Elm və Təhsil Nazirliyinin İqtisadiyyat İnstitutunda növbəti daimi elmi seminar təşkil edilib.
İnstitutdan AZƏRTAC-a bildirilib ki, icraçı direktor dosent Famil Rüstəmovun sədrliyi ilə keçirilən seminara əməkdaşlarla yanaşı, universitetlərin və elmi-tədqiqat institutlarının tədqiqatçıları, eləcə də sahibkarlar qatılıblar. Seminarda İqtisadiyyat İnstitutunun şöbə müdiri iqtisad elmləri doktoru Yunus Sadıqov "Aqrar klasterlər və regional inkişaf: Azərbaycan üçün yeni model" mövzusunda təqdimatla çıxış edib. Məruzədə Azərbaycanda kənd təsərrüfatının müasir vəziyyəti təhlil olunub, aqrar sahənin inkişafına mane olan bir sıra problemlərə, xüsusilə böyük potensiala malik kənd təsərrüfatı xammalının dəyər zənciri əsasında emal olunaraq hazır məhsula çevrilməsi prosesindəki çatışmazlıqlara diqqət yetirilib. Qeyd olunub ki, mövcud istehsal potensialının daha yüksək iqtisadi gəlirə çevrilməsi üçün fermer təsərrüfatları, emal müəssisələri, saxlama infrastrukturu və bazarlar arasında davamlı əlaqələrin qurulması vacibdir. Bu baxımdan müstəqil təsərrüfatların regional dəyər zəncirlərində birləşdirilməsi aqrar klasterləşmənin əsas istiqamətlərindən biri kimi qiymətləndirilib. Yunus Sadıqov regional klasterləşməyə mərhələli keçid modelini təqdim edərək regionları üç qrupa ayırıb. Birinci qrupa hazır xammal bazası və ilkin emal imkanları olan regionlar, ikinci qrupa aqrar potensialı mövcud olsa da, əlavə koordinasiya və infrastruktur tələb edən regionlar, üçüncü qrupa isə bərpa və tamamlayıcı xidmətlərin inkişafına ehtiyac duyulan Qarabağ və Şərqi Zəngəzur əraziləri daxil edilib.
Təqdimatda regional ixtisaslaşma əsasında Quba-Xaçmaz meyvəçilik klasterinin, Şəki-Zaqatala fındıq klasterinin, Astara çay və sitrus meyvələri klasterinin və digər regional aqrar klasterlərin yaradılması təklif olunub. Bununla yanaşı, klasterlərin təşkilati modeli, regional ixtisaslaşma istiqamətləri, mərhələli klasterləşmə xəritəsi və əlaqələndirici idarəetmə mexanizmi Azərbaycan şəraitinə uyğun vahid çərçivədə təqdim edilib.
Məruzəçi aqrar klasterlərin yaradılması və səmərəli fəaliyyətinin təmin olunması üçün əsas fəaliyyət istiqamətlərini də diqqətə çatdırıb. Vurğulanıb ki, klasterləşmə prosesində istehsalçılar, emal müəssisələri, logistika və saxlama infrastrukturu, eləcə də satış bazarları arasında koordinasiyanın gücləndirilməsi xüsusi əhəmiyyət daşıyır. Y.Sadıqov əsas nəticə olaraq qeyd edib ki, aqrar klasterləşmə regionların əsasən xammal istehsal edən ərazilərdən emal, logistika və bazar əlaqələri vasitəsilə yüksək əlavə dəyər yaradan aqrar-sənaye məkanlarına çevrilməsinə xidmət etməlidir. Bu modelin tətbiqi regional iqtisadi ixtisaslaşmanın gücləndirilməsinə, yerli istehsalın rəqabət qabiliyyətinin artırılmasına və regionların sosial-iqtisadi inkişafına töhfə verə bilər.
