Dünyanın müxtəlif ölkələrindən olan alimlərin iştirakı ilə keçirilən irimiqyaslı klinik sınaq uşaqlarda sepsis (qan zəhərlənməsi) müalicəsi ilə bağlı illərdir davam edən suala aydınlıq gətirib. Araşdırma nəticəsində məlum olub ki, xəstəliyin ilkin mərhələsində istifadə olunan iki əsas maye növü eyni dərəcədə təhlükəsiz və faydalıdır.
“MedicalXpress” portalının məlumatına görə, tədqiqat ABŞ, Kanada, Avstraliya, Yeni Zelandiya və Kosta-Rikada aparılıb. Sınaqlara 9 min-dən çox uşaq cəlb olunub.
Həkimlər “balanslaşdırılmış maye” (insan plazmasına yaxın tərkibli) ilə standart “0,9 faizli duz məhlulu”nu (fizioloji məhlul) müqayisə ediblər. Hər iki mayenin böyrək fəaliyyətinə və ümumi sağalma prosesinə təsiri demək olar ki, eyni olub. Ciddi böyrək problemləri balanslaşdırılmış maye qəbul edən uşaqların 3,4 faizində, duz məhlulu qəbul edənlərin isə 3 faizində müşahidə edilib. Bu fərq tibbi baxımdan əhəmiyyətli hesab olunmur.
Araşdırmanın rəhbərlərindən olan Fren Balamut qeyd edib ki, bu nəticə bütün dünya həkimləri üçün yaxşı xəbərdir. İndi təcili yardım zamanı həkimlər əllərinin altında olan hər hansı bir maye ilə vaxt itirmədən müalicəyə başlaya bilərlər.
Qeyd edək ki, sepsis infeksiyaya qarşı bədənin verdiyi hədsiz reaksiya nəticəsində daxili orqanların sıradan çıxmasıdır. Hər il minlərlə uşaq bu diaqnozla xəstəxanalara yerləşdirilir və onların təxminən 10 faizi həyatını itirmə riski ilə üzləşir. Bu araşdırma isə sübut edir ki, bahalı və ya xüsusi mayelər axtarmağa ehtiyac yoxdur, hər kəs üçün əlçatan olan standart məhlullar da uşaqların həyatını xilas etmək üçün kifayət edir.
Təhminə VERDİYEVA,
“Azərbaycan”
