Yeni Azərbaycan Partiyasının VIII Qurultayı ölkəmizin ictimai-siyasi həyatında mühüm hadisə olmaqla yanaşı, Azərbaycanın yeni tarixi mərhələdə inkişaf istiqamətlərini müəyyənləşdirən siyasi platformadır. Azərbaycan Respublikasının Prezidenti, Yeni Azərbaycan Partiyasının Sədri İlham Əliyevin qurultaydakı çıxışı dövlətçilik yolumuzun əsas nəticələrini və qarşıda duran strateji vəzifələri bütöv şəkildə ifadə edir. Bu çıxışın başlıca məzmunu aydındır: ərazi bütövlüyünü və suverenliyini tam bərpa etmiş Azərbaycan qazandığı uğurları möhkəmləndirməli, təhlükəsizliyini gücləndirməli və inkişafın nəticələrini hər bir vətəndaşın həyatında daha aydın hiss etdirməlidir.
Qurultayın tarixi əhəmiyyətini şərtləndirən əsas amil onun ölkəmizin bütün ərazisində suverenliyinin təmin edildiyi şəraitdə keçirilməsidir. 2020-ci ilin Vətən müharibəsində qazanılmış Zəfər işğala son qoyulması istiqamətində həlledici dönüş yaratdı. 2023-cü ilin sentyabrında həyata keçirilmiş antiterror tədbirləri isə dövlət suverenliyimizin tam bərpasını təmin etdi. Bu nailiyyətlərin təməlində Ali Baş Komandanın qətiyyəti, ordumuzun peşəkarlığı, xalqımızın birliyi və illər ərzində ardıcıl həyata keçirilmiş dövlət siyasəti dayanır. Şəhidlərimizin əziz xatirəsinə ehtiram, qazilərimizə diqqət və qayğı bu gün də milli mənəvi borcumuzdur.
Prezident İlham Əliyevin çıxışında qələbələrimizin başlanğıcının Yeni Azərbaycan Partiyasının təsis qurultayı ilə əlaqələndirilməsi mühüm siyasi məna daşıyır. 1992-ci ilin noyabrında Naxçıvanda Ulu Öndər Heydər Əliyevin ətrafında birləşən vətənpərvər insanların təşəbbüsü xalqın güclü dövlətə, sabitliyə və etibarlı rəhbərliyə olan ehtiyacını ifadə edirdi. Həmin dövrün idarəçilik böhranı, torpaq itkiləri və iqtisadi tənəzzülü dövlətin taleyini təhlükə qarşısında qoymuşdu. Heydər Əliyevin hakimiyyətə qayıdışı Azərbaycanın parçalanmaq təhlükəsindən xilas edilməsinə, sabitliyin bərpasına və dövlət quruculuğunun başlanmasına imkan yaratdı.
“Əsrin kontraktı”, xarici sərmayələrin cəlb edilməsi və Azərbaycanın beynəlxalq mövqelərinin möhkəmləndirilməsi gələcək uğurlar üçün iqtisadi və siyasi zəmin formalaşdırdı. Prezident İlham Əliyev bu dövlətçilik xəttini yeni dövrün tələblərinə uyğun inkişaf etdirərək Azərbaycanın tarixi məqsədlərini gerçəkləşdirdi. Müstəqillik, milli maraqların qorunması, iqtisadi dayanıqlılıq və güclü müdafiə potensialı həmin siyasətin dəyişməz əsaslarıdır. Qurultayda verilən mesajlar göstərir ki, siyasi varislik daim yenilənən idarəçilik və konkret nəticələr vasitəsilə davam etdirilir.
Yeni mərhələdə hərbi gücün artırılması əsas prioritetlərdən biri olaraq qalır. Prezidentin bu məsələyə xüsusi diqqət yetirməsi dünyada genişlənən münaqişələr və təhlükəsizlik mexanizmlərinin zəifləməsi fonunda başa düşüləndir. Sülhün davamlılığı etibarlı müdafiə imkanları tələb edir. Azərbaycanın hərbi üstünlüyü mümkün təxribatların qarşısını almağa, vətəndaşların təhlükəsizliyini və ölkənin inkişaf şəraitini qorumağa xidmət edir. Çıxışda növbəti ilin büdcəsində hərbi və təhlükəsizlik məqsədlərinə təqribən 9 milyard manat ayrılmasının nəzərdə tutulması bu istiqamətin strateji əhəmiyyətini göstərir.
Təhlükəsizlik anlayışı informasiya və ideoloji mühiti də əhatə edir. Rəqəmsal texnologiyaların sürətli inkişafı, süni intellekt vasitələrinin geniş yayılması və dezinformasiyanın yeni formaları cəmiyyətin məlumatlılığını daha vacib edir. Prezident İlham Əliyevin təhsil və vətənpərvərlik amillərini önə çəkməsi bu baxımdan xüsusi əhəmiyyət daşıyır. Bilikli, tarixi yaddaşı güclü, məlumatı təhlil etməyi bacaran gənclik milli təhlükəsizliyin mühüm dayağıdır. Uşaqların və gənclərin rəqəmsal savadlılığının artırılması, onlarda məsuliyyətli informasiya davranışının formalaşdırılması ailə, məktəb və ictimai institutların birgə fəaliyyəti ilə təmin edilməlidir.
Qurultayda ideoloji işdə şablonlardan və formal tədbirlərdən uzaqlaşmaq çağırışı YAP qarşısında konkret vəzifələr qoyur. Partiyanın fəaliyyəti cəmiyyətlə canlı ünsiyyətə, vətəndaşların suallarına əsaslandırılmış cavablara və görülən işlərin anlaşıqlı izahına söykənməlidir. İnsanların gündəlik qayğılarını dinləmək, onların müraciətlərinin həllinə kömək etmək siyasi etimadı möhkəmləndirir. YAP üzvlərinin fəallığı xüsusilə bölgələrdə, gənclərlə işdə və rəqəmsal informasiya məkanında hiss olunmalıdır. Dövlət siyasətinin mahiyyətini insanlara çatdırmaq üçün real faktlar, səmimi dialoq və praktik fəaliyyət əsas vasitələrdir.
Prezident İlham Əliyevin müəyyənləşdirdiyi xarici siyasət xəttinin mərkəzində Azərbaycanın müstəqil qərarvermə hüququ dayanır. Ölkəmiz müxtəlif siyasi qütblərlə münasibətlərini milli maraqlar əsasında qurur, tərəfdaşlıqlarını qarşılıqlı hörmət və etimad üzərində inkişaf etdirir. Çıxışda Çin və ABŞ ilə strateji tərəfdaşlıq münasibətlərinin, Avropa ölkələri ilə əməkdaşlığın, Mərkəzi Asiya dövlətləri ilə yaxınlaşmanın və D-8 çərçivəsində iştirakın vurğulanması Azərbaycanın diplomatik imkanlarının genişliyini göstərir. İslam həmrəyliyinə töhfə verilməsi və beynəlxalq dialoq üçün etibarlı məkan rolunun gücləndirilməsi də bu siyasətin mühüm istiqamətlərindəndir.
Ermənistanla sülh prosesinə münasibətdə Azərbaycanın mövqeyi əldə edilmiş nəticələri davamlı sabitliyə çevirməyə yönəlib. Prezidentin çıxışında sülh müqaviləsinin paraflanmasının və təmasların qeyd edilməsi regionda əməkdaşlıq imkanlarının genişlənməsi baxımından əhəmiyyətlidir. Azərbaycan öz hüquqlarını təmin etməklə yanaşı, gələcək nəsillərin təhlükəsiz mühitdə yaşamasını əsas götürür. Bu yanaşma siyasi uzaqgörənliyin, milli maraqlara sadiqliyin və məsuliyyətli dövlət idarəçiliyinin ifadəsidir.
İqtisadi və sosial məsələlərə dair mesajlar dövlət siyasətinin vətəndaş rifahına yönəldiyini bir daha təsdiqləyir. Minimum əməkhaqqının, pensiyaların və sosial müavinətlərin növbəti ildə artırılması barədə verilən tapşırıqlar sosial müdafiənin gücləndirilməsi üçün mühüm istiqamətdir. Bu qərarların davamlı maliyyə təminatı iqtisadi inkişaf, investisiyalar və səmərəli idarəçiliklə bağlıdır. Prezidentin çıxışında investisiya forumlarında imzalanmış kontraktların ümumi həcminin 20 milyard dollardan çox olması, valyuta ehtiyatlarının 90 milyard dollara çatması və xarici borcun ümumi daxili məhsula nisbətinin 5,6 faiz təşkil etməsi ölkənin maliyyə imkanlarını göstərən göstəricilər kimi təqdim olunur.
Hesab edirəm ki, iqtisadi gücün insan kapitalına çevrilməsi xüsusi əhəmiyyət daşıyır. Sosial rifahın yüksəlməsi keyfiyyətli təhsil, əlçatan səhiyyə, sağlam ailə mühiti və layiqli məşğulluq imkanları ilə tamamlanmalıdır. Regionlarda xidmətlərin inkişafı, uşaqların sağlamlığının qorunması və gənclərin peşə imkanlarının genişləndirilməsi ümumi inkişafın vətəndaşın həyatında görünən nəticələridir. Güclü dövlətin imkanları insanın sağlamlığına, təhlükəsizliyinə və gələcəyə inamına xidmət etdikcə ictimai həmrəylik də möhkəmlənir.
Enerji və nəqliyyat sahələrində müəyyənləşdirilmiş hədəflər Azərbaycanın beynəlxalq əhəmiyyətini daha da artırır. Neft, qaz, elektrik enerjisi və emal məhsulları üzrə imkanlar ölkəmizin etibarlı təchizatçı mövqeyini gücləndirir. Yeni investisiyalar hasilatın və istehsalın inkişafına, iqtisadi gəlirlərin artmasına xidmət edir. Orta Dəhliz və Şimal–Cənub dəhlizi üzrə yaradılan infrastruktur isə coğrafi mövqeyimizi iqtisadi üstünlüyə çevirir. Çıxışda tranzit yük həcminin orta müddətdə 30 milyon tona çatdırılması hədəfi əlavə gəlirlər, yeni iş yerləri və regional əməkdaşlıq üçün mühüm perspektiv kimi göstərilir.
Qarabağın və Şərqi Zəngəzurun bərpası bu inkişaf gündəliyinin xüsusi yer tutan istiqamətidir. Prezidentin qurultayda açıqladığı məlumatlara əsasən, həmin bölgələrdə 96 min insan yaşayır, çalışır və təhsil alır, bərpa və inkişaf işlərinə 28 milyard manat ayrılıb, 48 yaşayış məntəqəsində keçmiş məcburi köçkünlər məskunlaşıb. Bu göstəricilər Böyük Qayıdışın miqyasını ifadə edir. Qarşıdakı vəzifə qayıdan insanların dayanıqlı məşğulluğunu, keyfiyyətli səhiyyə və təhsil xidmətlərini, rahat yaşayış şəraitini təmin etməklə doğma yurda dönüşü uzunmüddətli inkişafla möhkəmləndirməkdir.
Yeni Azərbaycan Partiyasının VIII Qurultayında Prezident İlham Əliyevin səsləndirdiyi fikirlər qalib Azərbaycanın gələcək fəaliyyət istiqamətlərini müəyyənləşdirir. Qarşıda təhlükəsizliyi daha da gücləndirmək, müstəqilliyi qorumaq, iqtisadi imkanları genişləndirmək və sosial rifahı yüksəltmək vəzifələri dayanır. YAP-ın hər bir üzvü bu məqsədlərin həyata keçirilməsində məsuliyyətini konkret fəaliyyəti ilə nümayiş etdirməlidir. Ulu Öndər Heydər Əliyevin dövlətçilik irsi, Prezident İlham Əliyevin qətiyyətli rəhbərliyi və xalqımızın birliyi Azərbaycanın yeni uğurlarının əsas dayaqlarıdır.
Müşfiq MƏMMƏDLİ,
Milli Məclisin deputatı
jpg_1790976482.jpg)
