Microsoft keçən həftə Outlook, Exchange və bir sıra digər vacib ofis proqramlarının fəaliyyətini iflic edən qlobal nasazlığın köklü səbəblərini müəyyən edib.
Ofis proqram təminatı sahəsinin nəhəngi ilkin hesabat yayımlayıb. Hesabatda şirkət xidmətlərinin 24 saat ərzində sıradan çıxmasına səbəb olan üç amil göstərilib: aylar əvvəldən mövcud olan bir proqram xətası, daxili əlaqələrdəki nasazlıqlar və server tutumu məsələləri. Microsoft rəhbərlərinin sözlərinə görə, bu amillərin hər biri ayrı-ayrılıqda asanlıqla aradan qaldırıla bilərdi, lakin onların birləşməsi aradan qaldırılması daha çətin olan ciddi bir nasazlığa yol açıb.
“Microsoft”un "Copilot", "Agents" və "Platform" üzrə icraçı vitse-prezidenti Çarlz Lamanna "X" sosial şəbəkəsindəki paylaşımında bildirib ki, iyul ayından bəri mövcud olan gizli bir nasazlıq və ya qüsur Microsoft serverlərinin həddindən artıq yüklənməsinə və cavab verməməsinə səbəb olub.
Lamanna qeyd edib ki, şirkətin adətən iki şəbəkə şlüzü (gateway) – yəni ayrı-ayrı sistemləri birləşdirən və məlumat mübadiləsinə imkan verən giriş-çıxış nöqtələri mövcuddur. Lakin bunlardan biri "Microsoft Teams" üçün işləmədiyindən əsas şlüz həddindən artıq yüklənib. Bundan əlavə, əvvəlki gündən qalma, bununla əlaqəsi olmayan başqa bir problem səbəbindən şirkətin server gücünün 14%-dən çoxu da sıradan çıxmışdı.
Lamannanın sözlərinə görə, şirkət xətanı aradan qaldırmaqda çətinlik çəkib, çünki xəta aylar əvvəl yaranıb, ona görə də qüsuru aradan qaldırmaq üçün son dəyişikliyi geri qaytarmaq asan olmayacaq.
Analitiklər bildirirlər ki, Microsoft"dakı qlobal nasazlıq şirkətlərin tək bir əməliyyat sistemindən nə dərəcədə asılı olduqlarını nəzərdən keçirmələri zərurətini önə çıxarır.
"NCC Group" şirkətinin kiberkəşfiyyat və insidentlərə reaksiya üzrə vitse-prezidenti Mett Hall qeyd edib ki, bu, təkcə kiberdayanıqlılığın deyil, həm də biznes dayanıqlılığının vacibliyini göstərən bariz nümunədir. Xəstəxanaların, məktəblərin və digər mühüm xidmət sahələrinin bundan təsirlənməsi, səbəbindən asılı olmayaraq, sistem nasazlığının nə qədər genişmiqyaslı təsirə malik ola biləcəyini nümayiş etdirir.
Qeyd edək ki, ötən həftə “Microsoft”un bri sıra proqramlarında problemlər yaranmışdı və istifadəçilər hesablarından istifadə edə bilmirdilər.
Əsmər QARDAŞXANOVA,
“Azərbaycan”