Azərbaycan Turizm Bürosu Serbiyanın paytaxtı Belqradda ölkəmizin ilboyu cəlbedici turizm məkanı kimi tanıdılması məqsədilə tədbir keçirilib.
AZƏRTAC xəbər verir ki, tədbirdə Serbiyanın dövlət qurumlarının təmsilçiləri, Beynəlxalq Xizək və Snoubord Federasiyasının, eləcə də hər iki ölkənin turizm sənayesinin və media nümayəndələri iştirak ediblər.
Tədbirdə çıxış edən Dövlət Turizm Agentliyinin sədri Fuad Nağıyev bildirib ki, Azərbaycanla Serbiya arasında münasibətlər dövlət başçılarının rəhbərliyi ilə formalaşmış güclü dostluğa və strateji tərəfdaşlığa əsaslanır. O deyib ki, qarşılıqlı vizasız rejim, həyata keçirilən birgə təşəbbüslər və Bakı ilə Belqrad arasında birbaşa aviareysin istifadəyə verilməsi iki ölkənin turizm əlaqələrinin inkişafına, turist mübadiləsinin artmasına və işgüzar əməkdaşlığın genişlənməsinə mühüm töhfə verir.
Tədbir çərçivəsində keçirilən B2B formatlı görüşlərdə 8 yerli turizm sənayesi təmsilçisi, eləcə də “Air Serbia” təmsilçiləri daxil olmaqla, Serbiyanın 30-a yaxın turizm şirkətinin nümayəndələri iştirak ediblər.
Seminar zamanı Azərbaycanın turizm məhsulları təqdim olunub, ölkənin ilboyu səyahət üçün cəlbedici istiqamət kimi təşviqi və qarşılıqlı əməkdaşlıq imkanları ətrafında fikir mübadiləsi aparılıb. Eləcə də Serbiya media nümayəndələrinin iştirakı ilə brifinq keçirilib, Azərbaycanın turizm məhsulları və potensialı haqqında ətraflı məlumat verilib.
Azərbaycanın Serbiyadakı səfiri Kamil Xasıyev deyib ki, son illərdə ölkələrimiz arasında səmimi dostluq və qarşılıqlı faydalı əməkdaşlıq münasibətləri bütün sahələrdə kifayət qədər uğurla inkişaf edərək strateji tərəfdaşlığın ən yüksək səviyyəsinə çatıb. Bu gün Serbiya Azərbaycanın Avropa qitəsindəki ən etibarlı və ən yaxın dostlarından, tərəfdaşlarından biridir. Bu münasibətlər güclü siyasi təmələ əsaslanır.
Diplomat qeyd edib ki, ölkələrimiz arasında bütün sahələrdə əməkdaşlıq uğurla inkişaf edir və daha böyük potensiala malikdir.
Serbiyanın Turizm və Gənclər Nazirliyinin dövlət katibi Nikola Mijajioviç və Azərbaycan Turizm Bürosunun İdarə Heyətinin sədri Florian Zenqstşmid çıxışlarında ölkələrimiz arasında mövcud turizm əlaqələrindən və bu əməkdaşlığın daha da genişləndirilməsi istiqamətində görüləcək işlərdən danışıblar.
Tədbir çərçivəsində, həmçinin Azərbaycanın turizm potensialının təbliğinə həsr olunmuş videoçarx nümayiş etdirilib.
Gecədə Azərbaycanın Əməkdar artisti, pianoçu, bəstəkar və aranjemançı İsfar Sarabskiniin özünəməxsus caz üslubunda təqdim etdiyi ifalar böyük maraqla qarşılanıb.
Xatırladaq ki, mayın 3-dən etibarən “Air Serbia” tərəfindən Bakı-Belqrad marşrutu üzrə həftədə iki dəfə birbaşa uçuşlar həyata keçirilir. Bakı–Belqrad marşrutu istifadəyə verildiyi gündən etibarən yüksək tələbatla qarşılanıb və reysin orta doluluq göstəricisi 87 faiz təşkil edib.
