Ali Məhkəmə Plenumunun 2025-ci ilin yekunlarına həsr olunmuş iclası keçirilib

Yanvarın 23-də Azərbaycan Respublikası Ali Məhkəməsi Plenumunun iclası keçirilib.

Ali Məhkəmənin sədri İnam Kərimov bildirib ki, ötən ilin “Konstitusiya və Suverenlik İli” elan olunması hüquqi dövlət prinsiplərinin inkişafına xüsusi töhfə verib. Ötən il Ali Məhkəmə məhkəmə fəaliyyətinin keyfiyyətini artırmaq və vətəndaşların ədalətə inamını gücləndirmək üçün tədbirlər həyata keçirib.

İclasda ötən ilin məhkəmə hakimiyyəti üçün məhsuldar olduğu vurğulanıb. Ali Məhkəmə ədalət mühakiməsinin keyfiyyətini yüksəltmək və hüquqi məsələlərdə sabitliyi təmin etmək üçün ardıcıl tədbirlər görüb.

Diqqətə çatdırılıb ki, hesabat dövründə 44 üç ulduzlu, 1 dörd ulduzlu qərar, 2 qərardad və 2 Plenum qərarı qəbul edilib. Plenum qərarlarına mühüm dəyişikliklər edilib, 4 Plenum icraatı üzrə müvafiq qərarlar qəbul olunub.

İclasda məhkəmə-hüquq islahatlarının davam edəcəyi qeyd olunub. Qarşıdakı hədəflər arasında iş yükünün optimallaşdırılması, vahid təcrübənin tətbiqi və işlərin çevik baxılması göstərilib.

Daha sonra Ali Məhkəmənin kollegiyalarının ötən ildə görülmüş işlərlə bağlı geniş hesabatları dinlənilib.

Kommersiya kollegiyasında işlər 2024-cü illə müqayisədə 17,9 faiz artıb. 2025-ci ildə Kommersiya kollegiyasının icraatında olan 937 işdən 82 faizi yekunlaşıb. Baxılmış işlərdən 81,1 faizi ilə bağlı məhkəmə aktı saxlanılıb, 18,1 faizi ləğv olunub, 0,8 faizi dəyişdirilib.

İnzibati kollegiyada 5227 işdən 62,1 faizi yekunlaşıb. Baxılmış 3246 işdən 27,4 faizdə akt saxlanılıb, 47 faizi mümkün sayılmayıb, 14 faiz qərar ləğv olunub, 0,9 faizi isə dəyişdirilib.

Mülki kollegiyada ötən ildə mülki işlər 234 min 597-ə çatıb, apellyasiya şikayətləri 3,5 faiz artsa da, kassasiya şikayətləri 5,9 faiz azalıb. Yekunlaşma göstəricisi orta hesabla 85 faiz təşkil edib, təkrar baxılan işlər azalıb.

Sonra aşağı instansiya məhkəmələrində mülki işlər üzrə ədalət mühakiməsinin həyata keçirilməsi cari vəziyyəti müzakirə edilib.

Qeyd edilib ki, 2025-ci il ərzində Cinayət kollegiyasında 3556 işdən 75,3 faizinə mahiyyəti üzrə baxılıb. Baxılmış işlərin 82,3 faizində qərar dəyişdirilmədən saxlanılıb, 5 faizi ləğv olunub, 12,7 faizi dəyişdirilib.

Ali Məhkəmə Aparatının hesabatında 2025-ci ildə fəaliyyətin hüquqi və təşkilati təminatı üçün tədbirlər görüldüyü bildirilib. 2026-cı ilin prioritetləri rəqəmsal idarəetmə, elektron sənəd dövriyyəsi, avtomatik təhlil və süni intellekt elementləri olacaq.

Məruzələr ətrafında çıxış edənlər 2025-ci ildə kollegiyaların fəaliyyətində nəzərəçarpacaq keyfiyyət dəyişikliyi olduğunu qeyd ediblər.

Plenumda həmçinin "Hərbi xidmət keçməkdən boyun qaçırma, hərbi hissəni və ya xidmət yerini özbaşına tərk etmə və fərarilik işləri üzrə məhkəmə təcrübəsi haqqında” Azərbaycan Respublikası Ali Məhkəməsi Plenumunun 2001-ci il 1 noyabr tarixli 1 nömrəli Qərarında dəyişiklik edilməsi barədə Ali Məhkəmə Plenumunun Qərar layihəsinin müzakirəsi aparılıb.

Sonda Ali Məhkəmənin 2026-cı ilə dair İş Planı təsdiqlənib.