Sizin Nizami Rayon İcra Hakimiyyətinə ünvanladığınız 17.10.2025-ci il tarixli məktubunuza tərəfimizdən baxılmışdır.
Qeyd olunan məsələ ilə əlaqədar bildiririk ki, 2024-cü ilin oktyabr ayında Nizami rayonu, C.Naxçıvanski küçəsi, "8-ci km bazarı" yerləşən ərazidə yaşayan sakinlərin çoxsaylı müraciətlərinə əsasən, uzun illər həmin küçəboyu yolun hər iki tərəfinin nəqliyyat və piyadaların hərəkəti üçün nəzərdə tutulan hissələrində qanunsuz olaraq quraşdırılmış piştaxtalar aidiyyəti qurumların iştirakı ilə götürülmüş və ümumilikdə ərazidə antisanitar vəziyyət aradan qaldırılmışdır.
Bundan başqa, küçə boyunca sakinlərin və nəqliyyat vasitələrinin rahat gediş-gəlişi, həmçinin xüsusi təyinatlı nəqliyyat vasitələrinin də (təcili tibbi yardım, yanğınsöndürən və məişət tullantılarının daşınmasını həyata keçirən nəqliyyat vasitələrinin) maneəsiz hərəkəti təmin edilmiş, səkilərin və yaşıllıqların bərpası istiqamətində əlavə tədbirlər görülmüşdür. Nizami Rayon İcra Hakimiyyətinin müraciətinə əsasən, Azərbaycan Yerüstü Nəqliyyat Agentliyi tərəfindən C.Naxçıvanski küçəsi boyunca parklanma zonası təşkil edilmişdir.
Qeyd olunan ərazidə qanunsuz küçə ticarəti ilə məşğul olan şəxslərin fəaliyyətlərinin davam etdirilməsi üçün yaxınlıqda mövcud olan bazarların rəhbərləri ilə görüşlər təşkil edilmiş və həmin bazarlarda onlar üçün müvafiq satış yerləri ayrılmışdır. Bundan başqa, həmin şəxslərin müraciətləri nəzərə alınaraq bazarlarda bir müddət heç bir ödəniş etmədən fəaliyyət göstərmələri üçün şərait yaradılmışdır.
"Azərbaycan" qəzetinin 17.10.2025-ci il tarixli sayında dərc edilmiş "Ticarət fəaliyyəti sanitar mədəniyyəti ilə uzlaşmalıdır" sərlövhəli məqalə ilə əlaqədar əraziyə təkrar baxış keçirilmiş, aidiyyəti qurumların iştirakı ilə müvafiq tədbirlər görülmüşdür.
Həmçinin bildiririk ki, ərazidə yerləşən bazarların 24 saat fəaliyyət göstərməsi və insan axınının intensiv olması, eləcə də ərazidə fəaliyyət göstərən şəxslər tərəfindən sanitar qaydalara riayət edilməməsi məqalədə qeyd olunan halların yaranmasına səbəb olur. Buna baxmayaraq, aidiyyəti qurumlar digər ərazilərlə müqayisədə həmin ünvanda tullantıların toplanması və daşınması prosesini gün ərzində nəzərdə tutulan qrafikdən bir neçə dəfə artıq həyata keçirirlər. Ərazinin sanitar vəziyyətinin yoxlanılması və qanunsuz küçə ticarətinin qarşısının alınması məqsədilə tərəfimizdən müvafiq qurumlarla birgə mütəmadi olaraq monitorinqlər aparılır. Bundan əlavə, ərazi daimi olaraq kommunal xidmətlərin nəzarəti altındadır.
İldırım MEHDİYEV,
rayon icra hakimiyyəti başçısının müavini
