrik enerjisinin həcmi milli şəbəkədən əldə edilən enerjini üstələyib. 2026-cı ildə quraşdırılan panellərin sayı da 2024 və 2025-ci illərin ümumi göstəricisini keçib.
Beləcə, Nigeriyada toy hədiyyələri də zamanın tələbinə uyğun dəyişir. Çünki bəzən yeni ailəyə verilə biləcək ən dəyərli hədiyyə büllur qab dəsti və ya bahalı məişət texnikası deyil, evin işığını sönməyə qoymayan bir enerji mənbəyidir.
Kim bilir, bəlkə də yaxın gələcəkdə toy məclislərində “Gəlinə nə aldın?” sualına verilən ən dəbdə olan cavab belə olacaq: “Bir az sevgi, bir az xoşbəxtlik, bir də üç kilovatlıq günəş sistemi!”
Nigeriyanın yeni toy dəbi bir həqiqəti də xatırladır: həyatın ən romantik günlərində belə, işıqların sönməməsi vacibdir. Hərçənd bu ölkədə artıq işığı yandırmaq üçün təkcə sevgi yox, günəş də köməyə gəlir!
“Azərbaycan”
