Xəstəlik ocaqlarında sanitar-gigiyenik və əksepidemik tədbirlər həyata keçirilir.
AZƏRTAC xəbər verir ki, bunu Səhiyyə Nazirliyinin Respublika Gigiyena və Epidemiologiya Mərkəzinin Epidemiologiya şöbəsinin müdiri Aygün İsmayılova açıqlayıb.
Onun sözlərinə görə, yoluxucu xəstəlik aşkar edildikdə onun yayılmasının qarşısını almaq üçün həkim və ya tibb işçisi həmin halı dərhal yerli gigiyena və epidemiologiya mərkəzinə bildirir: “Xəstə haqqında tam məlumat toplanır, yaşayış, iş və təhsil yerləri, xəstəliyin başlama tarixi, ilkin simptomlar və kimlərlə təmasda olduğu qeyd edilir. Bu məlumatlar əsasında epidemioloji araşdırma aparılır. Yoluxucu xəstəliyin digər insanlara keçməməsi üçün xəstə evdə və ya xəstəxanada təcrid olunur. Təcrid müddəti xəstəliyin növündən asılı olaraq dəyişir. Xəstə olan evdə və ya müəssisədə dezinfeksiya işləri aparılır. Xəstənin olduğu otaq, əşyalar, qab-qacaq və geyimlər xüsusi vasitələrlə dezinfeksiya edilir. Xəstə ilə təmasda olan şəxslər (ailə üzvləri, iş yoldaşları, sinif yoldaşları və digər) epidemioloji müşahidə altına alınır, lazım gələrsə, analizlər verilir və ya profilaktik müalicə və ya peyvənd tədbirləri aparılır”.
Aygün İsmayılova bildirib ki, əhali arasında maarifləndirmə işləri davam edir. “Yoluxucu xəstəliklərin yayılma yolları, əllərin yuyulmasının və şəxsi gigiyenanın əhəmiyyəti, qida və suyun təmiz saxlanması və tibbi maskadan düzgün istifadə qaydaları izah edilir. Eyni zamanda, yaşayış yerlərində sanitar-gigiyenik şəraitin yaxşılaşdırılması (zibilin vaxtında yığılması, su təmizliyi, kanalizasiya sisteminin işlək vəziyyətdə olması və digər) təmin olunur. Bütün tədbirlərdən sonra ocaqda epidemioloji vəziyyət qiymətləndirilir. Əgər yeni yoluxma qeydə alınmazsa, ocaq epidemioloji cəhətdən təhlükəsiz hesab olunur”,- deyə A.İsmayılova əlavə edib.
19 (1)jpg_1771885865.jpg)
jpg_1763452189.jpg)
