Yarışları izləməyə gedənlər yaradılan şəraitdən razılıq edirlər
Son illər Bakı şəhərində nəqliyyat-kommunikasiya sahəsində görülən böyük işlər nəticəsində bu sahədə mükəmməl sistem formalaşıb. Yollar genişləndirilib, yeni körpülər, tunellər və keçidlər inşa edilib. Bunun sayəsində avtomobillər və insanlar rahat hərəkət edə bilirlər. Şəhərə gələn xarici qonaqlar da Bakının müasir nəqliyyat infrastrukturuna heyran olduqlarını gizlətmirlər.
I Avropa Oyunlarının keçirildiyi ilk günlərdə görülən bu işlərin əhəmiyyəti özünü daha qabarıq büruzə verir. Uğurlu layihələrin nəticəsidir ki, bu gün şəhərdə böyük idman tədbiri keçirilsə də, küçələrdə tıxaclara demək olar ki, rast gəlinmir, sürücülər və sərnişinlər mənzil başına rahat gedib çatırlar.
I Avropa Oyunları ərəfəsində şəhərə yüksək komfortlu avtobuslar gətirildi. Bununla bərabər, Bakı Metropoliteni də dünya standartlarına cavab verən yeni qatarlar alıb xəttə buraxdı. Təbii ki, bu yeniliklər ilk növbədə yüksək səviyyədə rahatlıq deməkdir. Bu gün I Avropa Oyunlarının keçirildiyi arenalara gedən azarkeşlər həmin nəqliyyat vasitələrindən razılıqla istifadə edirlər. Xüsusi marşrutlar üzrə hərəkət edən avtobuslara güclü nəzarət var. Avtobuslar cədvəl üzrə dəqiq hərəkət etdiyindən azarkeşlər vaxtlarını itirmirlər. Sərnişin sıxlığından asılı olaraq avtobusların hərəkəti 5-10-15 dəqiqə arasında nizamlanır.
Elmlər Akademiyası bağından “Kristal Hall”a və Avropa Oyunları Parkına xüsusi marşrutlarla getmək mümkündür. Dispetçer Adil Əbdüləliyev deyir ki, bu marşrutlardan I Avropa Oyunlarına bileti olan Azərbaycan və xarici ölkə vətəndaşları istifadə edirlər: “Biz sərnişinlərin idman arenalarına rahat və vaxtında çatdırılmasına cavabdehik. Buna ciddi nəzarət var. Bu işdə bizə nəqliyyat sahəsində təcrübəsi olan könüllülər də kömək edirlər. Onlar bu işlə məşğul olmazdan əvvəl xüsusi kurslarda hazırlıq keçərək xarici vətəndaşlarla ünsiyyət qurmaq üçün əcnəbi dilləri öyrəniblər”.
Sürücü Zeynal Şahbazov yeni avtobusu idarə etməkdən zövq aldığını deyir. Bildirir ki, bu avtobusların idarə edilməsi olduqca rahatdır, salonda isə sərnişinlər üçün hər cür rahatlıq təmin edilib: “Hər gün avtobuslar parklarda yuyulub təmizlənərək xəttə buraxılır. Sərnişinlərlə ünsiyyətimiz çox yaxşıdır. Baxmayaraq ki, onların bir hissəsi xarici ölkə vətəndaşları olur, dil tapırıq. Sevindirici haldır ki, Bakı sakinləri əcnəbi vətəndaşlara münasibətdə çox həssas və mehribandır, lazım gələndə onlara istədikləri ünvanlara çatmaqda kömək edirlər. Bu mehriban rəftara görə həm biz sürücülərə, həm də paytaxt sakinlərinə əcnəbilər tez-tez “okey” və bəziləri də doğma dilimizdə “çox sağ olun” deyə təşəkkürlərini bildirirlər. Bu bizi qürurlandırır”.
Cavid Məmmədov çimərlik voleyboluna tamaşa etmək üçün gedir. Bu vaxta kimi isə o, karate, boks, güləş idman növləri üzrə yarışlarda milli komandamıza azarkeşlik edib. Deyir ki, yarışlara getməkdə məqsədi bir Azərbaycan gənci olaraq ölkəmizdə keçirilən I Avropa Oyunlarına dəstək verməkdir: “İndiki halda mən bu yarışlara azarkeşlik etməklə öz vətəndaşlıq borcumu yerinə yetirirəm. Nəqliyyatın işindən isə çox razıyam. I Avropa Oyunlarının Azərbaycanda yüksək səviyyədə keçirilməsində qürur duyuram və bu sevinci bizə bəxş etdiyi üçün Prezident İlham Əliyevə və Avropa Oyunları Təşkilat Komitəsinin sədri Mehriban xanım Əliyevaya minnətdarlığımı bildirirəm”.
Protokol qrupunun üzvü, könüllü Zibeydə İsmayılzadə də Bakıda idman arenalarına sərnişinlərin daşınmasında göstərilən xidməti yüksək qiymətləndirdi. Bildirdi ki, bu işdə səliqə-sahman, ən başlıcası isə, dəqiq hərəkət cədvəli var. Həmçinin vurğuladı ki, yarışlar ərəfəsində paytaxtda nəqliyyat infrastrukturu istər şəhər sakinlərinə, istərsə də xaricdən gələn qonaqlara idman arenalarına, mədəni-kütləvi tədbirlərdə iştirak etmək üçün müxtəlif ünvanlara gedənlərə nümunəvi xidmət göstərir.
Sürücü Şirzad Seyidməmmədov da bildirdi ki, bu xidmət sahəsində sürücü-sərnişin münasibətləri çox yüksək səviyyədədir: “Avtobuslar çox rahatdır, hər cür şəraiti var. Yayın bu istisində sərnişinlər kondisionerli avtobuslarda özlərini çox rahat hiss edirlər. Onlar cədvəl üzrə nəzərdə tutulduğu kimi 5-10-15 dəqiqə ərzində hərəkət edərək istədikləri idman arenalarına çatdırılır. Xarici vətəndaşlarla ünsiyyət qurmaq üçün ingilis dili kurslarından keçdiyimiz üçün çətinlik çəkmirik. Bu işdə əcnəbi dili bilən Azərbaycan vətəndaşları da onlara yardımçı olurlar”.
Hacı Süleymanov Nəqliyyat Nazirliyi dövlət avtomobil nəqliyyat xidmətinin məsləhətçisidir. Deyir ki, “Gənclik” metrostansiyasından Heydər Əliyev adına İdman Sarayına hərəkət edən sərnişin avtobuslarına nəzarəti həyata keçirirlər: “Buradan həmin arenaya doğru 11 avtobus hərəkət edir. Bütün avtobusların hərəkət cədvəlinə ciddi diqqət yetirilir. Bu sahədə heç bir gecikməyə yol verilmir. Sürücülərimiz də xüsusi kurslar keçərək ingilis dili ilə bərabər, sərnişinlərlə davranış qaydalarını da öyrəniblər. Bu günə qədər biz sərnişin-sürücü arasında heç bir problemlə rastlaşmamışıq”.
Hüseyn Şıxızadə bacısı oğlu Üzeyirlə Heydər Əliyev adına İdman Sarayında sərbəst güləş yarışlarını izləməyə gedir. 5 yaşlı Üzeyir deyir ki, güləşə baxmağa getsə də, boksçu olmaq istəyir: “Yarışlarda qalib gəlib çempion olacağam. İstəyirəm ki, mən də gələcəkdə Azərbaycan bayrağını qaldırıb himnimizi səsləndirim”.
Bu adı yaxşı yadda saxlayın. Dünyanın işini bilmək olmaz. Bir də gördünüz ki, dünyanın hansısa bir yerində Üzeyir adında Azərbaycan idmançısı çempion olaraq, özünün dediyi kimi, bayrağımızı qaldırıb himnimizi oxutdurdu.
“I Avropa Oyunları neçə-neçə Azərbaycan gəncinin ürəyində çempion olmaq arzusunu oyadacaq”. Bu sözləri isə Prezident İlham Əliyev deyib və həqiqiliyinə balaca Üzeyirin dediklərinə qulaq asanda bu daha əmin olursan. Həqiqətən, I Avropa Oyunları Azərbaycanda neçə-neçə uşağın, gəncin ürəyində çempion olmaq arzusu oyadır və onları bu ad uğrunda mübarizəyə sövq edir.
Avtobusdan düşüb Heydər Əliyev adına İdman Sarayının qarşısına gəlirik. Bizi könüllü Fərid Həsənov “Siz Heydər Əliyev adına İdman Sarayına xoş gəlmisiniz!” sözləri ilə qarşılayır. Öyrəndik ki, Fərid Hüseynov İqtisad Universitetinin IV kurs tələbəsidir. I Avropa Oyunlarına dəstək vermək üçün yay istirahətindən imtina edərək könüllü kimi fəaliyyət göstərir. Deyir ki, yarışların dövlətimiz və xalqımız üçün böyük əhəmiyyəti olduğunu bildiyi üçün bu işlərə qoşulub: “Bununla da fəxr edirəm. Fəxr edirəm ki, I Avropa Oyunlarına az da olsa mən də töhfə vermişəm. Bu, hər bir Azərbaycan gənci üçün şərəfli bir missiyadır və mən də onu şərəflə daşıyan gənclərdən biri kimi qürur duyuram”.
Rüstəm KAMAL,
Fərman BAĞIROV (foto),
“Azərbaycan”
