"Avropa İttifaqının bəzi siyasətçiləri, Avropa Parlamenti və Avropa Şurası strukturlarında olan şəxslər elə bəyanatlar verirlər ki, onların Cənubi Qafqaz regionunda sülhün inkişafında maraqlı olub-olmadığı sual doğurur".
Bu sözləri AZƏRTAC-a müsahibəsində "Vahid Neytral Gürcüstan" partiyasının regional katibi, politoloq Levan Nikoleişvili bildirib. "Bu gün biz bunu Azərbaycan, Gürcüstan və Ermənistanın nümunəsində də görürük. Gürcüstan rəsmi olaraq Avropa İttifaqına namizəd ölkə statusuna malikdir. Lakin eyni zamanda müxtəlif sanksiya mexanizmləri ilə üzləşir. Bu addımlar maneə yaradır və əslində Gürcüstanın inkişafına təsir edir. Bu isə bir daha belə şübhələr yaradır ki, onların məqsədi Gürcüstana xidmət etmək və onu qorumaq deyil, əksinə, ölkəni öz təsirləri altında saxlamaqdır", - deyə o qeyd edib.
Politoloq bildirib ki, oxşar siyasət Cənubi Qafqazın digər istiqamətlərində də müşahidə olunur: "Azərbaycana qarşı siyasətə fikir verək. Azərbaycan ilə dost görüntüsü yaradanlar, əslində, dost olmayan siyasət yürüdürlər. Bunu anlamayan insanlar ən azı müəyyən düşüncə və analiz qabiliyyətinə malik olmalıdırlar. Onlar Azərbaycanın harada yerləşdiyini, hansı resurslara malik olduğunu, enerji imkanlarını və iqtisadi inkişafını düzgün qiymətləndirə bilmirlər. Unudurlar ki, Azərbaycana öz siyasətlərini qəbul etdirməyə çalışmaq, onun milli maraqlarına zidd addımlar atmaq cəhdləri çox sadə cavabla qarşılaşacaq".
L.Nikoleişvili deyib: "Onlar ya Prezident İlham Əliyevin lider kimi rolunu və onun həm Azərbaycan, həm də Cənubi Qafqaz üçün əhəmiyyətini başa düşmürlər, ya da Azərbaycan xalqının mentalitetini, tarixini və mədəniyyətini anlamırlar. Ona görə ki, Azərbaycan imkanlarına və resurslarına sahib olan bir dövlət kimi öz suverenliyini heç vaxt güzəştə getməyəcək və heç bir ölkənin diktəsi ilə hərəkət etməyəcək".
Onun sözlərinə görə, Ermənistan məsələsində bəzi qüvvələr bu dövləti müəyyən istiqamətlərə yönəltməyə çalışırlar və nəticədə Ermənistan müəyyən problemlərlə qarşılaşa bilər.
jpg_1784625855.jpg)
jpg_1784624548.jpg)
