Rəqəmsal bacarıqlar boşluğunu aradan qaldırmaq üçün gənclər yalnız faydalanan deyil, həm də həllərin həmmüəllifləri olmalıdırlar.
AZƏRTAC xəbər verir ki, bu fikirləri “Huawei” şirkətinin Strategiya və Sənaye İnkişafı üzrə baş direktoru Əhməd Riyad Bakıda keçirilən “Qlobal Gənclər Günü”nün sessiyasında çıxışında deyib.
Əhməd Riyad “Huawei” ilə Beynəlxalq Telekommunikasiya İttifaqı (ITU) arasında əməkdaşlıq çərçivəsində həyata keçirilən “Generation Connect Young Leadership Program” (GCYLP) proqramı haqqında məlumat verib. Onun sözlərinə görə, hər il müxtəlif ölkələrdən seçilən 30 gənc bu proqram vasitəsilə mentorluq, peşəkar təlimlər və ilkin maliyyə dəstəyi alır: “Onlar yalnız proqramın iştirakçıları deyil, həm də öz icmalarında rəqəmsal həllər hazırlayan liderlərdir. Burada azərbaycanlı gənclər də var. Biz inanırıq ki, innovasiya və bacarıqlar məhz yerli səviyyədə - problemi bilən gənclər tərəfindən formalaşdırılmalıdır”.
Tədbirdə, həmçinin “Huawei”nin ITU-nun “Partner2Connect” rəqəmsal koalisiyasına verdiyi öhdəliklərdən danışılıb. Şirkət 2025-ci ilədək 80 ölkədə, o cümlədən BMT-nin ən az inkişaf etmiş 44 ölkəsindən 34-də, ümumilikdə 120 milyon insanı internetə çıxışla təmin etmək niyyətindədir.
Ə.Riyad bildirib ki, artıq 90 milyon nəfər bu təşəbbüsdən yararlanıb.
Əhməd Riyad “Tech4All” və “Skills on Wheels” kimi layihələri də qeyd edərək, xüsusilə Günəş enerjili rəqəmsal tədris yük maşını – “DJ Truck” haqqında danışıb. Bu təşəbbüs çərçivəsində kənd və ucqar ərazilərdə gənclərə rəqəmsal bacarıqlar, kibertəhlükəsizlik və onlayn biznes təlimləri keçirilir.
“Huawei İKT Akademiyası” və “Seeds for the Future” proqramlarının da geniş şəkildə tətbiq olunduğunu vurğulayan Ə.Riyad 100-dən çox ölkədə 1000 universitetlə əməkdaşlıq edildiyini, gənclərə həm texniki bacarıqlar, həm də startap və karyera dəstəyi göstərildiyini bildirib.
“İnkişaf üçün beynəlxalq təşkilatlar qlobal problemləri müəyyənləşdirir, biz isə bu problemlərin texnoloji həllərini təklif edirik. ITU ilə strateji tərəfdaşlıq rəqəmsal uçurumun aradan qaldırılması və çoxtərəfli əməkdaşlıq üçün ideal platformadır”, - deyən Ə.Riyad fikirlərini yekunlaşdırıb.
jpg_1773126825.jpg)
jpg_1773043855.jpg)
