Qərəzindən əl çəkə bilməyən Fransa

Rəsmi Paris daxili böhranları və məhv olmuş reputasiyası barədə düşünsə daha yaxşı olar 

Fransa Azərbaycanla münasibətlərdə qərəzli və destruktiv mövqeyini davam etdirir. Bu ölkənin pozuculuq fəaliyyəti diplomatik fikir ayrılıqları çərçivəsini aşaraq hibrid müharibə müstəvisinə keçib. 

Azərbaycanın öz suverenliyini tam bərpa etməsi və beynəlxalq arenada müstəqil güc mərkəzinə çevrilməsi Yelisey sarayında narahatlıq yaratmaqda davam edir. Daxili siyasi böhranları və Afrika başda olmaqla qlobal miqyasda itirdiyi nüfuzu fonunda bu ölkə diqqəti yayındırmaq üçün yenə Azərbaycanı hədəf seçib. "France 24" adlı media orqanında dərc olunan əsassız iddialarla dolu material da Parisin Azərbaycana münasibətinin bariz göstəricisidir. 

Bakıya yönəlik təxribatları aktivləşdirmək Makron administrasiyasının həm Fransa daxilində, həm də qlobal arenada yaşadığı ciddi nüfuz böhranı ilə birbaşa bağlıdır. "Sarı jiletlilər"in etirazları, cəmiyyətdə böyük rezonans doğuran pensiya islahatları, idarəolunmaz miqrasiya dalğası və daxili təhlükəsizlik problemləri xalqın hakimiyyətə olan inamını minimuma endirib. Belə bir çıxılmaz şəraitdə cəmiyyətdəki etimad böhranını pərdələmək və diqqəti daxili uğursuzluqlardan yayındırmaq üçün Yelisey sarayı klassik siyasi manipulyasiya texnologiyasına əl atır. Yəni süni xarici gündəm yaratmaqla ölkə ictimaiyyətinin tənqid hədəfindən müvəqqəti də olsa qurtulmaq niyyəti güdür. 

Bu mənada Bakının hədəf seçilməsi kortəbii addım deyil, düşünülmüş gedişdir. Azərbaycan Fransanın onilliklər boyu toxunulmaz saxladığı tabunu - Parisin neokolonializm siyasətini, dənizaşırı ərazilərdə törətdiyi insan haqları pozuntularını beynəlxalq müstəvidə açıq şəkildə ifşa etməyi bacarıb. Xüsusilə Bakı Təşəbbüs Qrupunun (BTQ) yarandığı gündən etibarən göstərdiyi fəallıq Parisin ciddi təşvişinə səbəb olub. BTQ dekolonizasiya məsələsini lokal çərçivədən çıxararaq fundamental insan hüquqları və xalqların öz müqəddəratını təyin etməsi prizmasından qlobal gündəliyə daşıyıb. Müstəmləkə idarəçiliyi altında əzilən xalqların səsini dünyaya çatdıran rəsmi Bakının bu fəallığı illərdir başqalarına "demokratiya dərsi" keçən Fransanı indi öz idarəetmə metodlarına görə beynəlxalq hesabat vermək məcburiyyətində qoyub. 

Azərbaycana qara yaxmağa çalışan Fransa öz nəzarətindəki torpaqlarda törətdiyi qanunsuzluqları ört-basdır etməyə çalışır. Məsələn, Yeni Kaledoniyada azadlıq və müstəqillik istəyən yerli xalqa qarşı tətbiq edilən sərt qadağalar, kütləvi həbslər və aksiyaların güclə yatırılması Fransa mətbuatında demək olar ki, işıqlandırılmır. Oxşar şəkildə, Korsikada yerli dilin və identikliyin tanınması uğrunda aparılan uzunmüddətli mübarizə və adanın muxtariyyət tələbləri Parisin daxili etnik-siyasi böhranının göstəricisidir, lakin media bu reallıqları ictimaiyyətdən gizlətməyə çalışır. 

Makron administrasiyasının qərəzi bəzən idman və mədəniyyət müstəvisinə də sirayət edir. 2024-cü il Paris Yay Olimpiya Oyunlarının açılış mərasimi zamanı fransalı telejurnalistin idman prinsiplərinə tamamilə zidd olaraq Azərbaycana qarşı nümayiş etdirdiyi açıq təxribat və qeyri-peşəkar davranış bunun bariz sübutudur.

Fransanın aşkar qərəzi və qeyri-obyektiv mövqeyi xüsusilə 2020-ci il 44 günlük Vətən müharibəsində Azərbaycanın tarixi qələbəsindən sonra daha da dərinləşdi.

Bu kontekstdə Fransanın media qurumlarının regionda münaqişənin hüquqi və fiziki olaraq bitməsinə, Azərbaycanın ərazi bütövlüyünün qlobal səviyyədə təsdiqlənməsinə baxmayaraq, köhnəlmiş ambisiyaları israrla gündəmə gətirməsi hibrid strategiyanın tərkib hissəsidir. Bu addımlar həm də Azərbaycanın qlobal aləmdə artan nüfuzuna və regional uğurlarına qarşı bir qısqanclıq reaksiyasıdır. 

Eyni zamanda Fransa hökuməti regiondakı reallıqları tamamilə kənara qoyaraq, birtərəfli qaydada Ermənistanın maraqlarının müdafiəçisi və vəkili kimi çıxış edir. Makronun İrəvana səfərləri zamanı nümayiş etdirdiyi qeyri-ciddi, diplomatik etiketdən uzaq davranışları və bölgədəki reallıqları görməzdən gələn absurd bəyanatları Fransanın qərəzli siyasətinin növbəti göstəricisi oldu. 

Fransa dünyada zəifləyən geosiyasi mövqeyini, qlobal uğursuzluqlarını və zədələnmiş reputasiyasını kompensasiya etmək üçün məqsədyönlü strategiya həyata keçirir. Lakin Paris anlamalıdır ki, Cənubi Qafqazdakı yeni reallıqları güc yolu ilə dəyişmək cəhdləri iflasa məhkumdur. Bakıya qarşı aparılan bu hibrid müharibə və qarayaxma kampaniyaları Azərbaycanı öz müstəqil xarici siyasətindən və qlobal miqyasda apardığı ədalətli mübarizədən döndərə bilməz. Əksinə, Paris selektiv ritorikası və qərəzli hücumları ilə, sadəcə, öz diplomatik təcridini sürətləndirir. 

Dənizaşırı ərazilərdə haqq səsini ucaldan xalqların Bakıdan dəstək tapması da göstərir ki, tarixin çarxını geriyə fırlatmaq və neokolonialist ambisiyaları "sülh" adı altında pərdələmək artıq illüziyadır. Yaxşı olar ki, Paris başqalarını ittiham etmək əvəzinə, gec olmadan öz daxili böhranları və zədələnmiş reputasiyası barədə düşünsün. 

İsmayıl QOCAYEV, 

"Azərbaycan"