Türkiyə və Qazaxıstan müdafiə-sənaye kompleksi sahəsində, o cümlədən birgə istehsalın qurulmasını nəzərdə tutan yeni layihələrin həyata keçirilməsi ilə bağlı siyasi iradəni təsdiqləyiblər. İki ölkə arasında bu istiqamətdə fəal əməkdaşlıq uzun müddətdir davam edir.
AZƏRTAC xəbər verir ki, bu fikirləri Türkiyə Prezidenti Rəcəb Tayyib Ərdoğan Astanada keçirilən Türkiyə-Qazaxıstan biznes-forumunda səsləndirib.
O, Qazaxıstanı Mərkəzi Asiyanın ən güclü iqtisadiyyatına malik ölkəsi adlandırıb. “Ötən ilin yekunlarına görə, Qazaxıstanın xarici ticarət dövriyyəsi 145 milyard dollara çatıb, ÜDM artımı heyrətamiz 6,5 faiz təşkil edib, adambaşına düşən gəlir isə 15 min dollara yaxınlaşıb. Astana Ankara ilə ticarət tərəfdaşları arasında Türk dünyasında birinci yerə yüksəlib”, – deyə Türkiyə Prezidenti bildirib.
Onun sözlərinə görə, Qazaxıstan iqtisadiyyatının müxtəlif sektorlarına ümumilikdə 6 milyard dollar sərmayə yatırmış 5,5 minədək Türkiyə şirkəti təkcə bu ölkənin rifahına deyil, həm də Ankara ilə Astana arasında qardaşlıq münasibətlərinə töhfə verir.
Türkiyənin dövlət başçısı dəmir yolu xətlərinin, liman infrastrukturunun və rəqəmsal gömrük sistemlərinin inteqrasiyası yolu ilə Orta Dəhlizin inkişaf etdirilməsi istiqamətində göstərilən səylərə diqqət çəkib. “Ölkələrimizi bir-birinə yaxınlaşdırmaqla Avrasiya regionunun qlobal iqtisadiyyatda rəqabət qabiliyyətini artırmağa çalışırıq”, – deyə Rəcəb Tayyib Ərdoğan bildirib.
Ərdoğan, həmçinin Ankaranın “Qazaxıstandan böyük həcmdə neftin Türkiyə vasitəsilə dünya bazarlarına nəqlinə” hazır olduğunu təsdiqləyib.
