Milli mətbuat günü ərəfəsində Milli Kitabxananın
Arxiv fondu "Əkinçi”, "İqbal”, "Açıq söz”, "Həyat”,”İqdam” və digər ilk dövri mətbuat
nümunələrimizin orijinal nüsxələri ilə zənginləşmişdir.
Bu günlərdə Heydər Əliyev Fondu və Mədəniyyət
Nazirliyi ilə Milli Kitabxananın ötən ildən həyata keçirməyə başladığı birgə layihə çərçivəsində XIX əsrdə və XX əsrin
əvvəllərində Azərbaycanda nəşr olunan milli mətbuatımızın ilk nümunələrindən olan
"Əkinçi”, "İqbal”, "Açıq söz”, "Həyat”, "İqdam”, "Yeni İqbal”, "Yeni İqdam” və digər
ilk dövri mətbuat nəşrlərimizin orijinal nüsxələrinin tam komplektləri Milli Kitabxanamızın Arxiv fonduna
daxil olmuşdur.
Uzun müddət Milli Kitabxana bu qəzetlərin
Sankt-Peterburq, Moskva, Daşkənd, Aşqabad və digər şəhərlərdəki kitabxanalardan
topladığı foto və ksero surətlərini oxucularına
təqdim edirdi və həmin qəzetlər əski əlifba (ərəb əlifbası) ilə çap olunduğundan
onların surətlərində hərflərin üzərində və altında qoyulan nöqtələr və digər işarələr
yaxşı oxunmadığına görə bir sıra çətinliklər yaranırdı. Artıq bu çətinliklər arxada
qalmışdır və Milli Kitabxana əksər ilk milli mətbuat orqanlarımızın orijinal nüsxələrini
öz oxucularına çatdırmaq imkanı əldə etmişdir. Hazırda həmin nəşrlərin rəqəmsallaşdırılması
prosesinə hazırlıqlar görülür və tezliklə onların elektron nüsxələri də kitabxanamızın
saytı vasitəsilə oxucularımıza təqdim olunacaqdır.
Məlumat üçün bildirirəm ki, ötən il Heydər
Əliyev Fondunun dəstəyi ilə həyata keçirilən "Milli-Mənəvi sərvətlərimizin Vətənə
qayıdışı” layihəsi çərçivəsində Böyük Azərbaycan şairi İmadəddin Nəsiminin dünya milli kitabxanalarında mühafizə olunan
31 nadir əlyazmasının, Nizami Gəncəvinin Azərbaycan elminə məlum olmayan "Xəmsə”
nüsxəsinin və Məhəmməd Füzulinin "Divanı”nın rəqəmsal nüsxələrinin Milli Kitabxanamıza
gətirilməsi təmin olunmuşdur.
Fürsətdən istifadə edərək bu işdə bizə göstərdiyi
dəstəyə görə Heydər Əliyev Fonduna və Fondun vitse-prezidenti Leyla xanım Əliyevaya
kitabxanamızın oxucuları və kollektivi adından təşəkkürümüzü bildirirəm.
Kərim TAHİROV,
Azərbaycan
Milli Kitabxanasının direktoru, Əməkdar mədəniyyət işçisi, professor
jpeg_1765387863.jpeg)
