"Bu gün Azərbaycan öz inkişafının yeni mərhələsindədir. Ərazi bütövlüyünün və tam suverenliyinin bərpasından sonra ölkəmizin qarşısında yeni strateji vəzifə dayanır - tarixi Zəfəri uzunmüddətli iqtisadi, texnoloji və geosiyasi inkişafın möhkəm təməlinə çevirmək. Qarabağın və Şərqi Zəngəzurun bərpasına, Orta dəhlizin inkişafına, enerji təhlükəsizliyinin gücləndirilməsinə və rəqəmsal transformasiyaya məhz bu kontekstdə yanaşmaq lazımdır. Bunlar ayrı-ayrı istiqamətlər deyil, Azərbaycanın gələcək inkişaf modelinin bir-biri ilə sıx bağlı elementləridir".
Bu fikirləri AZƏRTAC-a açıqlamasında Yeni Azərbaycan Partiyası Gənclər Birliyinin üzvü, ADA Universitetinin İnkişaf və Diplomatiya İnstitutunun elmi tədqiqatçısı Anastasiya LAVRİNA deyib.
O bildirib ki, azad edilmiş ərazilərin dirçəldilməsi bu prosesdə xüsusi əhəmiyyət daşıyır.
"Qarabağ və Şərqi Zəngəzur bu gün müasir infrastrukturun yaradıldığı, "yaşıl enerji"nin inkişaf etdirildiyi, rəqəmsal texnologiyaların tətbiq olunduğu və yeni iqtisadi mərkəzlərin formalaşdığı bir məkana çevrilir. Azərbaycan dünyaya suverenlik, ərazi bütövlüyü və beynəlxalq hüquq prinsiplərinə əsaslanan öz postmünaqişə bərpa modelini nümayiş etdirir. Eyni zamanda Azərbaycanın geoiqtisadi rolu da dəyişir. Qlobal logistika zəncirlərinin yenidən formalaşdığı bir dövrdə Orta dəhliz Azərbaycanı Şərqlə Qərb arasında mühüm bağlantı mərkəzlərindən birinə çevirir. Enerji sahəsində ölkəmiz artıq özünü etibarlı tərəfdaş kimi təsdiqləyib və bu gün bərpaolunan enerji mənbələrinin inkişafı hesabına bu rolunu daha da genişləndirir. Rəqəmsal transformasiya və süni intellekt isə dövlətin gələcək rəqabət qabiliyyətini müəyyən edən əsas amillərdən birinə çevrilir", - deyə o bildirib.
Anastasiya Lavrinanın sözlərinə görə, Azərbaycanın beynəlxalq nüfuzu bu gün yalnız onun iqtisadi və coğrafi potensialı ilə müəyyən edilmir. Prezident İlham Əliyevin - ölkəmizin ərazi bütövlüyünü və suverenliyini bərpa etmiş qalib Liderin şəxsi siyasi nüfuzu və beynəlxalq hüquq prinsiplərinə əsaslanan ardıcıl mövqeyi də burada xüsusi əhəmiyyət daşıyır.
Ekspert bildirib ki, iştirak etdiyi IV Şuşa Qlobal Media Forumu bu reallığın beynəlxalq səviyyədə necə qəbul olunduğunu aydın şəkildə nümayiş etdirib. "Beynəlxalq media və ekspert ictimaiyyətinin nümayəndələri Prezidentimizin fikrini yalnız Cənubi Qafqazla bağlı deyil, regionun hüdudlarından çox-çox kənarda baş verən proseslər barədə də öyrənməyə çalışırdılar. Azərbaycanın xarici siyasəti ardıcıl, balanslaşdırılmış və müstəqil xarakter daşıyır. Biz dəfələrlə bəyan etdiyimiz kimi, Ukraynanın ərazi bütövlüyünü dəstəkləyir, eyni zamanda Rusiya ilə münasibətlərimizi inkişaf etdiririk. Azərbaycan İsraillə sıx əməkdaşlıq edir və İranla da qarşılıqlı fəaliyyət göstərir, bütün bu münasibətlərdə öz milli maraqlarını əsas tutur. Vaşinqtonla münasibətlər də yeni mərhələyə qədəm qoyub. Azərbaycan və ABŞ rəhbərliyi arasında formalaşmış birbaşa siyasi dialoq ölkəmizin və onun Liderinin artan beynəlxalq nüfuzunun daha bir göstəricisidir", - deyə ekspert bildirib.
Anastasiya Lavrina vurğulayıb ki, Azərbaycanın gələcək inkişaf modeli müstəqil dövlətçilik prinsiplərinə əsaslanır. "Mən Azərbaycanın gələcək inkişaf modelini öz daxili və xarici siyasətini müstəqil şəkildə müəyyən edən, Qarabağı bərpa edən, yeni nəqliyyat və enerji marşrutlarını inkişaf etdirən, müasir texnologiyalara sərmayə qoyan və təhlükəsizliyini gücləndirən qüdrətli və suveren dövlət kimi görürəm. Azərbaycan artıq qlobal transformasiya şəraitində passiv müşahidəçi deyil, yeni geosiyasi reallıqların formalaşmasında söz sahibi olan dövlətlər sırasındadır. Azərbaycan artıq, sadəcə, dəyişən dünya nizamına uyğunlaşmır. Ardıcıl dövlət siyasəti və güclü Liderlik sayəsində ölkəmiz bu yeni sistemdə öz yerini daha da möhkəmləndirir və mövqeyi getdikcə daha çox eşidilmək istənilən dövlətə çevrilir", - deyə Anastasiya Lavrina fikrini yekunlaşdırıb.
jpg_1784625855.jpg)
jpg_1784624548.jpg)
