Rumıniyanın dəmir yolu və nəqliyyat sahəsində ixtisaslaşmış “Club Feroviar” nəşri yazır ki, Bakı–Tbilisi–Qars dəmir yolu xəttinin fəaliyyətə başlaması və yükdaşıma imkanlarının genişləndirilməsi məqsədilə yeni əməkdaşlıq sazişi imzalanıb.
AZƏRTAC xəbər verir ki, məqalədə layihənin Asiya ilə Avropa arasında Orta Dəhlizin əsas nəqliyyat bağlantılarından biri hesab olunduğu, son illərdə geosiyasi və iqtisadi əhəmiyyətinin daha da artdığı qeyd olunub. Nəşrin yazdığına görə, yeni razılaşma dəmir yolu infrastrukturunun modernləşdirilməsi, yük dövriyyəsinin artırılması və logistika proseslərinin sürətləndirilməsini nəzərdə tutur.
Məlumatda qeyd olunur ki, Bakı–Tbilisi–Qars xətti Azərbaycan, Gürcüstan və Türkiyə arasında strateji nəqliyyat əməkdaşlığının əsas layihələrindən biridir. Dəmir yolu marşrutu Çin və Mərkəzi Asiyadan gələn yüklərin Qafqaz və Türkiyə üzərindən Avropaya daha qısa müddətdə çatdırılmasına imkan yaradır.
Məqalədə vurğulanır ki, Ukraynadakı müharibədən sonra Avropa və Asiya arasında alternativ tranzit marşrutlarına maraq əhəmiyyətli dərəcədə artıb. Bu baxımdan Orta Dəhliz və Bakı–Tbilisi–Qars xətti yeni geosiyasi və iqtisadi reallıqlarda strateji layihə kimi qiymətləndirilir.
Nəşr qeyd edir ki, Azərbaycan son illərdə dəmir yolu və logistika infrastrukturuna irihəcmli investisiyalar yatıraraq regionun əsas tranzit mərkəzlərindən birinə çevrilməyə çalışır. Bakı Beynəlxalq Dəniz Ticarət Limanı, Ələt azad iqtisadi zonası və Orta Dəhliz layihələri bu strategiyanın əsas elementləri hesab olunur.
Məqalədə bildirilir ki, xəttin modernləşdirilməsi nəticəsində illik yükdaşıma həcminin əhəmiyyətli dərəcədə artırılması planlaşdırılır. Bu isə Avropa ilə Asiya arasında ticarət əlaqələrinin sürətlənməsinə və logistika xərclərinin azalmasına təsir göstərə bilər.
Məlumatda Rumıniyanın da Qara dəniz regionunda artan roluna diqqət çəkilir. Xüsusilə Konstansa limanının Orta Dəhliz ilə inteqrasiyası Avropa İttifaqının nəqliyyat və enerji strategiyası baxımından mühüm istiqamətlərdən biri kimi qiymətləndirilir.
Məqalədə vurğulanır ki, Bakı–Tbilisi–Qars dəmir yolu xətti artıq yalnız regional layihə deyil, Avropa ilə Asiya arasında strateji ticarət və logistika bağlantısının əsas hissəsinə çevrilir.
