Uels Şahzadəsi, Diananın qardaşı Çarlz Spenser bacısının həyatından bəhs edən kitab yazacaq.
AZƏRTAC BBC-yə istinadla xəbər verir ki, “Son nəğmə: Diana, mənim bacım” adlı kitabın gələn ay Böyük Britaniyada işıq üzü görəcəyi gözlənilir. Kitab Şahzadə Diananın ölümündən təxminən 30 il sonra nəşr olunacaq.
Çarlz Spenser kitabı yazmaq qərarından danışarkən bacısı haqqında müsbət danışmaq istədiyini bildirib. O, kitabın insanlara Diananın əslində necə bir insan olduğunu daha yaxşı anlamağa imkan verəcəyinə ümid etdiyini deyib. Çarlz Spenser bacısını sevgi və xarizma ilə dolu, eyni zamanda, özünə şübhələri olan, dinamik və bənzərsiz şəxsiyyət kimi xarakterizə edib.
O bildirib ki, bacısının ölümünün 30-cu ildönümü yaxınlaşdıqca onunla bağlı müsahibə təklifləri yenidən artıb. Çarlz Spenserin sözlərinə görə, bu, xatirə və düşüncələrini birdəfəlik qələmə almaq qərarına gəlməsinə səbəb olub. O, illər ərzində həqiqətə uyğun olmayan bir sıra fikirlərin qəbul edilmiş həqiqətə çevrildiyini diqqətə çatdırıb və kitabın əsas məqsədinin Diananın həyatını qardaşının baxış bucağından həqiqətəuyğun şəkildə təqdim etmək olduğunu vurğulayıb.
Çarlz Spenser 1997-ci ilin sentyabrında Vestminster Abbatlığında keçirilən dəfn mərasimində də bacısı haqqında vida nitqi söyləyib.
Qeyd edək ki, Şahzadə Diana 1997-ci ildə Parisdə baş verən avtomobil qəzasından sonra 36 yaşında vəfat edib. Onun oğlanları Uilyam və Harri həmin vaxt müvafiq olaraq 15 və 12 yaşlarında olublar. Diana bu il iyulun 1-də 65 yaşını qeyd edəcəkdi.
