"Müasir dövrdə geosiyasi və geoiqtisadi proseslərin sürətlə dəyişdiyi bir şəraitdə Azərbaycan ilə Mərkəzi Asiya ölkələri arasında əməkdaşlıq yeni mərhələyə qədəm qoyur. Tarixi, mədəni və mənəvi yaxınlıq üzərində qurulan bu münasibətlər artıq strateji tərəfdaşlıq müstəvisinə yüksələrək regionlararası əlaqələrin mühüm istiqamətlərindən birinə çevrilib".
Bu fikirləri AZƏRTAC-a açıqlamasında türkiyəli siyasi ekspert Cafer Dal bildirib. C.Dal qeyd edib ki, Azərbaycan-Mərkəzi Asiya formatı yalnız regional əməkdaşlıq mexanizmi deyil, eyni zamanda Avrasiya məkanında yeni geosiyasi reallıqların formalaşmasına təsir edən mühüm platformadır.
Ekspertin sözlərinə görə, Azərbaycanın son illərdə həyata keçirdiyi uğurlu xarici siyasət, xüsusilə nəqliyyat, enerji və logistika sahələrində əldə etdiyi nailiyyətlər Mərkəzi Asiya ölkələri ilə əməkdaşlığın genişlənməsi üçün əlverişli zəmin yaradıb: "Azərbaycan və Mərkəzi Asiya dövlətləri arasında əlaqələrin inkişafı ortaq maraqlara əsaslanır. Bu ölkələr bir-birini tamamlayan iqtisadi potensiala malikdir. Azərbaycan Xəzər regionunda mühüm nəqliyyat və enerji qovşağı kimi çıxış edir. Mərkəzi Asiya ölkələri üçün isə Azərbaycan üzərindən dünya bazarlarına çıxış imkanlarının genişlənməsi xüsusi əhəmiyyət daşıyır".
Onun fikrincə, xüsusilə Orta dəhlizin inkişafı Azərbaycan-Mərkəzi Asiya əməkdaşlığının əsas istiqamətlərindən biridir. Bu nəqliyyat marşrutu Asiya ilə Avropa arasında alternativ və etibarlı bağlantı yaradaraq region ölkələrinin tranzit imkanlarını artırır.
"Bakı-Tbilisi-Qars dəmir yolu, Ələt Beynəlxalq Dəniz Ticarət Limanı və digər infrastruktur layihələri Azərbaycanın regional logistika mərkəzi kimi mövqeyini gücləndirib. Bu imkanlar Mərkəzi Asiya ölkələri üçün də böyük iqtisadi perspektivlər açır", - deyə türk ekspert vurğulayıb.
Cafer Dal bildirib ki, enerji sahəsində əməkdaşlıq da Azərbaycan-Mərkəzi Asiya münasibətlərinin mühüm istiqamətlərindəndir. Azərbaycanın Avropanın enerji təhlükəsizliyinə verdiyi töhfə, "yaşıl enerji" layihələri və bərpaolunan enerji sahəsində təşəbbüsləri region ölkələri arasında yeni əməkdaşlıq imkanları formalaşdırır.
Ekspert qeyd edib ki, Azərbaycan-Mərkəzi Asiya formatı türk dünyasında inteqrasiya proseslərinə də mühüm təsir göstərir. Ölkələr arasında siyasi dialoqun güclənməsi, iqtisadi əlaqələrin genişlənməsi və humanitar münasibətlərin inkişafı daha sıx regional əməkdaşlıq üçün möhkəm baza yaradır.
"Bu format həm regional sabitliyə, həm də davamlı iqtisadi inkişafa xidmət edir. Azərbaycan və Mərkəzi Asiya ölkələri arasında əməkdaşlığın dərinləşməsi gələcəkdə yeni investisiya layihələrinin, ticarət əlaqələrinin və birgə təşəbbüslərin həyata keçirilməsinə imkan verəcək", - deyə Cafer Dal əlavə edib.
Onun sözlərinə görə, qlobal iqtisadi çağırışlar fonunda regional əməkdaşlıq platformalarının əhəmiyyəti daha da artır. Azərbaycan-Mərkəzi Asiya formatı qarşılıqlı etimad, strateji maraqlar və ortaq inkişaf hədəfləri əsasında formalaşan mühüm əməkdaşlıq modeli kimi çıxış edir: "Qarşıdakı illərdə bu əməkdaşlıq enerji, nəqliyyat və ticarətlə yanaşı, rəqəmsal iqtisadiyyat, innovasiya, kənd təsərrüfatı və "yaşıl texnologiya"lar sahələrini də əhatə etməklə daha geniş məzmun qazanacaq. Azərbaycanın təşəbbüsləri və Mərkəzi Asiya ölkələri ilə qurduğu strateji tərəfdaşlıq əlaqələri regionlar arasında geosiyasi və geoiqtisadi bağların möhkəmlənməsinə, Avrasiyada yeni əməkdaşlıq imkanlarının yaranmasına mühüm töhfə verir".
jpg_1784625855.jpg)
jpg_1784624548.jpg)
