Tibbi Ərazi Bölmələrini İdarəetmə Birliyinin (TƏBİB) xaricdə fəaliyyət göstərən azərbaycanlı həkimlərlə əməkdaşlığın genişləndirilməsi və qabaqcıl tibbi təcrübənin ölkəmizdə tətbiqinin təşviqi istiqamətində həyata keçirdiyi tədbirlər çərçivəsində Yeni Klinikada tibbi konsilium təşkil olunub.
TƏBİB-dən AZƏRTAC-a verilən məlumata görə, konsilium Azərbaycan-Amerika Tibb Assosiasiyasının nümayəndəsi, professor Rauf Şahbazovun Yeni Klinikaya səfəri çərçivəsində keçirilib.
Konsilium zamanı professor Yeni Klinikanın yerli həkim-mütəxəssisləri ilə birlikdə mürəkkəb klinik halları müzakirə edib, pasiyentlərin mövcud vəziyyəti, aparılmış müayinələrin nəticələri və tətbiq olunan müalicə yanaşmaları ilə tanış olub. Diaqnostika, müalicənin növbəti mərhələləri və mümkün tibbi müdaxilələrlə bağlı peşəkar məsləhətlər verilib.
Səfər çərçivəsində professor Yeni Klinikanın Cərrahiyyə və Transplantasiya Mərkəzinin fəaliyyəti, burada göstərilən tibbi xidmətlər, müasir diaqnostika və müalicə imkanları ilə də tanış olub.
Görüş zamanı xaricdə fəaliyyət göstərən azərbaycanlı həkimlərin bilik və təcrübəsindən ölkəmizdə daha səmərəli istifadə, yerli və xarici mütəxəssislər arasında peşəkar əlaqələrin gücləndirilməsi, qarşılıqlı təcrübə mübadiləsinin genişləndirilməsi, eləcə də onlayn məsləhətləşmələrin, vebinarların və elmi tədbirlərin təşkili məsələləri müzakirə edilib.
TƏBİB tərəfindən bu praktikanın daha da aktivləşdirilməsi, xaricdə fəaliyyət göstərən mütəxəssislərlə tabeli tibb müəssisələrinin əkimləri arasında həm əyani, həm də onlayn formatda tibbi konsilium və konsultasiyaların mütəmadi keçirilməsi nəzərdə tutulur.
Qeyd edək ki, tibb üzrə fəlsəfə doktoru Rauf Şahbazov qaraciyər, böyrək və mədəaltı vəzi transplantasiyası, həmçinin hepatobiliar cərrahiyyə sahəsində ixtisaslaşmış, beynəlxalq təcrübəyə malik transplant cərrahıdır. Hazırda Amerika Birləşmiş Ştatlarının Nyu-York ştatında yerləşən “Albany Medical Center”də Transplantasiya Cərrahiyyəsi Bölməsinin rəhbəri və cərrahiyyə professoru kimi fəaliyyət göstərir.
