Qafqaz Müsəlmanları İdarəsinin (QMİ) sədri, şeyxülislam Allahşükür Paşazadənin müəllifi olduğu, Azərbaycan və özbək dillərində nəşr edilmiş “Qardaşlıq və Müttəfiqliyin Zirvəsi” kitab-albomu iyulun 7-də Özbəkistanın paytaxtı Daşkənddə ictimaiyyətə təqdim olunub.
QMİ-nin Mətbuat xidmətindən AZƏRTAC-a bildirilib ki, təqdimat mərasimində Özbəkistan Prezidentinin müşaviri Şuhrat Qaniyev, Millətlərarası münasibətlər və xaricdəki həmvətənlərin məsələləri komitəsinin sədri Qahramon Sarıyev, dövlət və ictimaiyyət nümayəndələri, elm və mədəniyyət xadimləri, bu ölkədə yaşayan azərbaycanlılar, həmçinin burada yerləşən Azərbaycan Mədəniyyət Mərkəzinin rəhbərliyi çıxış edib. Natiqlər bildiriblər ki, kitab-albom Azərbaycan ilə Özbəkistan arasında tarixi dostluq, qardaşlıq və müttəfiqlik münasibətlərini, iki xalqın ortaq mənəvi dəyərlərini və dini əlaqələrini əks etdirən əhəmiyyətli nəşrdir.
Ümumilikdə 216 səhifədən ibarət olan kitab-albomda Azərbaycan Prezidenti İlham Əliyev ilə Özbəkistan Prezidenti Şavkat Mirziyoyev arasında formalaşmış qardaşlıq münasibətlərinin dövlətlərarası əməkdaşlığın müttəfiqlik səviyyəsinə yüksəlməsinə verdiyi töhfələr və dini-mənəvi əlaqələrin inkişafı əksini tapıb. Nəşrdə, həmçinin şeyxülislam Allahşükür Paşazadənin müxtəlif illərdə Azərbaycanda və Özbəkistanda keçirilən tədbirlərdəki çıxışları, məruzələri, məktubları, konfrans materialları və zəngin fotoşəkillər toplanıb.
Kitabın nəşrinə məsul şəxs QMİ sədrinin birinci müavini, müfti Salman Musayev, tərtibçisi isə QMİ Mətbuat xidmətinin rəhbəri, tarix üzrə fəlsəfə doktoru Rəhimə Dadaşovadır.
Təqdimat mərasimində çıxış edən şeyxülislam Allahşükür Paşazadə bildirib ki, Azərbaycan ilə Özbəkistan arasında münasibətlər ortaq tarixə, dini və mənəvi dəyərlərə söykənir. O, müasir Özbəkistanın inkişafını, İslam sivilizasiyasının tədqiqi və təbliği istiqamətində həyata keçirilən layihələri yüksək qiymətləndirib.
Şeyxülislam qeyd edib ki, yalnız əsl liderlər xalqın milli-mənəvi irsinin qorunmasına və dünyada tanıdılmasına davamlı töhfə verirlər. Prezident İlham Əliyev və Prezident Şavkat Mirziyoyev bu baxımdan iki qardaş xalqın ortaq dəyərlərinin yaşadılması və gələcək nəsillərə ötürülməsi istiqamətində mühüm xidmətlər göstərirlər.
Sonda bildirilib ki, “Qardaşlıq və Müttəfiqliyin Zirvəsi” kitab-albomu Azərbaycan ilə Özbəkistan arasında dostluq, qardaşlıq və müttəfiqlik münasibətlərinin, həmçinin ortaq dini-mənəvi dəyərlərin gələcək nəsillərə çatdırılması baxımından mühüm əhəmiyyət daşıyır.
