“2025-ci ildə Azərbaycanın Mərkəzi Asiyanın beş ölkəsi ilə ticarət dövriyyəsi 1,8 milyard dollara çatıb. Bu göstərici 2024-cü illə müqayisədə 53 faiz artım deməkdir”.
Bu sözləri iqtisadçı ekspert Eldəniz Əmirov deyib. O, Prezident İlham Əliyevin də çıxışında ticarətin 50 faizdən çox artdığını xüsusi vurğuladığını xatırladıb.
Ekspert bildirib ki, ötən il Azərbaycanın ümumi xarici ticarət dövriyyəsi 48,9 milyard dollar olub. Mərkəzi Asiya ölkələrinin bu göstəricidə payı isə təxminən 3,7 faiz təşkil edir.Yəni artım sürətlidir, lakin mövcud iqtisadi potensialla müqayisədə ticarətin həcmi hələ də böyük deyil. “Digər mühüm məsələ ticarətin strukturudur. Qarşılıqlı dövriyyədə idxal üstünlük təşkil edir. Azərbaycanın bu ölkələrə qeyri-neft-qaz ixracı isə 2025-ci ildə cəmi 5 faizdən bir qədər çox artıb. Deməli, ümumi ticarətin sürətli artması hələ Azərbaycan məhsullarının həmin bazarlarda eyni sürətlə möhkəmlənməsi demək deyil. Amma növbəti illərdə ticarət dövriyyəsinin artması üçün kifayət qədər əsas var. İlk növbədə, siyasi münasibətlər yüksək səviyyədədir. Azərbaycanda Mərkəzi Asiya kapitalı ilə 400-dən çox şirkət fəaliyyət göstərir. Qazaxıstan, Özbəkistan və Qırğızıstanla birgə investisiya fondları yaradılıb”, – deyə o əlavə edib.
İqtisadçı qeyd edib ki, ən böyük imkanlardan biri nəqliyyat və logistikadır. Mərkəzi Asiyanın Avropaya çıxışında Azərbaycanın tranzit imkanlarının genişlənməsi ölkəmizə həm əlavə gəlir, həm də yeni iqtisadi tərəfdaşlıqlar qazandıra bilər. Azərbaycan Mərkəzi Asiya ilə münasibətlərdə yalnız tranzit ölkə və hazır məhsul alıcısı olmaqla kifayətlənmək istəmir. Birgə investisiya fondlarından istifadə etməklə, ölkəmizdə istehsal müəssisələrinin yaradılması, həmin müəssisələrin həm Mərkəzi Asiya, həm də Avropa bazarlarına işləməsi daha böyük iqtisadi nəticə verə bilər.
Ekspert vurğulayıb ki, Azərbaycanın 5 ölkə üzrə ixrac imkanları ayrıca araşdırılmalı, hansı məhsulların hansı bazarlarda rəqabət üstünlüyünə malik olduğu əsaslandırılmış şəkildə müəyyən edilməlidir. Çünki məqsəd təkcə 1,8 milyard dollarlıq dövriyyəni artırmaq yox, həmin dövriyyədə Azərbaycan istehsalının və əlavə dəyərinin payını yüksəltmək olmalıdır.
E.Əmirovun fikrincə, Mərkəzi Asiya ilə iqtisadi münasibətlərin növbəti mərhələsində əsas uğur göstəricisi də məhz bu olacaq.
Əsmər QARDAŞXANOVA,
“Azərbaycan”
jpg_1790976482.jpg)
