"Şanlı Zəfərimizdən sonra bu gözəl bayramı - 28 May - Müstəqillik Günü bayramını azad edilmiş torpaqlarda qeyd edirəm və bu, artıq bir ənənəyə çevrilib. Hesab edirəm ki, ən düzgün seçimdir. Bu Müstəqillik Günü hər birimiz üçün çox əzizdir".
Prezident İlham Əliyevin bu il 28 may tarixində Qarabağdan - Şuşanın Böyük Qaladərəsi kəndindən səsləndirdiyi qürur dolu sözləri həm də Azərbaycanın müstəqillik tarixinə yazılan yeni, şərəfli bir dövrün bəyannaməsidir. Altı ildir ki, xalqımız 28 May Müstəqillik Gününü tarixi zəfərin verdiyi məğrurluqla, doğma torpaqların azadlığının, suverenliyin tam bərpasının və üçrəngli bayrağımızın vətənin hər guşəsində dalğalanmasının verdiyi coşqu ilə qeyd edir.
Qürurlu ənənə
Ərazilərimizi işğaldan azad edərək Azərbaycanı bütövləşdirən qalib lider İlham Əliyev hər il 28 May Müstəqillik Günündə xalqımıza xoş müjdələr verməyi ənənəyə çevirib. Dövlət başçısının həmin günü azad olunmuş ərazilərdə, quruculuğun mərkəzində, xalqı ilə birbaşa təmasda keçirməsi artıq dövlətçilik fəaliyyətinin ayrılmaz parçasına dönüb. Bu xoş ənənənin kökündə xalqla dövlətin sarsılmaz birliyi dayanır.
Ölkəmizin rəhbəri quruculuğun ilk təməl daşını 28 may 2021-ci ildə Ağdamda qoyması ilə ümumilikdə Qarabağın tezliklə dirçələcəyinin mesajını vermişdi.
"Bu mərasim üçün, bu görüş üçün başqa vaxt da müəyyən oluna bilərdi. Ancaq mən hesab etdim ki, ən düzgün tarix bizim milli bayramımız olan Respublika Günüdür, müstəqillik günüdür. Çünki bu gün burada olmağımız bir daha müstəqilliyimizin nə qədər güclü olmasını göstərir", - deyə həmin tarixdə Prezident Ağdamdan bəyan etmişdi. Dövlətimizin başçısı vurğulamışdı ki, əgər biz güclü müstəqil dövlət qurmasaydıq, öz tarixi torpaqlarımızı işğalçılardan azad edə bilməzdik: "Ancaq güclü Azərbaycan, müstəqil Azərbaycan, sözün əsl mənasında, müstəqil siyasət aparan Azərbaycan bu tarixi missiyanı şərəflə yerinə yetirdi".
Prezident İlham Əliyevin 2022-ci ildə Müstəqillik Günü ərəfəsində - mayın 27-də Ağalı sakinləri ilə görüşməsi, 2023-cü ilin Müstəqillik Günündə Laçın şəhərində laçınlılara evlərinin açarlarını təqdim etməsi, 28 may 2024-cü ildə xocalılılarla Xocalıda görüşməsi müstəqillik salnaməmizə qızıl hərflərlə yazılıb.
Ötən il 28 May Müstəqillik Gününün əlamətdar hadisələrindən biri strateji baxımdan mühüm əhəmiyyət kəsb edən Laçın Beynəlxalq Hava Limanının açılışı oldu. Prezident İlham Əliyev və Türkiyə Prezidenti Rəcəb Tayyib Ərdoğanın rəmzi olaraq yaşıl lentini kəsdikləri bu Beynəlxalq Hava Limanı ümumilikdə Qarabağ və Şərqi Zəngəzurun iqtisadi intibahına işarə idi.
Laçında - azad Azərbaycan torpağında Prezident İlham Əliyev, Türkiyə Prezidenti Rəcəb Tayyib Ərdoğan və Pakistan Baş naziri Məhəmməd Şahbaz Şərifin görüşü dünyaya üç qardaş ölkənin - Azərbaycan, Türkiyə və Pakistanın sarsılmaz birliyini, həmrəyliyini nümayiş etdirdi. Qardaş ölkələrin liderləri 44 günlük müharibə sayəsində beynəlxalq hüququn tələblərinə uyğun şəkildə azadlığına qovuşdurulan Şərqi Zəngəzur bölgəsindən sülh mesajları verdilər, yeni dünya nizamında daim haqqın tərəfində olduqlarının, eyni zamanda xalqlarının, ölkələrinin milli maraqlarına qarşı istənilən təhdidə qarşı birlikdə mübarizə aparacaqlarının qətiyyətli bəyanını etdilər.
Şuşadan dünyaya sülh mesajı
2026-cı ilin 28 may tarixi bir daha təsdiqlədi ki, Azərbaycan öz tarixinin ən qüdrətli və əzəmətli dövrünü yaşayır. Ölkəmiz bu gün taleyini özü həll edən, heç kimin diktəsinə boyun əyməyən və regional proseslərin əsas aktoru olan dövlətdir.
Prezident Böyük Qaladərəsi kəndində sakinlərlə görüşü zamanı vurğuladı ki, müstəqillik böyük nemətdir, böyük nailiyyətdir: "Amma əsl müstəqillik o vaxt olur ki, ölkə müstəqil siyasət apara bilsin. Bax Azərbaycan o ölkələrdəndir... ... Həm 2020-ci il, həm də 2023-cü il Şanlı Zəfərimizdir və biz əbədi bu Zəfərlə fəxr edəcəyik. Bu gün Azərbaycan ərazisində hər qarış torpaq bizim nəzarətimizdədir. Azərbaycanın suverenliyi, ərazi bütövlüyü tam bərpa edilmişdir. Əldə edilmiş sülh bizim şərtlərimiz əsasında olmuşdur".
Müstəqillik Günündə Qarabağdan Prezident İlham Əliyev tərəfindən səsləndirilən bu fikirlər həm də dünyaya verilən aydın mesajdır. Qalib dövlət, müzəffər xalq bugünkü Azərbaycanın reallığıdır. "Dəmir yumruq" yerindədir və azadlığı uğrunda gözümüzü qırpmadan canımızı fəda etdiyimiz torpaqlarımızdan bizi ayırmaq istəyən hər cəhdin qarşısı qətiyyətlə alınacaq. Biz bu torpaqlarda əbədiyyən varıq. Qarabağ, Azərbaycandır.
Qalib liderin söylədiyi kimi, "dəmir yumruq" hesabına, xalqımızın birliyi hesabına, ordumuzun qüdrəti, şəhidlərimizin qanı-canı bahasına bu gün buradayıq və bundan sonra bizi heç kim buradan tərpədə bilməz.
Bəli, ötən illərin mürəkkəb siyasi prosesləri, 44 günlük müharibənin şanlı zəfəri və antiterror tədbirləri Azərbaycanı regionda söz sahibinə çevirib. Artıq viran qoyulmuş kəndlərin, dağıdılmış şəhərlərin yerində müasir yaşayış məntəqələri, geniş infrastruktur və bərpaolunan yurd yerləri yüksəlir.
"Nə yaxşı ki, gəlmisən..."
2026-cı ilin 28 May Müstəqillik Günündə Böyük Qaladərəsi kəndində təsirli və sevincli anlar yaşandı. Dövlət başçısının sakinlərlə səmimi söhbəti, onların sevincini bölüşməsi, ailə ocaqlarının istiliyini hiss etməsi özündə zəfərimizin qürurunu daşıyırdı. Bu səmimi görüşdə ağbirçək anaların duası, sakinlərin fəxr dolu baxışları "dəmir yumruq" ətrafında birləşən xalqın inamını əks etdirirdi. Prezident İlham Əliyevin kənd sakinləri ilə görüşü həm də 30 illik yurd həsrətinə son qoyan bir qovuşma idi.
Ölkəmizin rəhbərinin kənd sakini Akif Qəhrəmanovun evində qonaq olması, səmimi söhbəti, xalq və lider arasındakı sarsılmaz bağı bir daha nümayiş etdirdi. Evin ağbirçək sakini Prezidentə olan minnətdarlığını səmimi sözlərlə belə dilə gətirdi: "Sənin hesabına, Sənin sayəndə gəlmişik. Allah Səni bizim üstümüzdən əskik etməsin... ...Nə yaxşı ki, gəlmisən, bala. Bizi nə yaxşı ki, torpağımıza gətirmisən, ayağımız torpağımıza dəyib".
Ağbirçək ananın ürək sözləri sadəcə yurda qayıdış xoşbəxtliyinin yox, bütöv bir xalqın zəfər qürurunun təcəssümü idi. Görüşdə sakinlər yaşadıqları çətinlikləri də xatırladılar, lakin onların dilindəki əsas not zəfər inamı idi.
Böyük Qaladərəsi kəndinə qayıdan sakinlərlə ümumi görüşdə Prezident İlham Əliyev bir daha müstəqillik bayramının doğma torpaqlarımızda qeyd olunmasının tarixi əhəmiyyətini vurğuladı: "Uzun fasilədən sonra doğma vətənə qayıtmaq böyük xoşbəxtlikdir... ...Bu, bir daha göstərir ki, xalqımız böyük xalqdır. Əzab-əziyyətə baxmayaraq, əyilmədi, iradəsini yerində saxladı və bir ümidlə yaşayırdı ki, gün gələcək və biz bu torpaqlara qayıdacağıq. Son illər ərzində - 2003-cü ildən bu yana keçmiş köçkünlərlə çoxsaylı görüşlərimdə həm işğal dövründə, həm Zəfərdən sonra bir daha əmin oluram ki, bizim xalqımız nə qədər əzəmətlidir, vüqarlıdır və yenilməzdir. Siz 30 il doğma diyarınızdan məhrum edilmişdiniz, amma ümidinizi itirmədiniz, iradənizi qırmadınız və inanırdınız ki, bu gün gələcək və gəldi".
Görüşdə sakinin "Cənab Prezident, oradan baxırlar bizə, peşmandırlar ki, bir vaxt biz baxırdıq. İndi deyirlər ki, günah özlərindədir" deməsi, tarixi ədalətin tamamilə bərpa olunduğunun və işğalçıların öz məğlubiyyətlərini dərk etdiklərinin ən bariz ifadəsi oldu. Prezident İlham Əliyevin Laçın sakinləri ilə görüşünü xatırladaraq ermənilərə, - "dedim ki, bilin ha, biz sizi görürük buradan. Özünüzü yaxşı aparın" xəbərdarlığı isə dövlətimizin gücünün və bölgədəki mütləq hakimiyyətinin rəmzi kimi yaddaşlara həkk olundu.
Qarabağı azadlığına qovuşduran qalib lider İlham Əliyevin Şuşanın Böyük Qaladərəsi kəndində, məğrur dağların ətəyində, azad edilmiş torpaqlarımızda sakinlərlə bu görüşü bir daha sübut etdi ki, müstəqillik yalnız dövlət atributları ilə deyil, həm də xalqın doğma yurduna sahiblik hüququ ilə ölçülür.
Digər keçmiş məcburi köçkünlərimiz kimi, Böyük Qaladərəsi kəndinin sakinləri də öz evlərinə qayıdarkən, əslində, tarixin ədalətini bərpa etdilər. Bu qayıdış həm də müstəqilliyimizin möhürüdür. Azad Qarabağ və Şərqi Zəngəzurda ucalan hər yeni ev, çəkilən hər yol, əkilən hər ağac dövlətimizin qüdrətinin və xalqımızın zəfər əzminin göstəricisidir.
Yasəmən MUSAYEVA,
"Azərbaycan"
