“Euronews” Qazaxıstanın Bakı-Tbilisi-Ceyhan (BTC) boru kəməri ilə neft ixracını artırmağı planlaşdırması barədə məqalə dərc edib.
AZƏRTAC xəbər verir ki, məqalədə Prezident Kasım-Jomart Tokayev və Baş nazir İrakli Kobaxidze arasında Astanada keçirilən danışıqlardan sonra Qazaxıstan Gürcüstanla strateji əlaqələrini dərinləşdirərək Bakı-Tbilisi-Ceyhan boru kəməri ilə neft ixracını artırmağı planlaşdırıdığı bildirilir.
Məlumata görə, Astanada keçirilən yüksəksəviyyəli danışıqlar zamanı iqtisadi əməkdaşlığın gücləndirilməsi barədə razılıq əldə olunub. Bu danışıqlara Bakı-Tbilisi-Ceyhan boru kəməri vasitəsilə neft daşınmalarının artırılması planları da daxildir.
“Euronews” yazır ki, Qazaxıstanın açıqlaması rəsmi Astananın Orta Dəhliz kimi də tanınan Trans-Xəzər Beynəlxalq Nəqliyyat Marşrutu (TBNM) vasitəsilə ixrac marşrutlarını şaxələndirməyə davam etdiyi bir vaxta təsadüf edir.
Nəşr bildirir ki, marşrut üzrə tranzit həcmləri son 5 ildə təxminən 4 dəfə artıb. Qazaxıstanın hesablamalarına görə, 2029-cu ilə qədər Çini Qazaxıstan, Xəzər dənizi, Azərbaycan və Gürcüstan vasitəsilə Avropaya birləşdirən dəhlizdə ildə 3000-ə qədər konteyner qatarı hərəkət edəcək.
Məqalədə bildirilir ki, rəsmi Astana, həmçinin Gürcüstanın Qara dəniz limanlarında əməkdaşlığı gücləndirməyi planlaşdırır.
“Qazaxıstanın “Kaztransoil” şirkətinə məxsus Batumi neft terminalı ilə paralel olaraq, ölkə Potidəki logistika infrastrukturunu genişləndirir və ötən il Qazaxıstan investisiyası ilə yeni multimodal terminalın açılışı olub. Rəsmilər, həmçinin Anakliya limanını da perspektivli layihə adlandırıblar”, - deyə “Euronews” yazır.
jpg_1782946307.jpg)
