Fransanın ərzaq balansı təxminən yarım əsrdən sonra ilk dəfə mənfi ola bilər. Bununla bağlı ölkənin kənd təsərrüfatı naziri Anni Jenever "böyük qida oyanışı" elan edib. Paris yaxınlığındakı ən böyük topdansatış bazarı olan Rungisdə o, növbəti onillik üçün ərzaq strategiyası hazırlamaq üçün fermerlər, sahibkarlar və mütəxəssislərlə ümummilli məsləhətləşmələrə başlayıb.
Hazırda Fransa quzu ətinin 60%-ni, meyvə, tərəvəz və toyuq ətinin yarısını və mal ətinin 25%-ni idxal edir.
"Fransa daha yaxşı yemək üçün daha çox istehsal etməlidir", - deyə A. Jenever bəyan edib. O, geosiyasi vəziyyətə işarə edərək təkliflərini "qida məsələsində yenidənqurma" adlandırıb. O qeyd edib ki, son illərdə ABŞ, Çin və Rusiya kənd təsərrüfatına dövlət investisiyalarını əhəmiyyətli dərəcədə artırıb, Avropa İttifaqı isə əksinə, azaldıb.
Fermerlər birlikləri A. Jeneverin və ümumiyyətlə Fransa hökumətinin mövqeyini tənqid etsələr də, nazirin çağırışına cavab verəcəklərinə söz verirlər.
Kənd təsərrüfatı işçiləri "qida oyanışı" termininin özündən narazıdırlar: "Sektorun yatdığını düşünmək olar, lakin bunun tam əksi doğrudur – məhz fermerlər heç vaxt yatmayıblar, onlar ayıq, səfərbərdirlər və vəziyyətin ciddiliyindən tez-tez qəzəblənirlər", - FNSEA həmkarlar ittifaqı bildirib.
Fermerlər qeyd edirlər ki, mövcud vəziyyətin - qiymətlərin artması və istehsalın azalmasının əsas səbəblərindən biri də onlara qarşı tətbiq edilən ekoloji məhdudiyyətlərdir. Onlar hökumətin mövqeyini "ziddiyyətli" adlandırırlar: bir tərəfdən Fransada kənd təsərrüfatı istehsalının vəziyyəti ilə bağlı narahatlıq, digər tərəfdən isə Mərakeş, Ukrayna, Meksika, Yeni Zelandiya və Merkosur bloku ilə ticarət müqavilələri üçün "yaşıl işıq" yandırılıb ki, bu da fermerlərin fikrincə, Fransa məhsullarının rəqabət qabiliyyətini daha da azaldacaq.
Rizvan CƏFƏROV,
“Azərbaycan”
19 (1)jpg_1771885865.jpg)
