Gələcəklə bağlı arzuları bitib-tükənməz idi. Gənc idi. Anası, bacıları onun toyunu gözləyirdilər. Onların yeganə ümidiydi. 1991-ci il oktyabrın 17-də Qubanın Qonaqkənd qəsəbəsində dünyaya gələn Orxan Ömərov ailənin tək oğlu, iki bacının bircə qardaşı idi. Uşaqlıqdan ağlı, mərifəti, mehribanlığı ilə seçilirdi.
Orxan gələcəyi barədə xəyallar qurmağı çox sevirdi. Həyat onu sınaqlara çəkəndə də mərd davrandı, sınmadı. Atasını erkən itirdi. Ailənin yükünü çiyinlərinə götürdü. Heç vaxt buna görə gileylənmədi.
Adı anasının, bacılarının and yeri oldu. O da doğmalarına, ən çox da anasına bağlı idi. Bir də dilinin andı Vətən idi. Şair təbiətli idi. Şeirlər yazırdı. Ən böyük ilham mənbəyi də Vətən idi.
Orxan uşaqlıqdan vətənpərvərlik hissi ilə böyümüşdü. Qarabağ və Şərqi Zəngəzur Ermənistan tərəfindən işğal olunanda o, hələ kiçik idi. Ancaq tay-tuşları kimi, Orxan Ömərov da heç vaxt görmədiyi o yerlərin düşmən əsarətində qalmasının nisgilini, təəssübünü çəkərək böyüdü. Ərazilərimizi işğaldan azad edəcək qüdrətli Azərbaycan Ordusunun sıralarında olacağına inanırdı. Elə bu ümidlə, inamla da hərbçi peşəsini seçdi.
Orxan 2009-cu ildə Azərbaycan Silahlı Qüvvələrinin sıralarında müddətli həqiqi hərbi xidmət keçdi. 2013-cü ildən isə Daxili Qoşunlarda müddətdən artıq həqiqi hərbi xidmət qulluqçusu oldu.
2020-ci il sentyabrın 27-də Vətən müharibəsi başlayanda Daxili Qoşunların çavuşu olan Orxan Ömərov da Ermənistanın işğalı altında olan ərazilərimizin azad edilməsi və ölkəmizin ərazi bütövlüyünün bərpası naminə döyüşlərə atıldı.
Vətən müharibəsinin hər günü cəbhənin müxtəlif istiqamətlərində aparılan şiddətli döyüşlərlə tarixə yazılırdı. Orxan kimi qəhrəman oğullarımız Ermənistan silahlı qüvvələrinə ağır zərbələr endirərək işğal altında qalan torpaqlarımızı azadlığına qovuşdururdular.
Döyüş yoldaşları vaxt tapanda Orxandan şeirlər söyləməsini xahiş edirdilər. Silahdaşları ona ləqəb də vermişdilər - "şair" deyə çağırırdılar.
Orxan Füzulinin və Şuşanın azadlığı uğrunda gedən döyüşlərdə rəşadət göstərdi. O, silahdaşları ilə çiyin-çiyinə böyük Zəfərə doğru irəliləyirdi. Şuşaya qələbə bayrağının sancılmasına az qalmışdı. Lakin əcəl macal vermədi - noyabrın 7-də Şuşa döyüşləri zamanı şəhid oldu. Qonaqkənddə dəfn edildi.
Azərbaycanın Ermənistanın işğalı altında olan torpaqlarının azad olunması, ərazi bütövlüyünün təmin edilməsi uğrunda aparılan döyüş əməliyyatlarında şücaət göstərmiş Orxan Ömərov ölümündən sonra "Vətən uğrunda" və "Şuşanın azad olunmasına görə" medalları ilə təltif edildi.
Orxan Ömərovun ömür yolu qısa olsa da, Vətənə məhəbbəti, doğmalarına bağlılığı, döyüş meydanında göstərdiyi şücaəti ilə yaddaşlarda əbədi iz qoydu. Şeirlərində Vətənin gözəlliyini, doğma torpağın sevgisini yaşadan "şair" ləqəbli igid çavuş silahı ilə də Vətəninə sədaqətini sübut etdi. O, arzularının bir çoxunu özü ilə apardı, ancaq uğrunda canından keçdiyi torpaqların azadlığı naminə göstərdiyi qəhrəmanlıqla adını Azərbaycanın şanlı Zəfər tarixinə yazdı.
Bu gün Orxanın xatirəsi anasının və bacılarının, onu tanıyanların qəlbində yaşayır. Zaman keçəcək, nəsillər dəyişəcək, ancaq Vətən uğrunda canından keçən igidlərin qəhrəmanlığı unudulmayacaq - qəhrəman "şair" Orxan Ömərov kimi.
Zöhrə FƏRƏCOVA,
"Azərbaycan"
